Raiz ta decepciona cu tin 2 minister no a reacciona riba nan peticion di Landsverordening Openbaarheid van Bestuur (LOB).
E peticion di LOB – segun e comunicado cu Bon Dia a ricibi di Raiz- a wordo entrega na minister di Turismo, Salud Publico y Deporte, Dangui Oduber (MEP), minister di Financia, Asunto Economico y Cultura, Xiomara Ruiz-Maduro (MEP) y minister di Desaroyo Teritorial, Infrastructura y Medio Ambiente, Otmar Oduber (POR).
Esaki ta encuanto un declaracion reciente di e minister di Turismo, Salud Publico y Deporte, cu kier trece un cambio cu e ta considera cardinal pa asina realisa e proyecto di Isla di Oro na Pos Chikito.
Segun e ROP e area aki ta wordo describi como ‘zona di mangelnan situa den un reserva natural marino rondona di centronan di residencia’. Segun e LOB capitulo 2 Art.3, e minister tin tres siman di tempo pa procesa e peticion. Den caso cu esaki no ta posibel, e minister por prolonga e fecha di entrega un solo biaha cu un termino maximo di tres siman. E minister mester percura pa informa e peticionario na tempo, por escrito y indicando e motibonan.
E prome tres simannan a caduca dia 28 di mei ultimo y te dia di awe Raiz solamente a ricibi reaccion di minister Otmar Oduber, pero no di minister Ruiz-Maduro y minister Dangui Oduber. E unico documentonan cu a wordo transferi ta e documentonan cu minister Otmar Oduber tabata tin den su posesion cu a wordo entrega pa e desaroyado di e proyecto, segun Raiz.
Verbalmente e minister en cuestion a aclaria cu ‘e no tin ningun otro documento den su poder’.
Directie Natuur en Milieu (DNM) a duna di conoce cu ‘sigur un conseho a wordo emiti pa loke ta trata e proyecto di Isla di Oro’.
Kico ta un peticion di LOB?
E Landsverordening Openbaarheid van Bestuur a drenta na vigor na 1999 y ta obliga e gobierno di Aruba pa facilita informacion encuanto nan maneho, den caso cu un ciudadano ta rekeri esaki.
Por medio di un peticion di LOB un ciudadano por pidi disposicion (inspeccion) di documentonan manera: permisonan; conseho referiendo na un decision; un cambio di destinacion di erfpacht; rapportnan publico implementa na beneficio di e gobierno.
Den e Landsverordeningopenbaarheid van bestuur capitulo3 Art.7 ta indica exactamente cua consehonan mester wordo haci publico.
Kico ta e ROP?
Ruimtelijk Ontwikkelingsplan Aruba (ROP) ta un plan di maneho integral di gobierno cu ta indica e desaroyonan mas desea pa loke ta trata e teritorionan di Aruba.
Esaki a wordo determina den Landsbesluit di 7 di mei di 2009, number 7, e comunicado ta finalisa bisando.
