Nos por a ripara den e ultimo dianan cu tin hopi actor den e asunto di supervision financiero cu no ta bon den duna informacion completo y cu ta laga emocion, hasta rabia, domina. Esey no ta yuda nan causa, ni nos pa haya informacion mas completo posible. Kico asina falta?

Pa cuminsa, tin dos asunto cu nos mester tene separa. Awor CAft ta duna Conseho di Ministro di Reino e recomendacion pa duna gobierno di Aruba un instruccion pa adapta presupuesto 2019 pa e cumpli cu e critica cu CAft tin principalmente riba presupuesto 2019. Ta mustra talvez straño cu esaki ta bin algun dia despues di e ultimo reunion di Conseho di Ministro di Reino, pero den e carta dirigi na parlamento di Aruba, e organo supervisor ta duna un relato di e trayecto cu a recore pa yega na e decision ey. Nan no a bay den detaye tocante e medidanan mes, esey ta keda discretamente den e conseho mes cu a bay pa gobierno di Reino, cu copia na ministro di Finanzas di Aruba. Nan por a limita nan mes na solamente notifica parlamento cu a bay un recomendacion pa un aanwijzing, manera e ley ta bisa, pero por comprende e splicacion di e trayecto como cortesia, loke no ta prohibi.

Loke nos no ta comprende ta e critica di e ministro concerni, cu ta acusa CAft di a causa confusion den e asunto. Nan a mantene nan mes na e ley, cu pa nan ta vigente y nos ta supone pa e ministro tambe, y a manda e recomendacion pa gobierno di Reino, y copia pa e ministro. E detayenan confidencial a keda pa gobierno di Reino y pa e ministro, cu tampoco ta divulga e partinan confidencial aki, pa bon motibo. Awor, si e ministro ta haya cu ‘CAft a conta mita di e storia’, nada ta strob’e pa conta nos e resto. Pero nos ta duda cu e ta bay haci esey, pasobra manera bisa, ta trata netamente di e medidanan den e instruccion, cu manera nos por comprende y respeta, ta keda confidencial entre gobierno di Reino y gobierno di Aruba.

Di otro banda, nos ta haya falta di un argumentacion solido di banda di e ministro concerni pakico e ta haya cu e gastonan di e Plan di Crisis Social mester por keda pafo di presupuesto. Tanten e no haci esey anto ta logico cu CAft, y hopi otro experto financiero, no ta mira motibo pa tene e gastonan aki den un fondo separa fuera di presupuesto. No ta asina dificil pa comprende cu unavez subi e caminda di permiti gobierno di Aruba pa tene cierto gastonan pafo di presupuesto, anto manera ta bisa na Hulandes ‘dan is het hek van de dam’ y por sigui otro asunto unda ta desea di aplica e mesun metodo aki. No ta pornada cu algun tempo pasa cu CAft a atende gobierno di Aruba tambe riba e gastonan total di personal, ya cu e famoso Afl. 479 miyon no ta encera tur gasto di personal tampoco, pasobra e no ta inclui parlamento, Contraloria General, Conseho Consultivo y DOW. Ta importante pa sa e total di gasto di personal.

Mescos tambe e asunto di reforma fiscal. Gobierno di Aruba ta haya asina straño cu CAft kier haya sa porfin kico ta e idea cu e reforma aki? Nos tambe tin gana di haya sa kico ta kico den e proximo añanan. Esey no pa satisface nos curiosidad, sino cu simplemente e ta toca nos interes como ciudadano. Nos ta scucha e argumento di gobierno cu nan mester caba nan consulta cu e partidonan interesa na Aruba, specificamente den comercio y industria. Esey ta un punto valido, pero ta implica tambe cu proximamente lo no por tin concretisacion legal ni mucho menos entrada pa gobierno di e medidanan nobo aki… Y esey ta e claridad cu gobierno ta omiti di duna, na CAft y na nos. Un reforma fiscal bon pensa y ehecuta ta tuma varios aña pa implementa. Pero esey ta trece cune cu no mester pensa tampoco den medida den pura manera e ‘sugar tax’ djis pa haya entrada pa cubri gasto, sin ningun vision ta con e medida aki ta cuadra cu un maneho strategico general pa mehora salud di nos poblacion en general mediante medida cu ta promove prevencion.

Kico mester sucede anto, den un caso asina, unda ta dificil pa inventa medida pa haya entrada cu no ta afecta pueblo? Wel, corta gasto. E alternativa cu di ningun manera gobierno kier contempla, pero cu finalmente lo bira e unico opcion. Den e proximo simannan gobierno mester atende e dos aspectonan clave di finanzas publico aki. Un ta e conseho pa duna instruccion na gobierno di Aruba, unda gobierno mester presenta nan miho defensa. E otro asunto ta e compromiso di gobierno di Aruba pa ancra e acuerdonan di e protocol den ley. Tin dos opcion: ta pasa un cambio di ley na Aruba, sin amienda, o ta informa gobierno di Reino cu no ta mira posibilidad pa haci esey. Seguidamente ta na Reino pa dicidi. E unico otro opcion, si Reino ta desea supervision financiero, ta bin cu un ley di Reino. No laga rabia ta e principal consehero…