Rachelle Croes cabesante di Scol Cacique Macuarima: Abusa di situacion di scol cu rifa falso ta un crimen

Algun dia atras riba rednan social specificamente pagina di Facebook di Scol Cacique Macuarima a ser publica un post na unda ta splica cu un grupo di persona tabata organisa e bendemento di un rifa pa recauda fondonan pa scol, sin e autorisacion di e scol mes.

Den flyer e personanan a mustra cu a lanta un comision pa yuda scol Cacique Macuarima cu un rifa di 25 florin pa carchi, na unda e premio tabata dos weekend stay na un resort. E sorteo mester a tuma luga e dia 07 di februari ultimo.

Tocante esaki, cabesante di scol Rachelle Croes a splica cu na ningun momento nan como representante di scol a haya contacto di niun persona, ni a acerca nan pa haci un actividad di e sorto aki. El a expresa cu esaki no ta un caso conoci pa nan. E scol a purba di yama e numbernan di contacto cu ta aparece riba e flyer, pero e number no ta den servicio.

“Mi ta pensa cu tin hopi hende afo cu ta willing pa duna aporte na scol y mi ta haya jammer cu tin hendenan cu ta haci mal uso di e oportunidad aki pa haci cosnan cu no ta na fabor di nos comunidad ni di scol”, Croes a manifesta.

Di otro banda, el a duna di conoce cu despues di e candela, e parti cu nan mester haci principalmente tabata pa haci limpi e luga y esey a keda cla. Nan a kita locual ta peligroso cu por bula, e parti di e dak cu a wordo kita di e dos local. Ademas, Croes a bisa cu nan ta wardando riba DOW pa sigui cu locual nan mester haci.

Di loke ta trata e seguro di cobertura, el a comenta cu SKOA hunto cu DOW ainda ta den e parti di papia cu seguro pa wak kico ta wordo cubri, pa motibo cu inicialmente nan tabata cubri den estado original, prome cu e candela.

Croes a destaca cu nan ta pendiente di con por yega na e material.

Tocante e donacionnan, el a declara cu nan a haya di varios compania locual cu ta parti di muebles cu no ta completo ainda y loke nan a haya di donacion aworaki ta e parti cu ta bay pa banco. Loke nan a pensa ta cu e donacion cu nan a haya ta pa inverti den bukinan y metodonan cu nan a perde.

“Nos a haya hopi donacion material, pero ainda ta falta pa tur e muchanan haya nan lessenaar y stoelnan” Croes a bisa.

Tambe, riba rednan social a aparece comentarionan tocante e personanan cu a causa e candela cu segun nan mes a sigura cu comunidad sa ken nan ta y no kier bisa nada na polis. Croes a trece dilanti cu tin hopi rumor cu ta core y nombernan ta wordo menciona, pero door cu nan tin diferente nomber di parti di polis, e ta kere cu mester uni e evidencia cu loke nan tin y esey ta algo cu ta tuma su tempo.