Un tipo di restriccion of prohibicion pa atende cu e problematica di e cachonan peligroso no ta un solucion efectivo, segun Veterinario Ricardo Contreras di Contreras Veterinary Services N.V. Dia 3 di december ultimo un caso cu a sosode na St. Maarten a conmove nos region. Un baby di apenas 7 luna a wordo ataca pa un American Bull dog, cu no a laga e baby bay ocasionando e criatura su morto.
Sr. Contreras kende tabata miembro di e plataforma cu a wordo lanta pa traha y yuda implementa e ley di cacho a declara na Bon Dia Aruba cu e ta haya cu e “racismo den ser humano ta mesun malo cu racismo den animalnan”.
E ta haya cu ta dificil pa midi e efecto di un medida asina, ya cu den paisnan cu a bin cu un tipo di restriccion riba e cachonan cu nan ta considera como peligroso manera e Pit Bull, no a duna mucho efectividad. Ya cu incluso den paisnan cu a wordo prohibi e presencia di Pit Bull, nan mes a yega di bin cu otro sorto di rasa di cacho eventualmente peligroso. Nan ta rasa cu pa seleccion natural no tabata un cacho violento , pero tin hende cu ta haci nan agresivo pa ya sea gamble den pelea di cacho, etc…
Cacho violento
Como recomendacion general, Veterinario Contreras no ta haya prudente pa muchanan tin contacto cu sorto di bestia manera Pit Bull. “Como recomendacion general ami hamas ta permiti cu un mucha mishi cu un cacho manso of aparentemente manso. Hamas bo no mester laga un mucha chikito su so cu un cacho sin presencia di un hende grandi. Ya cu lo por sosode accidente”, el a bisa categoricamente. E prevencion aki ta conta pa tur sorto di rasa, independientemente di e tipo di cacho y su comportacion.
El a bisa cu generalmente e animalnan no ta violento pero esunnan salvahe ta actua a base di instinto, ya sea ora cu nan ta bay busca nan cuminda of ora cu nan ta defende nan teritorio. Pero nan no ta ataca gewoon pa ataca. Tin cierto rasa di cacho cu e mesun ser humano a selecciona pa haci nan agresivo pa un proposito specifico di dje. A base su experiencia e ta haya cu si un cacho ta agresivo ta pasobra su doño mes fei principio no tabata sa con pa maneha su mascota. Of di otro banda intencionalmente el a crie asina cu e proposito cu e cacho lo bira agresivo. “Basicamente si e cacho ta agresivo esaki ta debi pa e responsabilidad di su doño”, el a declara.
Ley di Cacho
E ta haya cu e accidente mas grave popularmente conoci ta sosode cu Pit Bull, ya cu nan ta un sorto di cacho cu a wordo selecciona pa añanan como cacho di pelea. Sin embargo, Veterinario Ricardo Contreras a declara na Bon Dia Aruba cu si nos wak e estadistica den hospital relaciona cu atake di cacho, e mayor cantidad di accidente pa atake di cacho tin di haber cu cacho crioyo. “Mi no ta kere cu nos ta bay restringi e cachonan crioyo a base di e estadistica aki”, el a bisa
El a laga sa cu e problematica di cacho peligroso ta algo masha relativo, ya cu cada un di nan lo por tin su opinion riba agresividad di cierto sorto di cacho. “E topico aki ta hopi relativo”, el a señala.
E ta pensa cu mas cu nos ta enfoca nos mes riba rasa di cacho peligroso, e punto central mester ta e responsabilidad cu mester tin cada doño cu su mascota. Veterinario Contreras a bisa cu den e Ley di Cacho ta para cu cada doño di cacho mester ta responsabel di su mascota.
“Loke nos tin cu haci ta aplica e ley, y esaki lo trece un regulacion riba otro aspectonan, incluso riba e cachonan agresivo…”, segun e veterinario. E ta agrega cu na momento cu ta wordo reforsa e ley aki, e hendenan lo cuminsa asumi e responsabilidad di su animalnan.
“Esaki ta un punto importante, esta aplicacion di e ley di cacho bon, ya cu e no ta wordo aplica bon of e ta bayendo hopi slow”, el a laga sa. Unabes cu e ley aki ta wordo aplica manera debe ser, e problema di cacho peligroso lo bay mengua, y no mester bin cu mas ley cu ta restringi e presencia di cacho peligroso, ya cu e plataforma di Ley di Cacho ta suficiente.
