Mañan diasabra ta bay tin un radiothon organisa pa Fundacion Mi Voz Ta Bo Voz pa asina por recauda fondonan pa 400 mucha por haya nan articulo escolar y bay back na scol e aña aki.

Asina e fundacion a informa ayera mediante un conferencia di prensa na unda tabatin como invitado Tarrick Ras ken ta locutor di un radio conoci y su persona hunto cu Zyon Yanez, Bryan D, Jeremy Wever, Antron Franken y Lyonel Dirksz mañan diasabra for di 12 di merdia te cu 6or di atardi ta bay ta esnan cu ta bay haci e actividad aki denomina como Adopt a Child for Back to School Radiothon 2023 conhuntamente cu e fundacion.

Aña escolar 2023 ta den porta, specificamente dia 17 di augustus tur mucha na Aruba ta bay back na scol, pero ta importante pa menciona cu no tur mucha tin nan mesun posibilidad ya cu algun mayornan no ta posee e recursonan pa cubri cu e gastonan cu esaki ta encera.

Tas, uniforme, keds, agenda, pen, entre otro, ta cosnan hopi esencial na ora un mucha ta bay scol y pa e motibo aki, nan ta organisando Adopt a Child for Back to School Radiothon 2023 pa asina purba di yuda 400 mucha cu mayornan ta pasando den momentonan dificil pa loke trata finanzas y asina e mucha por bay scol back.

Den actividad aki ta bay tin hendenan boluntario recolentando placa cu nan money box y ta bay ta ubica na Centro di Bario Tanki Leedert, na Santa Cruz dilanti di restaurant Amistad y na parkinglot di Wema na Ponton. Igualmente a señala cu esnan cu kier participa como boluntario ta bonbini y por comunica cu nan na e number di telefon 562.9820 y 699.4842.

Pa esnan interesa di haci un donacion tambe tin e number di cuenta CMB #65023206.

Ta cinco radio esun cu ta bay participa den esaki como X FM, MAS FM, Canal 90 FM, Cool FM y Power FM for di 12 di merdia te cu 6or di atardi ta bay coopera pa asina por yuda e muchanan aki.

Tocante e proyecto aki “Adopt a Child for Back to School” Fundacion Mi Voz Ta Bo Voz su presidente Lisette Gomes mediante un conferencia di prensa di 11 di juli ultimo a informa tocante nan otro proyecto e cual ta trata di yuda mas mucha cu ta posibel pa nan haya loke nan tin mester pa bay scol back, aña pasa nan a logra yuda 250 mucha cu uniforme di scol, keds, underwear, tas cu tur producto den dje.

Pa personanan interesa di adopta un mucha, e tin un costo di 175 florin y nan lo ricibi tur loke a menciona caba por yama na e number di telefon menciona anteriomente of tambe via nan Facebook page.

Ademas, el a bisa cu den nan plannan como fundacion nan kier pa bin cu lease cu tin di haber cu finanzas, con pa handle placa, con pa sali dilanti y duna hende e push cu nan mester, cu esey nan kier acerca comunidad di Aruba, comerciantenan y tur persona cu kier yuda nan mirando cu schoolgeld tambe a subi e aña aki y ta haci un tiki mas dificil e situacion financiero di e mayornan cu no tin 1 sino 3 of 4 yiu mirando cu en general cu ya caba e costo di bida na Aruba ta dificil y nan forma di yuda e aña aki ta e proyecto Back to School.

E meta segun Gomes ta nan por yuda entre 200 cu 250 mucha pero pa e motibo aki nan tambe a dicidi di haci e radiothon aki pa por yega 400 ya cu e situacion no ta facil, nan como fundacion nan kier sigui yuda algun mucha pa nan por haya un ‘fresh start’ y p’esey nan ta acerca comunidad di Aruba pa nan yuda cu e Back to School aki di aña 2023.

Tabata dia 25 di juli cu e fundacion a duna un update tocante e campaña di adopta un mucha y te dia ey nan a informa cu a logra adopta 50 mucha, loke ta nifica cu ainda comunidad di Aruba en general por participa acercando na e diferente localidad menciona caba pa asina pone un granito di arena y yuda e muchanan cu tin mas necesidad.