Digitalisacion, revision di derecho di existencia di servicionan y creacion di un institucion di conocemento pa planifica futuro. Esaki ta parti di e consehonan cu Raad van Advies a duna Gobierno di Aruba pa logra un modelo socioeconomico resiliente y duradero. Entre otro, a publica sugerencianan con pa mehora e clima di inversion y con Gobierno mester crea un organisacion cu ta mas dirigi na servicio na cliente.

 

Entidad publico

Di e forma aki Raad van Advies a duna un conseho riba entidadnan publico di Gobierno. E institucion ta kere cu mester atende cu entidadnan publico cu ta ineficiente y cu ta den problema financiero.

Hopi biaha ta tende di companianan di utilidad cu normalmente ta produci dividendo pa Pais Aruba. Pero tin diferente otro compania cu ta di Gobierno pero cu ta forma un peso financiero pisa. Ta trata aki di Arubus NV, Post Aruba NV y Serlimar. E tres companianan aki no por sobrevivi sin sosten financiero for di presupuesto di Aruba. Tur tres ta ricibi anualmente contribucionnan substancial di Gobierno.

Pa hopi aña a mustra riba e tendencia negativo aki y a conseha cu enfasis cu mester trece claridad den e posicion financiero di e companianan aki y cu mester tuma medidanan efectivo pa limita e riesgonan financiero pa Pais Aruba. Pa un maneho di participacion eficiente y efectivo, e ta crucial pa den e cuadro aki bin un direccion di maneho profesional y central pa tur tres. Esaki por keda realisa pa medio di un departamento separa di Ministerio di Finanzas of pa medio di un creacion di un entidad madre (holding) unda ta hinca tur e interesnan y balornan di e companianan aki. Banda di esaki ta importante pa analisa periodicamente cua actividad cu por of mester keda ehecuta pa e entidadnan publico aki. Ademas por pensa pa permiti participacion di inversionistanan institucional local den e entidadnan aki.

Mehoracion di eficiencia di costo di aparato gubernamental

Raad van Advies ta kere cu mester haci un evaluacion riba cua ta e tareanan actual cu realmente ta pertenece na Gobierno, particularmente e diferente partinan di e aparato actual. Mester mira si nan tin un balor agrega cu ta permiti sigui carga nan bao di e circunstancianan actual. Como tal, Raad van Advies ta sostene e opinion di Fondo Monetario Internacional, IMF, cu a bisa na 2015 cu mester atende e reorganisacion di Gobierno na forma fuerte y sin perde tempo. IMF ta conseha pa haci un reinventarisacion di e aparato publico.

Pa por logra un eficiencia di costo den e cuadro aki ta recomenda pa apunta un secretario general cu su personal necesario na cabez di un cantidad di ministerionan crucial, manera Asuntonan General, Finanzas, Husticia y Enseñansa, unda tambe ta mara e garantianan pa experticio y experiencia y pa evita nombracionnan politico. Esaki lo beneficia e stabilidad y continuidad di e ministerionan en cuestion.

Decreto institucion

Tambe lo mester legalisa locual a pone den e acuerdo di Gobernacion, esta cu ta maximalisa e cantidad di posicion pa cada Ministerio. Lo por uza como inspiracion e ley di Corsou riba e organisacion publico administrativo (Landsverordening ambtelijk bestuurlijke organisatie).

E derecho di existencia di algun departamento y servicionan mester keda evalua y unda por, sea ta elimina nan of ta integra nan den otro departamento of servicio di e Ministerionan, pa asina por logra baha e costonan. No tin un asina yama instellingsbesluit, decreto di institucion, pa algun servicio. Pa motibo cu tin diferente servicio cu no tin e decreto aki, no ta hopi cla ki tarea nan ta ehecuta, of si tin diferente servicio di Gobierno cu tin practicamente e mesun responsabilidad of tarea, of si algun tarea publico no a keda ehecuta mes. Ademas, e hecho cu hopi servicio di Gobierno no tin un decreto di institucion, no ta trece claridad adelanta pakico mester tin cierto servicionan y pakico nan mester ta di e grandura cu nan tin.

Rebaho y maneho di gasto di personal

Banda di e limitacion di ahuste di inflacion riba salarionan di ambtenaarnan (salarisindexering), e limitacion di overtime y reduccion di e cantidad di personal publico pa motibo di desplazamento, mester evalua e necesidad di algun funcion. Sea ta elimina nan, reevalua nan of agrega nan na otro, mientras cu ta cuminza haci mas uzo di digitalisacion. Tur mester ta dirigi na reduci e gasto di personal.

Pero sigur mester atende cu e asina yama overtolligheidspool, esta e cantidad di empleadonan publico cu pa motibo politico no tin un funcion asigna, pero toch ta sigui cobra.

Renobacion di procesonan interno

Por logra simplificacion di proceso di belasting y permiso uzando medionan digital, entre otro door di por entrega formulario di belasting of peticion pa permiso online. Raad van Advies ademas ta kere cu mester integra e database di diferente instancia publico, manera SVB, AZV, SIAD, Censo y Camara di Comercio, ademas cu mester ehecuta un asina yama ‘data mining’ pa yuda cu aplicacion di ley. Mester introduci un number di persona unico pa tur servicio di Gobierno.

Sistemanan di informacion di nivel

Den e nota di maneho financiero-economico ‘Vision, curashi y disciplina’ di 2002 a mustra caba riba e importancia pa por yega na un bon sistema di informacion riba nivel financiero y economico pa Aruba. Pasobra ta unicamente a base di fluhonan di informacion economico y financiero cu ta actual, completo y frecuente, por midi y evalua e impacto di e maneho riba momentonan specifico.

E grupo di estudio Finanzas Publico den su nota tambe a mustra riba e importancia pa instala un Instituto Independiente cu ta encarga cu genera pronosticonan financiero-economico, un sistema similar cu e Centraal Planbureau di Hulanda. Raad van Advies ta kere cu mester pensa pa lanta un institucion asina den conhunto cu otro paisnan di Caribe Hulandes, mirando cu e ta rekeri un personal cu tin hopi conocemento y como tal, tin un costo di operacion relativamente halto. Raad van Advies ta kere cu mester compara e instituto aki cu e construccion di Corte Comun di Husticia of te hasta ta sugeri un colaboracion cu e Centraal Planbureau di Hulanda.

Creacion di un maneho consistente di reserva y dividendo
 Tin un necesidad pa un maneho general di participacion na interes di e accionnan di Pais Aruba. Ta crucial pa specifica asuntonan manera kico ta e papel di of pasonan cu e pais como accionista mester ta of tuma. E ta logico cu e papel di coordinacion ta cay bao di e Ministerio unda tur participacion y eventual otro entidad publico ta resorta. Raad van Advies a haci e pregunta na varios ocasion, con leu e pago di dividendo no ta conduci na erosion innecesario di e entidadnan en cuestion pa asina por cubri e buraconan presupuestario di Pais Aruba. E advertencia ta cu pasonan asina a corto termino ta trece e situacion financiero di e entidadnan aki den peliger, pero cu a lo largo lo tin consecuencianan financiero mas grandi ainda pa Pais Aruba. Pasobra den caso cu e entidadnan aki haya nan mes den problema financiero, ta Pais Aruba como accionista lo mester remedia e situacion. Como tal, Raad van Advies ta haya necesario cu mester institui y ehecuta un maneho consistente di participacion, di reserva y dividendo, basa riba e hecho cu asina ta haya un bista riba e posicion financiero y di capital di e entidadnan aki, y e ora numa por evalua con y con leu por permiti e pagonan di dividendo.

Digitalisacion y automatisacion di Gobierno

Digitalisacion di mas actividad publico lo no yuda unicamente na baha gasto publico pero lo yuda e servicio cu ta duna na e ciudadano. Segun Raad van Advies, un servicio mas rapido ta conduci na un cliente satisfecho mientras cu e ta nifica alabes cu tin menos gasto administrativo pa ciudadano y empresanan. Como tal, Raad van Advies ta urgi pa haci mas uzo di e-government y tambe ‘big data’ denter di e sector publico y haci esakinan accesibel pa asina mehora efectividad y productividad di Gobierno. A corto termino e por keda traduci na por ehempel pa otro departamentonan acopla of permiti acceso na e registro di Censo, di forma cu ta minimalisa e necesidad pa cada biaha saca copia di e ‘papel di cinco florin,’ por ehempel pa ora cu mester di saca rijbewijs.