Raad van Advies: “No mester perde embehecemento di e poblacion for di bista”

E relacionnan na Aruba a cambia considerablemente y locual ta yama atencion ta e velocidad cu cual e cifranan aki a cambia den ultimo 20 añanan. Actualmente tin un dubbele vergrijzing (dobel embeyecemento) cu ta causa pa e aumento di proporcion di adultonan mayor, 60+, den e poblacion combina cu e expectativa di bida.

E entidad ta remarca cu aunke desaroyonan similar tambe ta tuma luga na otro paisnan, e desaroyo di Aruba specificamente ta demostra cu e proporcion demografico a bira mas agudo. E desaroyonan aki ta referi, entre otro, na e ‘braindrain’ di hobennan altamente educa cu ta busca un estudio, of trabou, na Hulanda of America y no ta regresa Aruba.

Compara cu por ehempel Merca, 38%, of Hulanda, 36%, e proporcion di personanan altamente educa na Aruba, 11%, ta tres biaha mas chikito. Ademas, na Aruba tin un politica di migracion laboral limitante door di cual tanto e calidad como e cantidad di e poblacion cu edad pa traha ta bao presion.

E desaroyonan aki, segun e entidad ta subraya, ta duna un indicacion fuerte cu riba largo plaso ta bay tin problema den varios area socioeconomico y social.

Riba mercado laboral tin mas retonan ta surgiendo. Esaki ta pa motibo di e desekilibrio di e salida di e pensionadonan y e falta di hobennan pa cubri e puestonan aki. E aumento aki no ta surgi solamente pa motibo di e embeyecemento di e poblacion, si no tambe pa e migracion di hobennan potencialmente altamente educa pa otro paisnan.

Mirando e escasez cu por spera den e mercado laboral, mester considera seriamente fomenta e inmigracion laboral. Sinembargo, segun e entidad ta indica, inmigracion sin seleccion no ta ofrece e solucion pa e problema aki na Aruba.

Por spera un efecto positivo solamente cu un diferenciacion y politica di admision flexibel, cu ta resultado di e necesidadnan di e mercado laboral.

P’esey Raad van Advies ta enfatisa cu no por perde bista no solamente na Aruba, si no en principio na tur e paisnan desaroya cu problemanan similar di embeyecemento. Nan tambe ta bay wak migracion laboral como un solucion parcial y ta bay persigui esaki pa e eleccion na Aruba no ta automaticamente obvio.

E retonan cu ta surgi di otro banda di e demanda di economia ta particularmente relaciona cu e structura di cuido. Den nos siguiente edicion por lesa mas informacion detaya riba e tipico aki.