Aruba mester crea un maneho di ambiente integral si kier mehora clima di inversion y promove desaroyo economico duradero, na bienestar pa ciudadanonan. Esaki ta parti di e consehonan di Raad van Avies riba mehoracion di clima di inversion y e creacion di un desaroyo economico duradero.

E organo di conseho a formula un serie di recomendacion pa asina duna Gobierno un sosten den formula maneho cu mester yuda recuperacion economico di Aruba.

Den e nota di maneho financiero-economico 2002-2005, titula ‘Vision, Curashi y Disciplina,’ a menciona caba cu facilitacion di desaroyo economico y actividadnan den termino di reparticion espacial/economico y den termino di sostenibilidad pa medio ambiente, ta di importancia crucial. Cu bista riba cuido di un ambiente di biba fisico bon ordena, duradero y di calidad halto mester bin un maneho integral di ambiente.

Pais atractivo pa biba ta atractivo pa negoshi

Na Juli 17, 2019 a determina e Plan di Ordenanza Teritorial nobo, esta e ROP. Ainda mester caba cu e proceso pa yega na e ROPV, cu ta e Normanan pa e ROP. E ROP y ROPV pa loke ta construccion, vivienda y maneho di medio ambiente mester ta dirigi na otro. Esaki sigur ta di vital importancia pa un maneho di desperdicio adecuado, integral y duradero, cu, ademas di e punto di bista di medio ambiente y salud publico, mester ta mara na un sistema di proceso di sushi controla y responsabel.

E organo consultativo ta sugeri pa uza como ehempel, e ley di vivienda, ordenanza teritorial y maneho di medio ambiente den e organonan publico di islanan BES. Un totalidad bon ordena y balansa, mara na normanan di ambiente cu ta mara na sostenibilidad no ta garantisa unicamente un sociedad duradero, pero ta promove e atraccion socioeconomico di Aruba. Un Clima di negoshi atractivo, ta implica cu e ta atractivo pa biba, traha y haci negoshi.

Sinembargo, pa loke ta e huurmento di casnan, apartamento y cambernan pa duracion corto, e asina yama actividadnan Airbnb, esakinan ta rekeri un obligacion di permiso como hotel of negoshi di hospedahe. Locual no ta cla si, ta e nivel con ta controla e obligacion legal aki, y bou cua area ta permiti nan. Como tal, mester inclui nan den un maneho di ambiente integral.

Mantencion reglanan di medio ambiente

Te ainda, autoridadnan competente tin unicamente e instrumento penal pa mantencion cu ta inclui den e Natuurbeschermingsverordening, NBV (ley di proteccion di naturalesa) pa proteha flora y fauna endemico como tambe e elementonan geologico, arkeologico y historico di Aruba. Hopi biaha a indica cu e instrumentonan represivo no ta suficiente pa di berdad percura proteccion. Como tal, Raad van Advies ta conseha pa inclui sancionnan dirigi pa penalisa pa medio di entre otro boetnan pero tambe restauracion di e daño cometi.

RvA ta conseha pa trece of amplia areglonan legal pa inclui instrumento di control y mantencion pa ambiente, manera e ley desaroyo teritorial, e ROPV, un ley pa desperdicio y ley pa construccion y vivienda. Un clima di inversion atractivo, igual cu un ambiente di vivienda y di trabou beneficioso lo por ta miho garantisa, si Gobierno por para actonan dañino door di actua preventivamente y asina limita e impacto negativo na medio ambiente. Te ora cu e condicionnan aki ta na nan luga, berdad lo por tin ehecucion di e mantencion di ley necesario. Pa esey, e ta importante si pa educa y prepara ehecutivonan futuro pa ta encarga cu e tarea aki, y pa percura cu supervision y mantencion ta halto riba programa di Gobierno.

Introduccion/mantencion di medidanan di estimulo fiscal

For di e diferente cambionan den cuadro di reforma di belasting a mustra cu Gobierno kier elimina e areglonan di IPC existente. IPC ta para pa Imputation Payment Company y ta un areglo fiscal pa permiti por haya bek parti di nan impuesto riba ganashi ora di paga dividendo.

E intencion pa elimina nan, sin cu tin medidanan cu ta compensa esakinan no ta consehabel. Es mas, e ta contra e plan di maneho “Economic policy: A strong and resilient economy 2019-2022,’ cu ta e vision y maneho di Gobierno. Ta netamente actividadnan riba tereno di turismo medico, economia di conocemento, innovacion y sostenibilidad cu Gobierno lo kier, lo haya un sla si mester elimina e impulsonan fiscal actual. Esaki mientras cu, contrario na e consehonan den e rapport di Fondo Monetario Internacional, IMF no ta introduci otro areglonan fiscal pa stimula mas actividad. Tambe ta importante, na interes di siguridad na inversionistanan, pa percura cu e pasonan pa estimulo pa un periodo mas largo, of por lo menos un periodo garantisa, lo keda na vigor, y no ta elimina nan den un solo tiro, sin cu tin un bon areglo di transicion.

Tambe RvA ta sugeri pa introduci un beneficio pa stimula companianan yuda den e reeducacion of entrenamento di personal, pa medio di contribucion propio for di nan salario. Asina tambe Gobierno por ehecuta un pakete di estimulo pa sector priva tuma trahadonan publico den servicio en bes di introduci otro areglo di VUT (Vroegtijdig Uitdienst Treding) cu ta costa Gobierno hopi placa.

Belasting pa producto y servicio ‘sushi’

Lo mester introduci mas belasting y medidanan cu ta stroba productonan, servicio y industria cu ta menos duradero. A cambio, Gobierno mester duna e motivacion adecuado pa promove mas actividad sostenibel den cuadro di un economia duradero y comportacion di consumidor cu ta consciente di medio ambiente. Por lo tanto, Gobierno mester demotiva actividadnan cu no ta sostenibel y cu no ta bon pa medio ambiente. Por haci esaki pa medio di medidanan fiscal y di prohibicion.

Como ilustracion, RvA ta mustra cu Gobierno por cambia e belasting riba number di auto y pasa esaki den accijns di gasolin of diesel. Di e forma aki ta haci cu di biaha e cantidad di CO2, e gas cu ta contribui na cambio di clima, ta bira mas caro y ta promove autonan cu ta uza menos combustibel, manera auto electrico. Tambe lo ta bon pa specifica e sistema di tarifa di importacion riba mashinnan, medionan di produccion y autonan basa riba durabilidad, en bes di unicamente su balor di compra. Esaki lo contribui na un Aruba mas duradero.

Den otro palabra, Raad van Advies ta kere cu e ta na beneficio di comunidad pa bin cu un structura di tarifa di importancia pa medionan di transporte cu ta uza gasolin y diesel basa riba emisionnan di CO2; mas sushi e combustibel, mas halto e tarifa di importacion. Tambe por bin un restriccion of prohibicion riba e tempo di medionan di transporte cu no ta cumpli na tipo di standardnan di emision.

Simplificacion di e procedura di establece negoshi.

Tin hopi rapport cu ta sugeri pa simplifica e proceduranan pa haya e asina yama ‘vestigingsprocedure’ pa tur sector, ademas pa reduci e tempo, y evita exigencianan cu hopi biaha ta dobel. Banda di esey mester di un provision di informacion dirigi, unda inversionistanan por pa na un solo luga pa e por haya tur su permisonan y tur informacion necesario. Corsou tin e asina yama ‘VergunningsLoket.’ Digitalisacion di servicio di Gobierno lo yuda mehora e servicio aki. Raad van Advies ta kere cu mester un maneho di establecimento di negoshi hopi cla pa expertonan internacional cu ta necesario pa cierto actividad. E ta dificil pa kere cu Aruba tin tur experticio riba tur tereno. Como tal e procedura pa duna permiso di trabou y estadia mester bira mas eficiente y mester di un areglo cla pa famianan por haya nan permiso di estadia. Es mas, Raad van Advies ta sugeri un ‘open door policy’ pa expertonan.