E isla di Aruba ta birando un ‘estado fracasa’, no pa motibo di mal gobernacion, sino pa motibo di e collapse di accion di actornan di sociedad civil cu normalmente ta duna checks and balances den e funcionamento di democracia.

E pandemia di Covid-19 a ‘condiciona’ actornan di sociedad civil, manera sindicato, pa acepta lockdown, toque de queda, restriccion di derechonan humano y civil, y un cantidad di violacion na derechonan laboral. Libertad di expresion a bira condiciona y problemanan di salud, chikito y grandi, a ser tapa.

E pandemia di Covid-19 a termina, y a elimina tur restriccion riba derechonan humano y civil. Pero violacionnan grave di derecho laboral, derecho di consumidor, derecho civil y tratadonan internacional a permanece, y loke ta pio, e actornan cu lo mester ta denunciando esakinan a keda den un total silencio.

Casi binti sindicato en total, lidernan religioso di Iglesia Catolico, varios denominacion Protestant y decenas di iglesia Evangelico ta keda keto riba e pobresa rampante, violacion di derecho di mucha variando desde violencia domestico, abuso sexual, termento, marginalisacion social y aumento den obstaculo financiero pa haya acceso na e sistema di educacion publico cu supuestamente ta gratis y habri.

E crisis plan nacional, riba cual a gasta decenas di miyones sin supervision adecua y sin responsabilisacion despues, a yena e saco di cantidad di fundacion pero sin mehoracionnan notable y midible.

E hecho cu un fluho stabil di migrante y refugiado Venezolano desplasa ta poniendo peso riba nos infrastructura di safety net social te na su limite ta parce di no ta un preocupacion pa actornan di sociedad civil cu mester tin e bienestar financiero y social di tur ciudadano y habitante di Aruba na pecho.

Na lugar di esey, a delega y relega tur asunto di derecho humano na HIAS, PADF, IOM y Amnesty International, cu awo den violacion di reglanan crea pa participacion di stakeholder, ta lagando un banda actornan di sociedad civil, y efectivamente ta “run the show.”

Gobierno di Aruba y gobierno di Hulanda, den nan pleitamento tocante supervision financiero te 2027, ta reteniendo documentonan riba e negociacion- y acuerdonan hasta for di nos cuerpo legislativo nacional, Parlamento.

Den termino di desaroyo sostenible, e indiferencia evidente pa cumplimento cu legislacion local y tratadonan internacional for di Departamento di Naturalesa, DIP, y DOW a permiti un desaroyo descontrola di resort pa turismo masivo, cual ta liga cu fraude, corupcion y labamento di placa y compaña pa traficacion humano, cheap labor y hasta practicanan di sclavitud moderno.

Conservacion di biodiversidad y proteccion ambiental ta solamente den nomber, y comunicadonan di prensa periodico di agencianan di gobierno mustrando preocupacion pa problemanan y ‘stressors’ ambiental y degradacion di biodiversidad ta solamente sirbi proposito di ‘greenwashing’ [red: e practica di pone algo mustra manera bon pa medio ambiente sin cu esaki ta e caso.]

Sociedad civil na Aruba a keda den silencio, y hunto cune a silencia e voz di democracia.

No tin ningun cantidad di lamento for di partidonan den oposicion, comunicado ni conferencia di prensa,c u lo substitui pa e silencio total di sociedad civil en su totalidad.

E hecho cu a introduci un regimen nobo di impuesto, BBO na Frontera, den cual ta impone turnover tax riba productonan importa, pero na mes momento cu e reduccion di tarifa di impuesto riba 660 producto no a stop centenares di tienda, supermercado y shop di aumenta prijs pa consumidor cu porcentahenan hopi mas halto cu e 7 porciento combina di tarifa di BBO/BAZV/BAVP.

Niun fluister for di sindicatonan, organisacionnan di consumidor, y ni sikiera ‘carta na redaccion’ den corantnan.

Loke ta conduci na e hinca di daga final contra nos democracia, e maneho actual di libertad di prensa y expresion na Aruba, unda un intercambio rabia entre minister di Husticia y un representante di prensa local, conoci pa su estilo bruto y confrontacional, y hopi biaha un forma curu di expresa su opinion, a resulta den Ministerio Publico emitiendo un comunicado di prensa cu ta un menasa mal scondi contra miembronan di prensa, declarando cu tin “limite riba libertad di prensa y di expresion.”

Y e hecho cu un persona cu abiertamente riba rednan social a boluntaria pa silencia dos representante di prensa “si e prijs ta corecto” a keda deteni ta mustra cu nos ta den punto di inflexion.

For di akinan bay dilanti nos ta cay den caos, scuridad, desorden y anarkia, y de facto ta converti den e Haiti Nobo.

A menos cu sociedad civil bin back na bida.

Loke ta pasando na Aruba a yega di pasa hopi biaha prome, den otro era y otro pais, cuminsando cu un Alemania humilia despues di Segundo Guera Mundial, na Italia, etc.

Nos status quo actual ta hopi preocupante, peligroso, y e tela di sociedad ta kibrando.

Nos ta birando un estado di polis, y den caso cu bo no tabata sa, e mil camaranan ey instala cu inteligencia artificial pa “patruyahe preventivo” ta un señal riba muraya cu rapidamente nos ta convertiendo den un copia di e Republica Popular di China.

Nos ta convertiendo rapidamente den un pais cu un gobierno estilo comunista, intolerante di libertad democratico y cu ta considera su ciudadanonan pa ta suheto di gobernacion duro y kita di su libertadnan civil y derechonan humano, y pa obedece of enfrenta represalia y castigo.

Y historia a mustra nos cu den temponan asina di peligro, lidernan populista cu un indiferencia total pa estado di derecho y democracia, ta bin dilanti. Trump, Chavez Frias y Bolsonaro ta apenas algun di e ehempelnan recien cu cual nos tur ta conoci.

Y mira awo, un a aparece na Aruba, Otmar Oduber.
Como un organisacion internacional di derechonan humano fungiendo tambe como organisacion di desaroyo sostenible, registra cu Nacionnan Uni, nos ta tene sindicatonan y organisacionnan di sociedad civil responsable pa keda keto y den lo haci esaki door di reporta na ILO, OHCHR, UNDESA y cantidad di otro cuerpo di Nacionnan Uni y Union Europeo.

Dia 1 di september proximo ta celebra Dia Nacional di Prensa, pero no tin hopi pa celebra, pasobra prensa ta bao asedio, pasobra su aliadonan natural den sociedad civil a keda den silencio.

Nota di redaccion:
E articulo aki ta un opinion di Rainbow Warriors Core Foundation. E contenido publica di ningun manera ta refleha opinion di Bon Dia Aruba y ta pa responsabilidad exclusivo di e organisacion/individuo cu ta ofrece esaki pa publicacion.