Gobierno di Aruba y gobierno Hulandes a yega na consenso encuanto e proyecto di ley di Reino pa crea supervision financiero di Reino riba finanzas publico na Aruba. Esey ta bon noticia, pero falta un otro obstaculo pa vence. Esey ta e ley di Reino pa crea e organismo di control y supervision pa e programa di reforma cu mester bira realidad den e proximo añanan na e islanan Aruba, Corsou y Sint Maarten. Mientras e ley di supervision financiero tabata e parti facil – Corsou y Sint Maarten tin supervision caba bao di un ley di Reino – e ley di institucion di COHO ta parce di bira un problema grandi. Ta conoci caba cu gobierno di Corsou y Sint Maarten ta opone introduccion fuertemente, y como cu ta trata di un asina yama ley di consenso esaki, si acaso e bira realidad, lo no ta algo cu lo sucede a corto plazo.

Claro cu opone e ley cu palabra ta parce facil, sin embargo tur gobierno insular cu kier enfrenta Hulanda den e asunto aki, tin un factor poderoso contra nan: tempo, y esaki combina cu e situacion precario cu nan ta aden. Mientras Aruba a scoge pa yega na acuerdo, habriendo e porta tambe pa prestamo pa sigura refinanciamento di e prestamonan cu ta madura e aña aki y na 2022, ta parce cu na e otro islanan, bao presion tambe di nan base social, esnan den gobierno ta scoge pa un ruta mas beligerante. E pregunta ta unda esey ta bay hiba henter e asunto. Pa Aruba esaki por parce faborable, den e sentido cu tin un acuerdo riba tereno financiero, mientras e comportamento di e otro islanan lo trece tardanza den implementacion di e programa di COHO. Dificil pa imagina cu gobierno di Aruba lo ta lamenta e tardanza aki.

Di otro banda, posposicion di e medidanan cu mester tuma por trece alivio momentaneo na nivel politico, pero no ta yuda pa mehora e situacion financiero. Por parce mas facil di no mester anuncia medida, por ehemplo entrante 1 di januari 2022, pero di otro banda actividad economico na e momento aki, aunke ta mira mehoracion leve, tampoco ta di tal indole cu esaki ta resulta den hopi mihor entrada pa gobierno, loke por crea un poco espacio extra. Manera indica den un articulo den e edicion aki, nos por mira un mehoracion leve den nos economia, pero esey tabata net promer cu e crisis di Covid a bolbe hinca nos den un lugar unda nos no ta desea di ta. Ta di spera cu bayendo fin di aña 2021 nos por mira mas actividad economico, aunke esey lo ta sin estimulo gubernamental, ya cu formacion di gobierno ta tarda y eventual anuncio di medida di estimulo economico lo no ta visible pa e aña aki mas.

Ademas, no pa promer biaha y no pa ultimo tampoco, a cay un silencio profundo encuanto e posibilidad di otro actividad economico, cu no ta extension o diversificacion dentro di sector turistico mes. Gobierno ni posible inversionista ta papiando di refineria, LNG pa WEB y pa establece un centro di distribucion di LNG pa region na Aruba, ni di produccion di cannabis, ni di otro sector ‘prometedor’, ni nada. E unico cos cu tur hende ta contempla actualmente ta e posible recuperacion di turismo, unavez nos vence e actual problema causa pa e regreso di Covid. Lo ta incorecto si pa yega na e conclusion cu nos ta saca algun alegria o satisfaccion di e situacion aki. Nos no tin tempo pa perde cu un actitud di ‘told you so’. Loke si ta keda e realidad di tamaño gigante nos dilanti ta cu nos no por conta sin mas cu aumento di entrada pa gobierno di un economia cu ta haci un comeback, y hasta mas cu esey. Nos lo mester lidia dentro di e posibilidadnan cu tin, y esey ta significa cu mester ta prepara pa dal stap atras envez di dilanti, por lo pronto. Esaki no ta bon noticia pa esnan cu ainda ta sin empleo y entrada, pero tampoco pa esnan cu a logra beneficia di e subsidio di salario cu a preveni un catastrofe economico mas grandi. E incertidumbre grandi lo ta, ora cu no tin subsidio mas, kico e efecto lo ta riba empleo. Lo tin empresa cu mester adapta nan payroll na e realidad di loke nan por paga, sin subsidio? Mester comprende bon si cu aki nos no ta boga pa mantene un subsidio indefinidamente, loke ademas lo no sucede. Pero, ta keda e pregunta si cuanto empresa ta operando den un situacion cu di cierto manera ta ‘artificial’ ya cu e payroll cu subsidio no ta coresponde cu nan nivel di benta total. Desaparicion di e subsidio por tin – talvez momentaneamente – un efecto negativo riba e empresanan cu te na ultimo lo ta haya subsidio. E problema aki lo mester haya su maneho, no solucion, cu e introduccion di un sistema di beneficio pa desempleo, cu den futuro ta ser paga pa empleado y empresa. Esaki ta exigi cambio legisativo grandi di cual nos no a mira nada ainda. Tardanza den inicia e reformanan lo tarda esaki tambe. Y, mientras tanto, ta sinta warda Hulanda caba di hiba e bataya cu e islanan?