E conseho di Raad van Advies (RvA) duna pa e proyecto di ley encuanto maneho di desperdicio entrega recientemente na Parlamento, ta contene varios punto di interes y importancia pa un bon debate y tratamento di e ley aki.

Pa cuminsa, RvA ta constata cu gobierno mes ta bisa cu mester bin ainda cu un ley general pa maneho di desperdicio y cu e ley actual ta solamente pa regla algun asunto urgente pa garantisa financiamento sano di Serlimar. Ta anuncia si cu lo bin cu un ley cu reglanan general pa maneho di desperdicio y cu internamente ya ta trahando riba esaki.

Raad van Advies ta haya esaki un manera ilogico di atende e problematica. Si ta reconoce cu un maneho integral di henter e problematica di desperdicio ta clave, y cu hasta ta consciente di e necesidad di bin cu un ley general cu ta establece e reglanan general di wega, pakico anto ta pasa prome e ley mas specifico cu ta duna e cuadro dentro di cual ta defini y limita e espacio di operacion di Serlimar y di e otro operadornan riba e mercado aki. Manera e asunto ta awor, ta tuma decision pa cu e problematica mas general di maneho di desperdicio principalmente for di e angulo di yega na un situacion operativo y financiero saludabel pa Serlimar. Di e manera aki, segun RvA, no ta tuma na cuenta otro alternativa pa resolve e problematica general di desperdicio cu posiblemente, mira for di interes social, economico y tambe interes di gobierno mes, ta mas practico, mas rendabel, mas duradero y eficiente encuanto costo tambe.

RvA ta haya cu ta necesario, pa prome, expone prome e vision mas amplio pa cuminsa cu e definicion di e problema y ademas cu e efectividad di e solucion proponi no ta ser ilumina suficientemente. Despues lo mester bin cu un ley cu ta defini e reglanan general pa e diferente categorianan di desperdicio, unda tambe ta stipula con ta recolecta y procesa esakinan, pa despues dicidi ken ta bay haci kico, a base di sea concesion o permiso, y cu ki autorisacion. RvA ta haya cu di e manera aki ta haya un miho bista riba e problema general y cu di e manera aki por crea e cuadro legal pa medio ambiente mas realisabel pa e problematica di desperdicio.

Pa loke ta e definicion di e termino ‘beheer van afval’ RvA ta observa cu si ta intencion cu Serlimar ta e unico instancia cu ta ocupa cu esey, anto esaki no ta cuadra cu, di un banda e realidad cu ta bay pone e fase di deshaci di desperdicio den man di un ‘tercer persona’ (compania cu ta opera e insinerado proponi) y di otro banda tampoco cu e politica di gobierno encuanto e realisacion di un ‘economia circular’ unda principalmente iniciativa priva lo mester bay trece actividad di reciclahe of re-uzo y cu esaki anto no ta posibel, pasobra segun e definicion ta Serlimar so lo ta ocupa cu esaki. Ademas RvA ta constata cu empresanan cu actualmente ta operando instalacion di procesamento di desperdicio, tampoco segun e definicion eligi, lo por eherce e actividad aki. RvA ta puntra su mes si di berdad esaki ta e intencion, y si a duna suficiente atencion na e consecuencianan cu esaki ta bay tin. E limitacion di actividadnan riba e tereno aki di otronan lo por tin un efecto negativo riba economia di Aruba, segun RvA. Tambe e Conseho ta observa cu en general esaki ta duna un señal negativo na luga di crea un clima faborabel pa inversion na Aruba.

Cobransa di varios impuesto

Un prome elemento di cobransa ta loke Serlimar lo bay cobra na tur hogar y tur entidad legal na Aruba. Segun RvA, tin un falta di claridad si tur e entidadnan cu no tin un empresa tambe lo mester paga. Esakinan por ta fundacion, asociacion y otro institucion cu no tin un empresa. Tampoco tin un claridad pa loke ta e personanan individual cu ta biba na e mesun adres unda tin un empresa estableci.

Pa loke ta e tarifanan (Afl. 210,- pa vivienda; empresa chikito Afl. 300,-; Afl. 420,- pa empresa mayor) RvA ta haci e pregunta pakico gobierno no a scoge pa maneha e principio di ‘de vervuiler betaalt’ (‘esun cu ta susha, ta paga’) loke por a conduci na un tarifa mas halto pa e empresanan grandi cu ta produci mas desperdicio.

Pa loke ta e tarifa cu ta maneha pa recolecta desperdicio na e adresnan, ta constata cu esaki no ta cubri e gastonan real haci. “Cu otro palabra, ta ofrece e servicio di recolecta di Serlimar bou di condicion cu no ta conforme mercado.” Ademas cu pa cierto persona (pensionado, hende den bijstand) tin e posibilidad di paga un tarifa reduci o hasta cero. E proposicion aki segun RvA lo por ta un estorbo pa mercado (unda e ‘level playing field’ ta?) ya cu e otro operadornan den mercado lo no por ofrece nan servicio na e prijs ey, sin mina e situacion financiero di nan empresa, segun RvA.

Aki atrobe RvA ta observa cu e maneho proponi pa gobierno no ta cuadra cu e politica economico di gobierno pa stimula actividad economico, ‘entrepreneurship’ y inversion den sector priva. Ademas RvA ta haya e areglo aki no ta stimula economia, ni tampoco completamente husto pa cu e empresanan di recoleccion existente y ta haya cu mester bin cu un hustificacion pa e medidanan proponi cu ta stroba mercado, o cu ta scoge pa un otro areglo cu no tin e efecto negativo aki.

E conseho extenso di RvA riba e proyecto di ley ta contene varios otro punto interesante, pero pa awor nos ta limita nos na e resumen aki. E conseho completo ta disponibel riba website di Raad van Advies: rva.aw/pages/adviezen-landsverordeningen-2019