Minister di Husticia, Andin Bikker a manda proposicion di cambio di LTU pa Parlamento, conforme condicion di Hulanda pa asina haci’e mucho mas facil pa famianan di rijksambtenaarnan y mariniernan por bin y biba na Aruba. E ley riba Corte Comun ta e base di e cambionan den e LTU cu mester haci pa elimina e complicacionnan pa famianan di rijksambtenaarnan biba na Aruba.

E cambionan aki tabata un di e condicionnan di Hulanda pa Aruba por haya sosten di likides. For di 2006, ora cu a bin cu e Landsverordening Toelating and Uitzetting Vreemdelingen, a inclui e stipulacion cu famianan di entre otro hueznan y mariniernan tambe mester di un permiso di estadia na Aruba. Aunke e tempo ey Hulanda mes a financia entre otro e creacion di e LTU nobo, no por a premira cu e pida frase aki lo a bira fuente di iritacion, frustracion y discordia pa esnan di Reino, particularmente di Hulanda, cu mester a bin Aruba pa trabao. Gobierno Hulandes na varios ocasion a urgi Aruba pa trece cambio den e proceso, pero den practica nada a cambia.

Es mas, na 2018 a bin un protocol pa facilita e proceso y e proceduranan, sinembargo, realidad a keda mescos. Te cu e aña aki ainda, Hulandesnan Europeo cu mester a bin Aruba pa traha a confronta contratiempo pa nan famianan of nan partnernan por haya e permiso di estadia sin problema.

Cu e cambio den e LTU, e proceso mester bira mas facil. Aunke cu a usa articulo 38 di e rijkswet di Corte Comun como ehempel, Raad van Advies, RvA ta sinti cu e tabata mas facil si a djis copia e articulo. Pasobra particularmente e splicacion of Memorie van Toelichting di e proposicion di cambio di ley ta deficiente.

E cambionan den e LTU segun Minister di Husticia ta basa riba pensamentonan cu ta keda evoluciona y un maneho duradero den cuadro di un analisis continuo di e efectividad di e cambionan cu a introduci den e ley na december 2018.

E cambionan specifico ta papia cu casa, of partner den relacion duradero, yiunan adopta of reconoci menor di edad ta haya admision automatico, ‘van rechtswege.’ Tambe ta regla e aspecto di digitalisacion ademas di e proceso pa extende e permisonan.

Raad van Advies critico

Di su banda, Raad van Advies tabata hopi critico riba e cambionan den e ley y e texto di e articulonan cu a cambia. Es mas, RvA no ta haya e splicacion y motivacion di e cambionan hopi cla. Hasta a bisa den su conseho cu e splicacion ta hopi bao nivel, unda no solamente no ta ilustra e necesidad pa e proposicionnan, pero cu mas ainda, no tin splicacion pa e cambionan. E splicacion, esta e Memorie van Toelichting di e cambionan den e ley di LTU, ta mas bien un ripiticion di e articulonan y no tin un balor agrega, den concepto di RvA. Consecuentemente, ta conseha pa concretisa e splicacion.

Den e proposicion di cambio di articulo 1 di e LTU ta purba trece claridad pa e grupo di personanan cu ta cay bao articulo 3 di e ley, cu ta inclui personanan den servicio di Pais Aruba of instancianan subsidia pa paisnan di Reino y cu ta staciona na Aruba. Raad van Advies ta haya cu e formulacion di e articulo ta laga di desea, y por hasta simplifica e articulo door di djis referi na un persona cu ta bin traha pa Pais Aruba of un instancia subsidia pa un pais di Reino. Tin deficiencia redaccional den e cambionan, y como tal, por ehempel mester specifica cua ta e instancianan cu ta referi den e cambionan di ley. E splicacion mester ta den e Memorie van Toelichting.

Yiunan di mayornan no-Hulandes

Locual Raad van Advies tambe a remarca ta e cambio cu ta relata na muchanan di mayornan cu no tin nacionalidad Hulandes, pero cu a nace na Aruba. E ley tabata bisa cu un mucha cu a yega edad di 10, y a nace na Aruba tin e derecho pa ta na Aruba (van rechtswege). Sinembargo, e proposicion di e ley a trece un cambio, unda a inclui muchanan cu a bin Aruba cu un aña di edad tambe.

Minister di Husticia a trece cambio den e aspecto aki, a pesar cu e no tabata parti di e exigencia di Hulanda. Es mas, e condicion di Hulanda pa cambia e ley tabata referi unicamente na e rijksambtenaarnan y otro cu mester bin traha na Aruba y nan famia y/of partner.

RvA sinembargo ta considera cu no a argumenta pakico mester a bin cu e cambio. No ta motiva e necesidad pa e cambio di e articulo, pero ta sugeri pa en bes di usa e ‘un aña’ pa ‘den su prome aña.’ Locual RvA ta haya ta cu e splicacion no ta clarifica si e mucha mester ta biba na Aruba for di su prome aña pa por haya e admision ‘van rechtswege,’ particularmente mirando cu ainda ta menciona cu muchanan naci na Aruba ta admiti ‘van rechtwege.’

Kico ta relacion duradero

Otro punto cu RvA ta considera confuso ta e stipulacion proponi den articulo 1, seccion A, unda ta propone pa agrega un parti nobo, unda ta admiti casa of partner den un relacion duradero, como tambe yiunan menor di edad, sea ta adopta of reconoci. Segun Minister di Husticia, e articulo aki ta similar na articulo 38 di Corte Comun. Sinembargo, RvA ta remarca cu e articulo en cuestion aki ta papia di yiunan menor di edad cu ta forma un unidad di famia cu e persona cu mester bin traha. Como tal, RvA ta haya cu no ta hopi cla di con no a tuma e articulo aki completo pero cu a haya necesario pa adapt’e. E paso aki ta lanta e pregunta di yiunan biologico cu ta menor di edad tambe lo keda admiti ‘van rechtwege.’ Si a djis tuma articulo 38 di e ley di Corte Comun lo a evita discusion innecesario, segun RvA.

Ademas, RvA ta puntra si e cambionan no ta crea distincion innecesario entre personanan cu por establece na Aruba, compara cu esnan cu tin 5 aña cu Aruba como residencia principal.

Pa loke ta partners, articulo 38 di e ley di Corte Comun ta papia cu casa of partnernan registra di miembronan di Corte Comun y nan reemplasantenan tin derecho automatico pa residencia. E proposicion di cambio di e LTU ta papia di partner den un relacion duradero. E hecho cu Parlamento ta tardando hopi aña caba pa pasa e implementacion di Codigo Civil y ta haci cu te ainda no tin regulacion pa registracion di pareha. RvA ta asumi cu motibo pakico a scoge pa relacion duradero ta sinta pa e motibo aki. Sinembargo un formulacion asina ta haci necesario pa duna criteria a base di cua por determina cu un relacion ta duradero. Den caso cu trata e Codigo Civil, RvA ta kere cu mester cambia e texto di e cambio di e LTU pa referi na registracion di pareha.

Extension permiso estadia

Riba e peticion pa duna, cambia of extende e duracion di e permiso pa estadia temporal ta keda dicidi den seis siman. Ta sugeri pa duna Director di DIMAS e autoridad pa den cuater siman extende e estadia. Motibo ta cu ta constata cu no a defini e Director den e cambio di ley. Un atribucion di autoridad asina no ta cuadra cu e designacion riba tecnica di legislacion y por crusa responsabilidad politico den otro como consequencia.

RvA a yega di bisa caba cu e Minister bao cua e persona of colegio den cuestion ta labora, no ta keda unicamente politicamente pero tambe huridicamente responsabel den ehecucion di autoridad. Como tal ta conseha pa no duna autoridad nobo na e Director di DIMAS. E ta logico cu e Minister mes no ta haci e trabao, pero cu ta ambtenaarnan ta encarga, pero bao su responsabilidad. RvA ta kere cu un areglo di mandato ta suficiente.

E decision pa mara legalmente e notificacion pa medio digital ta algo di aplaudi, segun RvA, pero mester percura si pa splica cua ta e garantianan cu tin pa informa un persona pa e medio electronico.

Na e momentonan aki, e Minister di Husticia, ambtenaarnan di immigracion y esnan encarga pa implementacion di e ley ta esnan cu mester registra e cara y e marcanan di dede (vingerafdruk). Pero RvA ta kere cu mester por laga ambtenaarnan encarga pa otorga e permisonan di estadia haci e trabao aki tambe, pero e ora mester amplia e splicacion di e ley pakico ta duna e ambtenaarnan en cuestion e mandato y e areglonan legal na cua nan mester tene nan mes pa e derechonan di e personanan cu mester haya e permiso di admision.

RvA ademas ta bisa Minister pa trece mas claridad den locual e ley ta considera e periodo den cua e personanan mester haya nan permiso.

E conclusion di RvA ta cu en todo caso, e proposicion di cambio di e LTU aki ta purba cumpli cu un di e condicionnan di e landspakket di Aruba, basa riba e acuerdo di sosten di likides for di Hulanda pa Aruba. Ta un asunto cu tin hopi tempo ta forma un discusion mirando e problemanan cu rijksambtenaarnan y mariniernan en particular a pasa aden pa por busca permiso di estadia pa nan famia. RvA ta comparti e obhetivo. Sinembargo, e splicacion, esta e Memorie van Toelichting ta duna mucho poco informacion. Es mas, e splicacion ta asina deficiente cu ta haci cu e proposicionnan no ta mucho cla y no ta convincente. Pa e motibo ey mes, RvA ta haya cu no mester manda e proposicion di ley y su splicacion manera e ta skirbi pa Parlamento, te ora cu a tene cuenta cu e sugerencianan di e organo di conseho.

Carta Gobernador

Minister Andin Bikker a tuma nota di e comentario y conclusion di RvA y a bisa den un carta pa Gobernador cu e tin su observacionnan pero cu pa motibo cu tempo ta preta pa cumpli cu e condicionnan cu Hulanda e lo limita esakinan. Den su concepto, no mester un splicacion (nobo y amplio) pa motibo cu e LTU riba su mes no ta bay conoce un cambio grandi y e Memorie van Toelichting di e ley existente ta suficiente.

Sinembargo, Minister Bikker a tuma algun di e cambionan den e aspecto redaccional sugeri pa RvA. Paloke ta e articulo riba muchanan di mayornan sin nacionalidad Hulandes, su argumento ta cu a haci e cambionan basa riba practica y hurisprudencia cu ta existi riba bida di famia.

Bikker ta splica tambe cu articulo 38 di e rijkswet Corte Comun ta e ehempel pa e cambionan den e LTU cu ta para riba su mes. A tene cuenta cu e circunstancianan local. “Ta trata aki di ehecucion di un palabracion entre Hulanda y Aruba riba admision ‘van rechtswege’ di miembronan di famia di un rijksambtenaar, cu tin como base e cuadro di ley y otro areglo legal di Aruba. Como tal, e cambionan di ley ta limita te na yiunan (reconoci) di menor di edad cu ta forma parti di e famia.

Como tal, a tuma e consehonan di RvA y como tal, e Minister a dicidi pa manda e proyecto di cambio di ley pa Parlamento pa haya aprobacion. Mirando cu ta den reces, no a pone fecha ki tempo lo trat’e.