Radisson all over again?

Un situacion cu a causa conflicto grandi den partido AVP, y cu a duna inicio na e proceso di decadencia cu a hiba na e derota aplastante di 2001, tabata e scandal di renobacion di Radisson hotel. A viola tur tipo di regla di administracion financiero drechi, den preparacion y ehecucion di e proyecto. Finalmente, e asunto di renobacion a costa mas cu traha un edificio completamente nobo. Tabatin hasta intento na nivel di gabinete pa stroba empleadonan publico di haci nan trabao, entre nan e actual lider di partido MEP, cu e tempo ey tabata inspector di impuesto. El a para firme pa laga e funcionarionan publico haci nan trabao. Dia e inspeccion a tuma luga, polis no tabatin man suficiente pa gara ilegal cu tabata core bay tur banda. Como danki, e fiscal Hulandes cu a dirigi e accion a ser manda Hulanda un poco tempo despues.

Banda di tur e detayenan cu a sali tocante e diferente formanan di fraude cu lo a tuma luga, tabatin e problema tambe di e exclusion di e contratistanan local, cu tabatin e capacidad pa tuma e renobacion na nan encargo y hasta algun di nan tabatin bon conexion cu e partido en cuestion. Asina mes nan a keda exclui, pero e scandal a bira un di e clabonan na e caha di morto di e gabinete AVP/OLA, den eleccion di 2001. Historia ta ripiti awor? Diabierna awa a pasa hariña aparentemente pa e doñonan di truck y material pisa, cu tabata bao di e impresion cu nan lo ta envolvi den e proyecto cu ta den man di e compania Portugues Mota Engil.

Ta parce cu den e caso aki tin, no pa prome biaha, acuerdo entre gobierno y contratista cu e ultimo aki ta haya man liber pa organisa e trabao manera nan ta haya ta bon, cu importacion di material y posiblemente personal tambe. Ayo atrobe, na e promesanan haci na e trahado y contratistanan local. Y nos no ta kere cu ta trata aki di caso incidental. Nos por corda tur e confusion relaciona cu e compania Venezolano cu a gana e bid pa construccion di e Linear Park. Nan no a caba e proyecto y a keda debe impuesto y prima social na caha di gobierno. Esey no ta tur. Na dos ocasion tabatin problema cu empleo di trahado local den renobacion di hotelnan cu e cadena Riu a adkiri. Esaki ta djis parti di e lista cu por traha den e sentido aki. Proximamente ta bay tin e rehabilitacion di e refineria, unda si tur cos bay bon, segun gobierno ta bisa, trahadonan local lo haya prioridad. Ban spera cu ta berdad. Di otro banda, nos tin varios luna di no tende nada mas di e ‘Citgo-desk’ cu gobierno a institui, mucho menos con ta para te awor cu empleo di trahado local.

Haciendo un ‘side step’ cu un asunto cu ta relaciona cu e refineria, nos ta desea di comenta riba un noticia cu ta circula den e dianan aki, den cual supuestamente un articulo di Oil & Gas Journal ta haci referencia na stop di e proyecto di e refineria pa Citgo, pa motibo di investigacion cu lo ta tumando luga encuanto labamento di placa via Aruba, den cual dos ministro di Aruba lo ta envolvi. E articulo pa varios motibo tabata mustra sospechoso y  asina leu cu nos a averigua, no ta sali  di e fuente informativo menciona. E pregunta cu ta surgi ta kico e personanan cu ta manda e tipo di informacion eroneo, ta pretende di logra. Cu cierto parti di prensa lo duna credibilidad na e tipo di ‘fake news’ aki? Di parti di nos redaccion nos por bisa cu e realidad di tur dia caba ta suficiente interesante y tin ora hasta fascinante, cu e tipo di intento pa bruha tera, di cualkier banda cu e por ta bin, no ta haci falta. Cu un ministro ya den estado di sospechoso principal, y otro na caminda, nos no ta descarta cu por tin mas caso di corupcion, pero cu nos lo analisa ora cos yega asina leu, no prome.

Y pa regresa na nos tema principal, nos mester observa cu varios incidente cu ta mustra riba maneho deficiente o incorecto di e gobierno aki a cuminsa sali na superficie. Miles di usuario di smartphone sin conexion, ausencia den e debate e siman cu a pasa, problema den cuerpo policial cu falta hende y material, menasa na frontera pa ciudadano cu debe belasting den pleno periodo di vacacion… y awor tambe pleito cu e grupo di propietario di ekipo pisa. Tur esaki ta puro casualidad? No ta cosnan cu ta na fabor di un gobierno den campaña, al contrario. Nos ta custumbra di mira un gobierno haci tur cos den campaña pa complace e votado, no loke nos ta mira awor. Asina sigur di gana nan ta cu nan por ‘afford’ tur esaki? E uniconan cu no ta keha, ta e empleado publico, cu lo por conta cu gobierno ta cumpli ‘al pie de la letra’ cu loke a acorda pa cu indexering.