No tin ningun estudio di impacto con lista positivo nobo di remedi, diseña pa baha gasto di AZV, lo afecta calidad di cuido medico en general. Esey ta locual Raad van Advies ta bisa riba e cambio di e ley. Manera ta conoci, Gobierno a introduci un lista positivo di remedi nobo, dirigi na austeridad.

E proposicion di e decreto pa cambia e decreto nacional Derecho Remedi y Aposito ta parti di e reduccion di gasto di AZV di 5 miyon florin pa luna, manera cu a keda palabra cu Hulanda. Segun Raad van Advies, den e cambio, ta determina cu Organo Ehecutivo di AZV a analisa diferente scenario y instrumento pa realisa e reduccion di gasto di 5 miyon florin pa luna, unda a trata pa percura cu e cuido medico pa aseguradonan ta keda mas completo y stabiel posibel.

Den e splicacion di e cambio den e ley, sinembargo tin di haci cu e aspecto di baha gasto cu mester keda realisa pa medio di elimina remedinan for di e asina yama lista positivo.

Impacto general riba salud

Pero Raad van Advies a tuma nota cu no a duna ningun informacion con eliminacion di algun remedi lo impacta e cuido di salud en general. Pa por haya un bista mas balansa di tanto e ahorro como tambe e impacto riba cuido di salud, ta deseabel pa expande e informacion cu datonan specifico.

Esakinan ta entre otro e scala riba cua ta prescribi e remedinan en cuestion actualmente, y si tin alternativanan ekivalente cu por keda prescribi na pacientnan. Y si no tin alternativanan disponibel, Raad van Advies ta puntra pa un investigacion na e capacidad di e consumidornan di e remedinan aki pa cubri e gasto nan mes.

Tambe ta bisa den e splicacion di e ley, cu den e di tres di e ‘5 wave model’ di AZV, ta inclui proposicionnan cu mester di areglo legal y cu Gobierno a dicidi pa regla esakinan den diferente decreto. Pa por mira e proposicionnan aki den relacion interno, ta deseabel pa e splicacion di e ley, por lo menos ta duna un indicacion global di e contenido di e areglonan aki, ademas di e impacto previsto riba e costo y calidad y accesibilidad di cuido di salud.

Diferencia entre Hulanda y Aruba riba tereno di salud y rikesa

Den e splicacion ta referi na un ehercicio cu AGA, esta e Adviescommissie Geneesmiddelenlijst Aruba, unda a sali di punto di salida e sistematica di cuido di Hulanda pa loke ta cuido farmaceutico.

Pero Raad van Advies ta comenta cu a ripara cu for di e splicacion no ta ilustra cua argumento a hunga un papel pa usa e sistematica di cuido di Hulanda como e base. E pregunta cu ta lanta si e grado den cua y e tipo di kehonan di salud cu ta prevalente na Aruba ta similar cu na Hulanda, y tambe si a tuma e diferencia di rikesa entre e dos paisnan den e evaluacion aki. Raad van Advies ta haya importante cu e splicacion di e cambio di ley ta duna un miho bista riba e similaridad y diferencianan aki.

Esey ta motibo tambe cu Raad van Advies a pidi e carta di AGA di 11 di Juni, den cual a bisa cu a dicidi pa introduci e eliminacion di cierto remedinan den fase. Fase 1 lo ta trata remedinan a base di cuido propio, excluyendo remedinan cu e boticario ta duna y excluyendo tambe remedinan cu ta obtenibel cu receta di dokter, cu segun Hulanda, no ta den e pakete basico. Esaki lo keda introduci mesora. Den fase dos, lo elimina remedinan for di e pakete di AZV basa riba e lista cu ta segun e Areglo Seguro di Cuido Hulanda.

Combersacion cu tur actor na Aruba

Den concepto di Raad van Advies, por determina cu mester mas tempo pa e di dos fase aki, y cu mester bay wak cerca tur actor envolvi, con lihe por implementa e fase aki. For di e splicacion no a ilustra si tabatin un combersacion asina, ni si esaki a produci resultado. Raad van Advies ta considera importante pa expande e splicacion di e decreto pa cambia e ley cu e informacionnan aki.

Pa loke ta e efectonan financiero, den e splicacion di e decreto ta bisa cu e eliminacion di cierto remedinan for di e lista positivo lo nifica un reduccion di gasto di 3.5 miyon florin pa aña, mientras cu den e di dos fase, e lo nifica otro 2.5 miyon florin pa aña. Raad van Advies ta puntra con leu eliminacion di algun remedi for di e lista positivo, lo por ta conduci cu ta bin un cambio unda dokternan ta prescribi remedinan mas caro, y si e posibilidad aki a keda evalua den e calculacionnan.

Tambe Raad van Advies tin pregunta con leu e organo ehecutivo di AZV ta ekipa pa por procesa un aumento eventual di peticion pa proceduranan di apoderacion, of si aki, kizas lo tin hasta mas gasto. E organo consultativo ta puntra ki implicacion e desaroyo aki lo tin pa e tempo cu pacientnan mester warda.

Finalmente ta conseha pa bin cu un campaña di informacion cu ta na tempo y bon pa splica comunidad cu tin mas di 200 remedi cu ta bay kita di e lista positivo di AZV.