Banda di e usual comentario riba contenido di presupuesto, Conseho Consultivo (Raad van Advies) tabatin algun critica relaciona cu e proyecto di ley aki pa aña 2021 Na promer lugar a critica cu e ley a yega cu un retraso grandi y ta urgi gobierno trece mehoracion den esaki, tambe tumando na cuenta cu e diferente actornan, manera RvA mes, mester e debido tempo pa haci nan trabao.
Tambe a critica cu no ta tene na cuenta cu un ordenanza (landsverordening) pa stipula presupuesto ta solamente un ley den sentido formal y por lo tanto mester keda limita na un presupuesto di entrada y gastonan di e Pais. “Ta en pugna cu e caracter di apoderacion di e presupuesto pa eyden cambia (partinan di) otro leynan o declara nan no aplicable. Den articulo 3 di e proyecto aki a inclui un cambio den Landsverordening instelling ministeries 2018 y den articulo 2 atrobe ta desvia – aunke sea implicitamente- di articulo 22 di Comptabiliteitsverordening (CV) 1989. Esaki ta ser considera incorecto y indeseable pa RvA. E Conseho por lo tanto ta conseha pa inclui e stipulacionnan aki den un ordenanza separa.”
Den un ‘footnote’ RvA ta bisa: “Articulo 22 inciso dos ta stipula cu contratonan por ser conveni pa un periodo di no mas largo cu cinco aña. Por devia di esaki por medio di un landsverordening. Den articulo 2 di e proyecto di ley (di presupuesto) sin embargo no ta indica si e prestamo eventual ta di mas di cinco aña; e Conseho ta mustra si embargo cu, mirando e practica, prestamo di e magnitud aki ta en general di mas largo cu 5 aña y cu esaki a traves di e ley di presupuesto ta desvia di articulo 22, inciso dos di CV 1989.”
Igualmente ta critica cu, a base di articulo 3, inciso dos di CV 1989, mester inclui den e proyecto di ley un resumen specifica di e garantianan duna, o cu ta bay duna, y un resumen di acreencia y debe pa cada ministerio. Segun gobierno, RvA ta bisa, e corelacionnan di derecho patrimonial (vermogensrechtelijke verhoudingen) manera e acreeencia y debenan y relaciona cu nan e derecho y debernan cu un ministro ta conveni, ta corelacionnan cu ta regarda e Pais y no un ministerio riba su mes. Articulo 3, inciso dos, segun gobierno ekibocadamente lo ta tuma e ultimo aki (cu ta responsabilidad di e ministro) como corecto, RvA ta comenta. Sin embargo, RvA ta haya cu tanten e cambio den CV 1989 no tuma lugar, cu ta encera e cambio ey, e stipulacionnan di e ley actual ta keda vigente y a base di esey e resumennan corespondiente lo mester keda añadi na e actual propuesta di presupuesto.
Parlamento por exigi e documentonan
En vista di e posibilidad cu no ta trata presupuesto mas, te despues cu otro parlamento y gobierno tuma asiento, e critica aki probablemente no lo haya eco den parlamento na e momento aki. Den un parlamento nobo lo por exigi e adicion di e documentonan faltante aki, cual tabata e caso durante tratamento di presupuesto 2020 caba, unda tampoco a duna e detayenan ey.
