E organo di Reforma y Desaroyo, COHO ta contra Statuut y Secretario di Estado di Reino demisionario Raymond Knops no mester presenta e rijkswet manera cu e ta na e cuater Parlamentonan di e paisnan, pasobra segun Raad van State e ta inadecuado. E conseho cu no ta oficialmente entrega a bira conoci na Hulanda y a keda publica pa website ‘DossierKoninkrijkrelaties.nl.’
E opinion di e entidad di conseho di mas halto den Reino ta duna gobiernonan Corsou, St. Maarten y Aruba rason den nan argumento cu e forma con Hulanda kier pa COHO opera ta contra derechonan constitucional di e paisnan.
Cu Hulanda kier mara condicionnan na e sosten di likides ta algo di spera, segun Raad van State y como tal ta sostene e obhetivo riba su mes, esta cu mester reforma economia y finanzas publico di e paisnan, pa nan por bira sostenibel, reforsa administracion publico y mehora calidad di bida di e habitantenan. Sinembargo e acercamento di Secretario di Estado no ta na su luga y ta duda cu e forma aki lo produci resultadonan duradero. Si duna autoridad grandi na un ehercito chikito di ambtenaar Hulandes, en bes di reforsa e capacidad di independisacion y habilidad di implementacion riba e paisnan, lo tin efecto contrario, ta e miedo di Raad van State.
Bon Dia Aruba lo amplia riba e informacion aki den su proximo edicion.
