Minister di Salubridad Dangui Oduber a duna di conoce cu awor cu hospital tin un hunta directivo (Raad van Bestuur) nobo, por cuminsa cu e plan di maneho cu, segun gobierno, lo kier implementa.
El a splica cu nan a termina e relacion di trabou cu Ezzard Cillie cu tabatin e funcion di director, awor tin un Raad van Bestuur interino cu Ronald van Trigt y sr Corver cu lo t’ey te dia 1 di juni di e aña aki y van Trigt te 1 di april pasobra a nombra caba un director financiero nobo na hospital.
Tambe minister Oduber a declara cu e investigacion forensico di laboratorio a termina y a ser entrega na Raad van Bestuur. Aworaki cu tin un Raad van Bestuur nobo, minister a comenta cu nan ta bay pidi nan cooperacion pa nan por haya e rapport di nan, pa motibo cu Cillie cu tabata ex-miembro di e hunta aki no kier a comparti e informacion cu a sali di e investigacion cu Gobierno.
Tambe el a expresa cu a bin varios cambio den e hunta di supervision di hospital; tres persona ya a entrega nan retiro conforme peticion cu gobierno a haci na nan y tres persona nobo ta forma parti di e hunta, y nan lo cuminsa implementa hunto cu gobierno e maneho acorda. Tarea primordial ta reduci e lista di espera y busca mas specialista pa yuda na Hospital.
Pa e motibo aki, minister Oduber a bisa cu p’esey AruBig ta yuda nan den e proceso aki pa busca mas dokter den region, mientras cu tin e tendencia ainda den hospital cu nan kier busca dokter di Hulanda so, locual segun cu e mandatario mes a sigura cu ta bon, pero logicamente den nos region tambe tin hopi dokter cu por yuda pa baha e presion cu tin na hospital.
Tur esaki, minister a comenta, lo ser haci awor cu tin un hunta directivo nobo y un Conseho di Supervision nobo pa asina por implementa e maneho cu gobierno lo kier ehecuta conforme su deseo.
