Despues cu e noticia cu for di dia 1 di januari 2024 cualkier compania of persona cu lo haci uso comercial di musica ta bay tin cu paga pa e derecho pa haci esaki, ayera directornan di algun radio na Aruba a reuni cu minister di Telecomunicacion Geoffrey Wever pa presenta nan obhecion pa e decision aki.

Mediante un comunicado di prensa di ayera diabierna, directornan di algun radio emisoranan di Aruba a informa cu nan a reuni cu minister di asuntonan di Telecomunicacion y Asuntonan Economico, Geoffrey Wever, pa nan presenta nan obhecion contra di e intencion di abogado David Kock y Ducapro/Buma Stemra di kier cobra radio emisoranan pa toca musica, e asina yama ‘royalties’ pa creadornan di musica.

Nan a splica cu nan a duna un splicacion na minister Wever cu desde introduccion di Internet, Youtube y tur otro medio musical y social, emisoranan a sufri golpinan masha duro den cantidad di audiencia y nan entrada. Pa hopi radio emisora, mas gasto di operacion kiermen sla mortal.

David Kock a laga sa cu e ta representa Ducapro y Buma Stemra di Hulanda kendenan lo ta esnan cu lo ricibi e entradanan cu lo ser cobra pa despues reparti pa e artistanan.

“Pero ta bon pa menciona cu unabes cuminsa cobra e radio emisoranan, tur otro negoshi cu ta toca musica pa anima of background music tambe mester bay paga, manera un café, bar, restaurant, DJ. nightclub y tambe na actividadnan deportivo of social. Nan lo mester haya licencia y paga Ducapro-Buma Stemra entrante 1 di Januari 2024.”

Asina mes nan ta declara cu “na un manera abrupto y cu hasta menasa di tuma pasonan na interes di e instancianan concerni a manda carta pa doñonan di radio. Gerentenan di emisoranan a pidi e minister di Telecomunicacion pa considera e argumentonan presenta durante di e reunion pa asina por interveni y yega na un solucion cu ta na bienestar di emisoranan y tur otro instancia cu ta usa musica na Aruba. Radio emisoranan ta respeta derechonan di autor y artistanan, sinembargo radionan ta di opinion cu esaki no ta e manera pa impone un gasto nobo pa e emisoranan of otro instancianan.”

Presente den e reunion cu minister tabata, Omar Steve Lejuez di Heart 106.7, Johny Habibe Hit 94 & 88.1, Aldrich Croes di Hits 100.9, Juan Carlos Sonri di Caliente 90.7, Farah Boekhoudt di Vybes 103.5 , Wouter Gesterkamp di 97.5 Easy FM, DJ Korsou pa 107.5 y Erin Croes di Magic 96.5 FM.

Dia 14 di november, DUCAPRO a informa cu esaki ta aplica pa cualkier instancia cu ta haci uso di musica di forma comercial, incluyendo radio, DJ, entre otro, segun organisacion pa licencia di musica den Caribe Hulandes, loke ta nifica cu for di dia 1 di januari proximo, ta bira ilegal pa reproduci musica di manera comercial sin tin un licencia di DUCAPRO.

Segun a informa, esaki ta conta pa tur musica, local y internacional, a traves di un acuerdo cu BUMA-STEMRA. BUMA y STEMRA ta dos organisacion priva na Hulanda, e Asociacion Buma y e Fundacion Stemra, cu ta opera como un solo compania cu ta actua como e sociedad Hulandes pa colecta pa compositor y publicador di musica.

Ta pidi e companianan pertinente pa registra boluntariamente pa adkiri un licencia comercial, unda cu lo mester paga un suma segun e tamaño y alcance di e compania. Si no cumpli cu e licencia, esaki por tin consecuencianan legal. E companianan cu ta cay aden ta cualkier cu ta usa musica di manera comercial, por ehemplo radio, DJ, pero tambe café, restaurant y gym.

DUCAPRO ta un fundacion cu ta busca e proteccion di derecho pa tur trabao musical protegi pa derecho di autor

Segun su website, DUCAPRO ta un fundacion cu ta busca e proteccion di derecho pa tur trabao musical protegi pa derecho di autor (copyright). Den conexion cu esaki, DUCAPRO ta licencia e uso publico y comunicacion di e repertorio di trabao musical protegi pa derecho di autor den Caribe Hulandes, y a traves di su acuerdo cu BUMA-STEMRA, internacionalmente tambe. DUCAPRO ta usa e informacion apropia tocante e trabao musical y su uso pa distribui regalia na su miembronan local y sociedadnan internacional afilia.

Un licencia di DUCAPRO ta duna negoshinan e libertad y flexibilidad pa usa virtualmente cualkier musica cu nan kier den nan negoshi of na nan evento publico, di manera legal, etico y facil. Sin DUCAPRO, manera ta indica riba nan website, negoshinan cu ta usa musica lo mester haya permiso y negocia regalia cu cada creador y publicador di musica di ken nan ta bay toca nan obra – un hazaña cu mayoria no tin tempo ni manera pa logra. Na lugar di esaki, DUCAPRO ta simplifica e proceso door di permiti usuarionan di musica pa paga un tarifa relativamente chikito cu ta distribui na creadornan di musica den Caribe Hulandes y rond mundo a traves di acuerdonan reciproco cu sociedadnan similar. Segun DUCAPRO, ta distribui e suma aki na e miembronan cu ta compositor, autor y publicador di musica, segun reglanan di distribucion poni pa DUCAPRO.

Reaccion di minister Geoffrey Wever

Minister Wever a reacciona riba e tema aki dia 20 di november bisando: “Mirando cu siman cu a pasa tabata tin hopi comunicacion y informacionnan mixto riba rednan social over di e fundacion DUCAPRO cu a anuncia cu entrante prome di januari 2024 lo mester cuminsa paga pa uso di musica licencia, como minister encarga cu tanto Bureau Intellectuele Eigendom, como comunicacion, mi kier a duna un prome reaccion.

“Ta asina cu musiconan por registra nan canticanan y asina nan canticanan no por wordo usa sin permiso of sin compensacion. E derecho aki na Aruba ta basa entre otro riba articulo 39 di Statuut y e Auteursverordening.

“Musiconan usualmente ta asocia nan mes na diferente organisacionnan rond di mundo cu ta representa nan y cu ta salvaguardia nan creencia y ta percura pa nan wordo paga ora cualkier organisacion usa nan derecho intelectual, manera un cantica. Tur e organisacionnan aki rond di mundo ta cera acuerdonan bilateral cu otro a base di cual nan ta cobra y distribui e compensacion pa uso di musica den un pais na e artista. DUCAPRO ta un organisacion asina na Aruba cu lo bay cobra pa e uso di derecho di autor, basicamente den nomber di e artista y percura pa reparti e entradanan na e artista concerni, pues esaki por bira un entrada importante pa e musiconan local, pero na mes momento lo forma un peso financiero adicional pa e radio emisoranan.

“Mester remarca cu e relacion ta un relacion entre e artista cu ta miembro di un organisacion cu ta representa e artista, e organisacion y tur otro organisacion similar rond di mundo. Esaki no ta un iniciativa di gobierno, ni tampoco ta algo cu Gobierno di Aruba por stop of mitiga, e ta un relacion completamente priva (privaatrechtelijk) y usual rond di mundo.

“A pesar di esaki, mi ta spera si cu DUCAPRO drenta den dialogo cu tur radio emisora pa splica detayadamente con nan lo opera pa asina e introduccion por bay na un forma structura y cu menos impacto negativo pa e radio emisoranan. Ami di mi banda tambe lo bay drenta den dialogo cu tanto DucaPro como e radio emisoranan. Mi a puntra tambe conseho riba e tema aki mirando cu ta algo nobo pa Aruba cu lo tin su impacto. Nos mester cuminsa awo cu bon informacion y dialogo y sigur wak con por mitiga cualkier impacto negativo.”