Dia 2 di november, Nacionnan Uni (ONU) ta observa e Dia Internacional pa caba cu Impunidad pa Crimen contra Periodistanan.

Background
 Asamblea General di Nacionnan Uni a proclama dia 2 di november como ‘Dia Internacional pa caba cu Impunidad pa Crimen contra Periodistanan’, den resolucion di Asamblea General A/RES/68/163.

E resolucion a urgi Estadonan Miembro implementa medidanan definitivo combatiendo e cultura actual di impunidad. E fecha a ser scogi den conmemoracion di dos periodista Frances na Mali dia 2 di november 2013. E resolucion aki ta condena tur atake y violencia contra periodista y trahadonan di medionan di comunicacion. Tambe ta urgi Estadonan Miembro pa haci lo mas posibel pa preveni violencia contra periodista y trahadonan di medionan di comunicacion, sigura responsabilidad, trece na husticia esnan cu comete violencia contra periodista y trahadonan den medionan di comunicacion, y sigura cu victimanan tin acceso na remedinan apropia. Ademas ta pidi Estadonan promove un ambiente sigur y permisivo pa periodistanan eherce nan trabao independientemente y sin interferencia no debido.

Mensahe di Secretario General di ONU, Antonio Guterres

“Riba e Dia Internacional pa caba cu Impunidad pa Crimen contra Periodistanan e aña aki, mundo, incluyendo medionan di comunicacion, ta enfrentando un reto completamente nobo: Covid-19.

Proyecto Paradigma
E pandemia a resalta e peligernan nobo pa periodista- y trahadonan di medionan di comunicacion, hasta mientras e cantidad di atake riba nan seguridad fisico a aumenta. Tabatin al menos 21 atake riba periodistanan cubriendo protestanan den e prome mita di 2020 – igual na e cantidad di atakenan asina durante henter 2017. Tambe tin limitacionnan adicional riba e trabao di periodistanan, incluyendo e menasa di enhuiciamento, aresto, encarcelacion, negacion di acceso periodistico, y fayo di investiga y enhuicia crimennan contra nan. Na momento cu periodistanan ta bira un obhetivo, sociedadnan den su totalidad ta paga un prijs. Si nos no protege periodistanan, nos habilidad di permanece informa y tuma decisionnan basa riba evidencia ta afecta severamente. Na momento cu periodistanan no por haci nan trabao di forma sigur, nos ta perde un defensa importante contra e pandemia di desinformacion cu ta plamando online.
Noticia y analisis basa riba hechonan ta depende riba e proteccion y seguridad di periodistanan ehecutando reportahe independiente, basa riba e principio fundamental: ‘periodismo sin miedo ni fabor’.

Mientras mundo ta lucha contra pandemia di Covid-19, mi ta reitera mi yamado pa un prensa libre cu por ehecuta su rol esencial den paz, husticia, desaroyo sostenibel y derechonan humano.”

Nota special pa Aruba

Dia 23 di december 2010, presentador di programa di television y periodista investigativo Johnny ‘Poentje’ Castro a ser asesina cu dos tiro den e cura di su cas na Aruba.

Considerando e hecho cu un miembro di prensa a ser asesina, un team special di investigacion criminal (TGO, Team Grootschalig Onderzoek) a wordo crea, y Instituto Forensico Hulandes a wordo involucra pa examina varios articulo, incluyendo e celular di e victima.

Poentje Castro tabata un persona bon conoci den comunidad pa motibo di su programa di television ‘Un Dia den Bida’, den cual e tabata entrevista of documenta hende di tur caminda di bida kende tabatin un storia interesante pa conta. Castro a gana fama y notoriedad, fama pa motibo di su habilidad pa documenta asuntonan controversial, incluyendo un documental riba bida di un detenido Arubiano den prison controla pa e prisoneronan den estado di Falcon, Venezuela, basa completamente riba yamadanan telefonico secreto graba.

Castro tambe tabata involucra den un asunto controversial cu nunca a wordo clarifica completamente pa autoridadnan, involucrando su posesion di un laptop, obteni di un musico local popular, cual segun reportenan tabata contene material di pornografia infantil.

Castro tambe tabata conoci cu reporteronan Hulandes kende a cubri e caso di Natalle Holloway y Joran van der Sloot, y a logra graba combersacionnan secreto cu supuesto persona di interes of fuentenan cu supuesto informacion tocante participacion di Joran van der Sloot den desaparicion di Natalee Holloway.

Na 2013, Ministerio Publico (OM) na Aruba a admiti di no tin pista concreto, of persona di interes, of posibel sospechoso ainda den caso di asesinato di Poentje Castro.

Na 2015, un homber local, Francis Dijkhoff a acusa ex- minister di Turismo, Otmar Oduber di ta directamente involucra den asesinato di Poentje Castro, dunando detaye di varios motibo posibel, e mas obvio siendo ring di droga operando na conciertonan musical y festivalnan electrico na Aruba, y traficacion di droga asocia a traves di containernan for di y pa Aruba.

A forsa Dijkhoff pa retracta tur acusacion contra Oduber den un caso di corte pa difamacion inicia pa Otmar Oduber., Segun OM e caso ta keda habri, pero te awo sin progreso desde 2015, y no a revela informacion adicional desde 2015.

E caso aki ta altamente controversial, pasobra den combersacionnan cu Rainbow Warriors Core Foundation sosteni cu varios periodista local, hopi tabata duda di discuti e caso di forma abierto y candido, insinuando cu tin un posibel encubrimiento y proteccion di personanan di perfil halto for di investigacion criminal na man di e mesun OM bao presion politico.

Mientras consenso publico ta cu a mata Castro pa sea motibonan personal of berdaderamente conocemento di actividadnan di crimen organisa relaciona cu traficacion di droga, e hecho ta cu Castro tambe tabatin conocemento di pornografia infantil y posiblemente ring di pedofiel na Aruba.

Na Hulanda, e notable caso Demmink involucrando oficialnan di husticia di alto rango acusa di actividadnan pedofiel, den un periodo desde 1997 te cu alrededor di 2014, ta skirbi manera e storia di Hollywood di e banda scur di sociedad y e elite rico y politico mara den un mundo di intriga, abuso sexual di menornan, tactica di intimidacion politico, y sobre todo, encubrimiento.

Psicologo Rita Zecher Enahoro, kende a traha na OM na Aruba riba casonan di abuso sexual di menornan, den su buki ‘Boa. Aruba in de wurggreep’ ta duna un bista mahos y captivante di su hallazgonan tocante abuso sexual di menornan, y particularmente ta detaya un imagen decepcionante di e poder di e ringnan pedofiel poderoso na Aruba, ‘cu ta controla e Hudicial’.

E caso di Jeffrey Epstein, cual supuestamente tambe ta involucra ring di pedofiel opera den varios islanan bon-conoci pero no nombra, y e revelacionnan di Zecher Enahoro, ta insinua otro motibonan posibel pa silencia Castro.

E hecho ta cu e caso ta keda sin resolve te awo, sin urgencia pa resolve e asesinato aki dies aña despues cu a comete e crimen.