Turismo sostenibel ta un cu tin na cuenta e consecuencianan actual y den futuro, economico, social y di medio ambiente, pa satisface e necesidadnan di industria, entorno y comunidadnan anfitrion. Pa e motibo aki, partido Raiz Aruba ta organisa e simposio ‘The Road to Sustainable Tourism’, pa asina demostra cu Aruba ta na tempo pa transforma turismo masivo den turismo sostenibel y responsabel.

Durante un entrevista cu Bon Dia Aruba a haci cu Ursell Arends, representante di partido Raiz Aruba, el a splica cu dia 14 di juni proximo lo tuma luga e simposio ‘The Road to Sustainable Tourism’ na Cas di Cultura, di 7or te 10or di anochi. El a bisa cu despues cu e partido a ser funda dia 9 di juni 2017, un di e metanan di nan statuut ta pa duna bek na e pueblo, pa asina nan lo ta educa y prepara, pa ora di vota tin e curashi di escogencia adecua, door cu ta kere den dje.

Arends a comenta cu nan ta organisando e simposio aki pa nan por crea un debate riba un plataforma nacional, caminda cu comunidad por haya informacion y tambe dicidi na unda lo kier bay cu e isla Aruba. Ya caba for di aña 2004 tabata existi algun reporte pa crea un cuadro di turismo sostenibel na Aruba, pero manera el a sigura, ‘mayoria di biaha e tipo di recomendacionnan aki no a wordo sigui’.

Di mesun manera el a papia cu e pais ta satura y a surpasa e capacidad di camber, segun tur e reporte traha, y p’esey nan kier stimula e debate riba un plataforma nacional, caminda cu despues di e simposio, comunidad por duna opinion na unda nos kier hiba nos isla Aruba.

E personanan cu ta bay participa como speaker den e simposio ta Caroll Croes-Guiamo, profesional den materia aki; Ewald Biemans, propietario di Tara Bucuti Hotel Aruba, cual ta e hotel mas sostenibel na mundo cu certificacion internacional desde añanan pasa; Dr. James Hepple, cu den pasado tabata CEO di Ahata; y dos speaker internacional, cu ta Dr. Sam Cole y Dr. Victoria Razak, kende nan desde aña 2004 a traha e marco di turismo sostenibel pa e gobierno di Aruba e temponan ey, y na 2009 nan a haci update riba e reporte.

Asina mes el a expresa cu Cole y Razak a traha desde aña 1981 cu libertador Betico Croes pa crea un modelo economico, ora Aruba a drenta den su status aparte.

Di igual forma, Arends a sigura cu tur reporte den ultimo aña ta bisa cu Aruba no por sigui bay den direccion di turismo di volumen, pa motibo cu e isla no por carga e problema ey, y esey ta loke nan kier stimula cu combersacion y debate, pa asina por dicidi e futuro di e isla.

No obstante, el a declara cu Aruba no necesariamente ta den bon caminda di turismo sostenibel, pero igualmente, nan lo kier stimula pa bay den caminda ey, mirando cu kisas e vision actual ta pa haci Aruba e isla di Caribe mas bishita, y esey no ta cuadra cu e vision cu nan tin. “Mi ta sigur cu hopi di e instancianan y institutonan di turismo tin esey como vision”, Arends a manifesta.

Tambe el a menciona cu na aña 2004, ora Cole y Razak, den marco di turismo sostenibel na Aruba, a conseha den e tempo ey e minister di Turismo pa e pais no pasa e cantidad di 12.000 camber den proximo 40 pa 50 aña. Pero 15 aña despues, aworaki e cifra a surpasa e cantidad ey, y cu tur su consecuencianan tambe. Ainda e pais por sostene e cantidad ey, pero hopi hende mester emigra pa traha den e sector turistico, y esey ta trece problema. Ora e comunidad ta crece asina grandi ta causa retonan social. En bes di sigui traha mas camber di hotel y haci e problema mas grandi, ta bon pa para keto y drecha loke tin awor, pasobra loke nan ta haciendo ta pa e futuro generacion di un isla cu no ta sostenibel, y no por tin trankilidad di un calidad di bida bon pa e propio ciudadano. “Ta dificil pa nos por brinda pa e turista un servicio di calidad y un ‘happy experience’”, Arends a afirma.

Di loke ta trata e proyecto di construccion di un hotel na Sero Colorado, el a splica cu comunidad kier desaroya San Nicolas manera mester ta. “Raiz no ta contra desaroyo, pero esey lo mester bay di manera sostenibel y bon.” Tur hende por ripara tur e foutnan cu a wordo cometi na Palm Beach y Eagle Beach, pa evita di comete esey na San Nicolas, pa asina desaroya un ‘Sustainable Caribbean Town’ caminda comunidad por saca e maximo beneficio di esey, el a finalisa.