Den documentonan nobo presenta como parti di su bataya legal na London contra e corant The Mail on Sunday y su empresa matriz, Associated Newspapers, pa ‘duna informacion falso’ tocante su persona pa perhudik’e, Meghan Markle a afirma cu el a sinti su mes ‘desprotegi’ pa famia real Britanico tempo cu e tabata na estado.

Esposa di prins Harry a afirma cu el a converti den tema di un cantidad di articulo falso y dañino den medionan Britanico, loke a caus’e un ‘tremendo angustia emocional y daño na su salud mental’. E texto legal ta agrega cu corona a prohibi Markle pa defende su mes. Segun The Guardian, e Windsornan ta sigue un politica estricto di no reacciona dilanti di ningun clase di noticia publica contra nan, sea berdadero of falso.

Sinembargo e actriz Mericano no tabata comparti e codigo di silencio aki, y na e momento ey e tabata kier a por bisa of haci algo pa duna su version di e sucesonan. El a afirma cu cualkier compensacion cu e haya si e gana e caso lo wordo dona na un organisacion contra termento na scol.

Den su demanda ademas el a critica e salario cu algun miembro di famia real ta ricibi, manera prinsesnan Beatrix y Eugenie di York, pa su presentacionnan den representacion di reina Elizabeth II y den comparacion cu e trabou cu e tabata cumpli como miembro oficial di e famia. Den e documentonan presenta pa su team legal e ta señala directamente e dos yiu di prins Andrew, sigurando cu tin miembronan cu ta traha y cobra. Markle ta bisa cu e no tabata compronde pakico nan si por gana nan placa di otro forma banda di nan rol oficial y no.

Pero lo cierto ta cu e prinsesnan di York ta colabora cu organisacionnan benefico priva y no tin un funcion institucional bou orden di Palacio di Buckingham.

E guera entre e dukenan di Sussex contra tabloidenan Britanico ta exponiendo e guera interno di e dukesa contra famia real.

Russell Myers, director encarga cu realesa Britanico pa e corant Daily Mirror, a sigura cu prins Charles como dukenan di Cambridge ta devasta pa e declaracionnan di esposa di Harry. Myers a afirma cu e reina ta sinti hopi decepciona pa e palabranan di Markle, ya cu semper el a duna sosten na e dukesa y a ocupa hopi pa integr’e den e famia.