Dialuna 9 di september ta bay tuma luga votamento pa eligi e presidente y vice presidente di Parlamento di Aruba pa aña parlamentario 2024-2025. Algun parlamentario a indica caba cu nan no lo ta votando pa Sr. Edgard Vrolijk di MEP sinta den e stoel di presidente un biaha mas.
Otro medionan di comunicacion a indica cu fraccion Raiz no lo vota pa e presidente actual di parlamento, Edgard Vrolijk, dialuna durante votamento pa presidente y vice-presidente di parlamento pa e aña parlamentario nobo. Reportera di Bon Dia Aruba a tuma contacto cu vocero di fraccion Raiz pa confirma si e informacion aki ta corecto.
Vocero di fraccion Raiz a confirma cu en berdad Raiz no lo ta votando na fabor di Sr. Edgard Vrolijk dialuna awo.
“Raiz a laga sa na MEP cu no lo sostene Edgard dialuna awo. Nan lo sostene cualkier otro miembro di fraccion MEP. Y awo nan ta bezig ta wak con lo sigui pa dilanti,” e vocero a indica.
Otro parlamentario cu a expresa su opinion pa loke ta e votamento di dialuna proximo ta lider di fraccion ACCION 21, Miguel Mansur. A traves di un publicacion riba su pagina di Facebook Mansur a critica fuertemente e actual presidente di parlamento y ta indica cu dialuna e lo ta pendiente pa wak si “palabra y firma” di miembronan di fraccion Raiz tin “balor ora ta toca integridad di presidente di parlamento”
“E momento di berdad a yega pa Sra. Misha Raymond y Sr. Raymond Kamperveen demostra cu nan firma tin balor, cu nan representacion tin balor. Actual presidente, Sr. Edgard Vrolijk, a viola reglement van orde di parlamento y constitucion structuralmente durante ultimo aña di un forma descabeya. Su continuacion lo ta un menasa pa e poco credibilidad cu e organo mas halto di nos sistema constitucional ta gosa di dje. Sr. Vrolijk a sistematicamente abusa di su poder pa faborece su partido. Den otro palabra el a pone su interes personal prome cu interes nacional pa gana punto den su partido,” parlamentario Mansur a remarca.
El a agrega cu ultimamente Sr. Vrolijk a te hasta nenga minister Ursell Arends su peticionnan pa reunion publico tocante e asunto di taxistanan y cu e ta mal usa su funcion pa purba evita cu su partido ta mustra malo. “Un berguensa pa parlamento, nos pais y fundador di su partido,” el a resalta.
