Diaranson ultimo, lider di partido RAIZ, Ursell Arends como tambe Raymond Kamperveen, compaña pa e miembro di mas nobo di e movemento, Giovanni Jacobs, a haci entrega di e conteo oficial di cantidad di firma colecta pa stop e construccion descontrola di mas hotel y condominio na presidente di parlamento, sr. J. Thijsen.

Dia 30 di september ultimo, RAIZ a haci un yamada pa pueblo firma un peticion pa asina sostene e introduccion di un moratorio riba hotel, timeshare y condominio nobo. E firmantenan di e peticion aki ta haci un yamada urgente na Gobernador, gobierno y parlamento di Aruba pa:

  • Introduci un moratorio inmediatamente riba hotel, timeshare y condominio;
  • Implementa, manera recomenda pa nos institutonan di turismo, un politica di turismo ‘high value low impact’ por medio di un ley;
  • Regula, controla y limita e cantidad di actividadnan turistico (deporte acuatico, huurmento di UTV’s, waterparks, restaurant etc.)

 

Te cu diaranson dia 12 di december ultimo, un cantidad considerabel di nos pueblo -sumando un total di 7347 persona- a firma e peticion pa introduccion di moratorio segun declaracion di notario Rodriguez-Taekema.

Pa ricibi respet di pueblo, mester duna pueblo respet. RAIZ a priminti comunidad di Aruba  y awor e ta cumpli tambe. “Nos por wak patras y encontra un aña unda RAIZ tabata basta activo, a pesar di ta un partido politico pafo di parlamento,” segun lider di e movemento, Arends. “Pueblo por ta trankil, paso RAIZ ta un partido luchado cu lo sigui opera sea dilanti of patras di e cortina, semper na beneficio di nos hendenan, di nos isla, prome cu tur cos.”

Recientemente por a tuma nota cu nos minister di desaroyo teritorial, infrastructura y medio ambiente a tuma e decision pa introduci un ‘voorbereidingsbesluit’ riba e ROP, cual tambe ta encera moratorio riba hotel. RAIZ ta aplaudi e decision aki, y ta spera cu di berdad un moratorio riba hotel ta parti di e ROP nobo, anto uno cu lo funciona debidamente y cu no wordo debilita pa excepcionnan politico, manera e caso di p.e. St. Regis hotel. Si gobierno di Aruba kier introduci un moratorio riba hotel, e ora e mester pone pia abou pa esaki realmente sosode, sin basila y sin ningun excepcion.