RAiZ a studia e pakete di documento cu a wordo haci publico 2 siman pasa encuanto e entidad nobo cu Hulanda ta exigi como condicion den nan oferta pa sosten financiero pa Aruba.
E entidad aki na prome instante a wordo yama CHE, pero e nomber corecto ta OHHA.
Despues di a repasa e documentonan RAiZ a entrega un lista cu 28 pregunta na Secretario di Estado Sr. Knops. Di nos banda nos tin tur comprension pa cu e iniciativa aki di Hulanda y nos por compronde tambe cu nan kier traha via un entidad manera OHHA. Pero alaves nos a constata cu tin varios asuntonan cu falta claridad y cu no a wordo regla den e documentonan.
P’esey a acerca Gobierno di Hulanda directamente pasobra e oferta a bin di nan banda, pues nan ta prome yama pa splica ta kico e oferta realmente ta. Den nos preguntanan nos no ta referi na e tema di autonomia. Mas bien nos kier compronde kico e oferta di Hulanda ta y con OHHA lo funciona.
Por ehempel, den e documentonan no ta describi cuanto placa Hulanda lo pone disponibel pa asistencia y tampoco ta bisa pa cuanto tempo e asistencia lo por keda disponibel. E documentonan ta brinda ningun garantia cu p.e. Fase y Loonsubsidie lo por sigui den 2021.
OHHA lo traha na restructura y yuda empuha economia di Aruba. Esaki ta hopi necesario. Di otro banda CAFT a declara cu Aruba mester 28.000 emigrante pa yega na crecemento economico di 2,4%. E forma mas rapido pa stimula economia ta door di traha mas hotel, siendo cu e pueblo di Aruba ya a bisa ta basta. Nos kier tende kico lo ta e posicion di OHHA den esaki.
Esaki ta algun di e temanan cu nos ta toca den nos preguntanan na Sr.Knops. RAIZ kier evita cu nos preguntanan bira parti di e polemica actual y causa tardansa den e asistencia. P’esey nos a opta pa no publica nan ainda. Asina cu nos haya contesta riba nan y cu nos ta sigur cu nos a compronde Hulanda bon, e ora nos lo comparti tur informacion debidamente.
