Gobierno mester splica pakico mester cambia e Landsverordening Verdovende Middelen, si den e splicacion di concepto di e cambio di e ley cu a bay pa Parlamento, pa legalisa uso y produccion di cannabis medicinal, ta splica cu e ta posibel caba pa cuminza aplica e practica. Pero tambe, pakico a manda e ley pa conseho, si ya caba a firma e concepto di ley.
Esaki ta locual Raad van Advies a comenta den su conseho riba e concepto di cambio di ley, cu ta conoci como e areglo di cannabis medicinal, produccion di hennep pa obhetivonan medicinal y cientifico y introduccion di otro cambio.
Acuerdo di Gobernacion
Parlamento tin e concepto di cambio di ley pa produccion, benta y exportacion di cannabis medicinal, cu ta parti di e acuerdo di gobernacion, pa haci posibel e uso di cannabis pa metanan medico. E tema aki tabata un punto crucial pa e coalicion, particularmente di parti di partido RED.
Pa logra e meta, mester adapta e ley, pa asina establece reglanan cu tin relacion cu produccion di hennep pa metanan medicinal y cientifico.
Di e forma aki tambe mester ahusta e sistema y modernisa e ley pa introduci un structura di excepcion. Banda di esey ta deseabel pa institui reglanan pa nenga of hala aden permisonan of excepcion pa medionan narcotico of droga.
Ya caba por prescribi cannabis como remedi
Segun Raad van Advies, e ley actual tin stipulacion caba cu ta permiti pa dokternan prescribi cannabis medicinal. Den otro palabra por determina cua producto lo por haci posibel pa pacient. Y esey no ta mara na e cambio di ley. Preparatonan cu e medio Cannabidiol, sea combina cu THC of no, ya caba ta considera un remedi y como tal, no ta mira e necesidad pakico mester trece cambio den e ley pa publico por haya acceso na dje. Como tal, Gobierno mester splica e ora dicon ta necesario pa warda te ora cu trece cambio den e ley.
Costo y tratado
E cambio di ley ta papia di habri posibilidad di produci y exporta cannabis pa finnan medico y cientifico, cu lo nifica actividad economico pa Aruba. Raad van Advies ta ilustra cu Aruba ta mara na dos tratado riba narcotica cu ta rekeri inversion den un entidad publico, un ‘Bureau’ cu tin e derecho unico pa importa, exporta, almacena, y mantene un cantidad di e producto. Tur productor mester entrega nan cosecha na e instancia aki cu tin e obligacion pa cumpra e productonan mesora y tuma posesion di nan. E Bureau Cannabis Medicinal di Aruba ya caba ta lanta, desde juni 2020.
E splicacion di e ley ademas ta splica cu e cosecha di cannabis ta di un balor grandi y cu e industria di cannabis ta produci hopi placa. Pero no tin un argumentacion pa sostene e ponencia aki, segun Raad van Advies. Unicamente ta bisa cu caha di Gobierno lo haya entrada di leges, y otro permiso. Locual no ta splica ta e consecuencia financiero y e riesgo pa Bureau cumpra y warda e cosecha, y tampoco a ilustra con e entradanan for di importacion, exportacion, procesamento y comercio den producto di cannabis, incluso cannabis medicinal, unda ta tene cuenta cu e rekisitonan di tratadonan (Enkelvoudig Vedrag) y con esakinan ta relaciona na e responsabilidad di e Bureau pa cumpra e cosecha. Tambe mester splica cuanto e operacion di e Bureau lo costa y cuanto e costo di seguridad pa warda e cosecha lo ta.
Aruba ta laat?
Raad van Advies a tuma nota cu splicacion di e cambio di ley ta papia di crea e posibilidad pa un sector economico nobo, ya cu exportacion di cannabis sea pa motibonan medico y cientifico lo nifica actividad comercial nobo pa Aruba y como tal, e industria Arubiano lo enfoca primordialmente riba exportacion.
Pero, Raad van Advies ta avisa Gobierno cu mester tene cuenta cu mundo no a para keto y cu hopi pais ya caba ta activo den e industria aki. Ta puntra a base di cua argumento of punto ta kere cu Aruba lo por competi riba mercado internacional.
E splicacion aki ta crucial, pa asina por hustifica e inversion grandi den e Bureau cu ta encarga cu e maneho di e cosecha di cannabis. Mester duna un bista balansa, y no limita na ilustra un potencial financiero unicamente. Pero tambe e gastonan y potencial riesgo.
Pa loke ta e ultimo punto, Raad van Advies ta bisa cu mester realisa cu Aruba tin un imagen fragil pa loke ta e lucha contra exportacion di droga y labamento di placa, y implementacion di stipulacionnan di tratadonan ta keda atras, por ehempel e obligacion di raporta, ta problematico. Mas ainda, mester reconoce cu tin riesgonan di integridad mara na creacion di e Bureau.
Ley mester ta consecuente
Banda cu Raad van Advies a sugeri mas claridad den uso di palabra y tambe pa e cambionan ta mas consecuente, pero ta sugeri tambe pa cambia articulo den e ley, e LVM, pa kita e aspecto penal di uso personal di producto di cannabis. Esaki bao condicion cu ta obtene e cannabis pa medionan legal. Rond mundo ta considera uso di narcotica como medicina algo normal, tuma morfina por ehempel. E ta nifica cu ya caba ta permiti uso di cierto droga como remedi.
E camindanan legal na Aruba pa uso personal ta si un dokter ta prescribi esaki; un animal ta haya e tratamento na un veterinario. Of, si un persona cu ta biba den exterior y ta bishita Aruba y por demostra cu e por tin cierto producto di narcotica cune pa uso personal y cu el a obtene nan via un dokter. Tur esaki ta regla caba den e ley actual. E cantidad di narcotica como remedi cu un persona por tin cune ta determina pa Inspeccion di Remedi, cu a determina un maximo di tres luna.
Concepto di Ley ta firma caba
Locual Raad van Advies ta considera yamativo y a bisa esaki den su conseho ta cu Gobierno ya caba a firma e concepto di cambio di ley, sin warda e conseho di entidad. Den e sentido aki, e Minister encarga, Dangui Oduber di Salud Publico no a sigui e proceduranan pa yega na leynan.
Riba dje, falta e rapport di formacion di e organisacion cu mester ehecuta e proyecto, esta e Bureau Cannabis Medicinal. Locual a logra si, ta cu a inclui e conseho di Raad van Advies den e proyecto di cambio di ley cu a keda presenta na Parlamento.
Mester bisa cu Gobierno a informa cu a firma e proyecto di cambio di ley sin ningun mal intencion y a agrega e rapport di formacion di e Bureau finalmente.
Mirando cu segun tratadonan, ta e Bureau ta encarga pa exporta e cannabis medicinal, Raad van Advies ta haya yamativo cu den e splicacion ta bisa cu ta e partido cu ta haya permiso pa produci e mata, ta entrega e cosecha na e Minister y locual ta di mas, ta encarga pa destrui. E comentario den e splicacion di e ley, cu e comerciante/productor cu tin acuerdo cu e Minister, mester tin un mercado pa su producto como tal, ta rekeri un splicacion mas amplio. Y aunke cu esaki por ta caso, e instancia den exterior cu ta ricibi e producto/cosecha mester ta un partner confiabel y integro y ta cumpli cu e condicionnan cu tratadonan ta rekeri. E contractnan entre e Minister y e instancia of persona cu ta haya e permiso pa produci cannabis tambe mester ta den cuadro cu locual tratadonan riba narcotica ta permiti.
