Pais Aruba mester cambia su businessmodel y introduci un sistema di personal cu ta basa riba merito y conocemento, banda cu mester reduci e cantidad pa por logra un desaroyo sostenibel pa Aruba. Esey ta e conseho di Raad van Advies na Gobierno.

Segun e institucion, e situacion di Covid ta pone un presion enorme riba e situacion economico pero tambe social di Aruba. Pa asina por lanta e actividad economico y asina limita e daño na nivel social, Gobierno a institui un Comision di Recuperacion y Innovacion cu ta encarga pa conseha riba un recuperacion economico nacional y un plan di innovacion pa Aruba.

Raad van Advies tambe ta di opinion cu mester restaura economia mas lihe posibel. Pero pa logra esaki, mester tuma e pasonan necesario. E ta di importancia y ademas un momento oportuno, pa pone un base fuerte pa por haci economia di Aruba mas resiliente.

Pa por traha un plan nacional di recuperacion y innovacion mester tene cuenta cu e desaroyonan na nivel mundial, particularmente e posicion cu Aruba ta aden, pa asina por determina un direccion resiliente na un forma strategico.

Raad van Advies a haci diferencia sugerencia den su otro consehonan kico lo por yuda pa Aruba logra un modelo socio economico resiliente y duradero. Entre otro, a publica sugerencianan con pa mehora e clima di inversion y con Gobierno mester crea un organisacion cu ta mas dirigi na servicio na cliente, y haci e structura social uno duradero.

A urgi Gobierno pa enfoca riba factornan elemental cu ta forsanan cu ta dirigi e desaroyo, esta e desaroyonan geopolitico, desaroyo demografico, entre otro e enbehecimento, e capacidad di administracion di Aruba, e desaroyo mundial di mercado (globalisacion) y desaroyo tecnologico. Mester pone tur esakinan hopi cla riba mapa. Nan ta esencial y ta similar cu e asina yama SWOT analisis, cu ta e analisis di e puntonan fuerte, debil, identifica oportunidadnan y menasanan.

Raad van Advies a manda e consehonan aki riba su propio iniciativa y ta enfoca riba e sistema di belasting, cuido di salud, structura social y administracion publico (Gobierno) y clima di inversion. No ta exclui cu tambe lo manda conseho adicional riba entre otro, medio ambiente.

Pero e enfoke den e conseho specifico aki ta riba administracion publico.

Condicion actual di e organisacion gubernamental di Aruba

Pa organisa y structura administracion publico of e organisacion gubernamental tin tres elemento esencial. E prome ta kico Gobierno mester haci pa ken y con. Mescos cu cualkier organisacion, Gobierno mester contesta e pregunta ‘con’ ta ehecuta su tareanan a base di un modelo di negoshi (businessmodel), pa asina pone cla con kier logra su obhetivonan. Aki ta trata e structura di organisacion, e procesonan di maneho y cultura di trabou.

E modelo di negoshi di Gobierno ta hinca den otro pa por realisa un sociedad cu ta funciona bon y cu ta basa riba estado di derecho. Pa por realisa e obhetivonan aki, Gobierno, mester cambio su entradanan, sea di belasting of prestamo, den balor agrega pa ciudadanonan. Esakinan por ta miho infrastructura, percura pa siguridad nacional y bon enseñansa. Pa por realisa esaki, e ta importante con y si a logra resultadonan proyecta (den forma di producto y servicio) na un forma cu ta efectivo den costo y na satisfaccion di comunidad.

Modelo di negoshi actual no ta funciona

E modelo di negoshi di Gobierno di Aruba no ta cumpli cu e resultado desea, den e aspecto aki. E asina yama Government Effectiveness Index cu Banco Mundial a produci na 2018 a duna Gobierno di Aruba un puntuacion cu berdad ta hopi mas halto cu e promedio mundial. Pero e score di 1.06 ta implica cu tin hopi espacio pa mehora. E puntuacion ta entre -2.5 como esun mas debil te na 2.5 como e miho).

Pais Aruba ta opera desde 1986 cu un modelo di negoshi unda e enfasis ta riba costonan relativamente halto, mucho poco inversionnan duradero pa termino largo y medidanan pa baha costo y semper den buskeda di otro fuentenan di entrada pa keda mantene e aparato gubernamental tradicional.

Falta di boluntad politico

Tin diferente publicacion y rapport con pa restructura, pero nunca tabatin e boluntad y determinacion politico pa trece e cambionan necesario. Raad van Advies a mustra varios biaha riba e crecemento innecesario di e aparato publico y e hecho cu casi no ta implementa tecnologianan cu ta baha gasto y cu ta optimalisa procesonan. Consecuentemente no a mehora servicio na publico, no a logra domina gastonan y a dificulta e reduccion di debe. Pa e motibo aki tambe, debe di Pais Aruba a crece exponencialmente te na 5.6 mil miyon florin.

E crisis di Covid a mustra bon cu no por sigui cu e modelo di negoshi actual di administracion publico di Aruba y cu mester tin un reforma fundamental. E puntonan central di e reforma mester ta: integridad y profesionalismo di e personal publico mester ta e fundamento riba cua e modelo di negoshi nobo mester ta basa; mester tin un disciplina interno fuerte riba presupuesto. Gobierno lo bay aki na un presupuesto balansa y ta activa un maneho di risico efectivo (contingency planning) cu tin como meta pa baha e debe di Aruba y crea buffernan financiero.

Status huridico di empleadonan publico

For di e punto di bista pa yega na un organisacion publico reduci, eficiente y flexibel ta crucial pa e areglonan di status huridico (rechtsposities) mester bira mas flexibel y cu mester promove un cultura laboral cu ta dirigi na prestacion y responsabilidad pa ehecucion di tareanan. Raad van Advies ta kere cu mester sigui ehempel di Hulanda pa elimina e posicionnan anticua di ambtenarij y aplica e sistema di derechonan laboral priva. E cifranan ta mustra cu e aumento den gastonan di personal ta consecuencia di pagonan di overtime y salarionan. Como tal mester tin atencion pa maneha e overtime.

Pero ta crucial pa crea un aparato publico y un maneho di personal efectivo cu ta basa riba meritocracia, esta seleccion y pago basa riba experticio, conocemento, experiencia y prestacion; cu ta midi si locual Gobierno ta ehecuta of impone riba publico ta cumpli cu realisacion di e obhetivo inicial di balor agrega; cu tin un aparato publico cu ta reduci door di digitalisacion y automatisacion.

Un Gobernacion cu ta mas eficiente den costo y dirigi na servicio ta yuda e posicion di concurencia di Aruba, pero tambe ta yuda crea un bon clima di inversion pa motibo cu tin un bon maneho financiero y stabilidad financiero. Como tal e ta importante pa tuma pasonan mesora pa logra e obhetivo aki.

Recomendacion

A ahusta e recomendacionnan basa riba e situacion di Covid, pero en todo caso Raad van Advies ta kere cu mester revisa e areglonan di e status huridico (rechtsposities) di personal di Gobierno.

Banda di e areglo di e Bezoldigingregeling Aruba 1986 a bin otro areglonan separa, entre otro pa polis, brandweer y duana. Esaki a conduci na diferente areglo di pago, cu e peliger cu nan ta hala mas leu di otro, mientras cu esun di e grupo mas grandi ta keda mescos cu ainda ta cay bou di e areglo di 1986. Raad van Advies ta urgi pa basa riba e principio di igualdad y evita cu tin diferente areglo cu tin un actualisacion di e Bezoldigingsregeling.

Bon Dia Aruba lo sigui amplia riba e consehonan di Raad van Advies den proximo edicionnan.

.