Recientemente Raad van Advies (RvA), e organo constitucional di conseho pa gobierno di Aruba, a ofrece nan relato anual na Prome Minister.
Den su introduccion, presidente di RvA, mr. Frits Goedgedrag a mustra riba e relacion mehora di colaboracion entre e Conseho y gobierno, algo cu no semper tabata asina. Loke a crece, segun Goedgedrag, ta e pensamento cu e Conseho no ta un adversario di gobierno, pero ta un asesor critico cu ta desea di contribui na un producto legislativo mas optimal posible.
Esey no ta kita cu e ta trece dilanti algun observacion critico. Un di e asuntonan cu e ta señala ta e gran cantidad di proyecto di ley cu ta yega na RvA cerca di fin di aña, cu mester drenta na vigor ainda pa 1 di januari di e siguiente aña. E tempo ta relativamente cortico pa duna conseho, y pa e tratamento den parlamento. Esaki ta trece cune e peligro di un reaccion debil di gobierno riba e consehonan di RvA, y un tratamento di menor calidad y contenido den Staten. Esaki ta sumamente indeseable, sigur si ta trata di topiconan compleho. Esaki no ta un fenomeno na Aruba so. Tambe den e otro paisnan di Reino ta mustra riba e tratamento demasiado rapido di proyectonan di ley di banda di tur e actornan den e proceso. Pa combati esaki, RvA ta boga pa un miho planificacion di e proceso di legislacion.
Otro desaroyo cu ta motibo di preocupacion pa RvA ta e implementacion di ley. Esaki ta algo cu ta toca tur proyecto di ley cu RvA ta trata, y esey ta motibo tambe pa trece esaki dilanti den e relato di 2018. Mirando e consehonan duna den e aña, RvA ta boga pa na momento di formula legislacion caba tuma na cuenta e aspecto di implementacion y e gastonan, financiero y di otro indole, relaciona cu esaki.
No ta esencial solamente pa por conclui di un propuesta di ley ki problema tin pensa di atende cu e ley, sino tambe con e legislador tin pensa di ataca e problema y ken(nan) lo ta envolvi den e implementacion. Un analisis profundo di e aspectonan di implementacion, manera e capacidad y experticio di e organisacion cu ta implementa, e gastonan relaciona y e implementacion mira for di perspectiva di e ciudadano, y anticipando tambe e fasenan cu por distingui, lo por yuda pa evita cu lo tin problema despues den implementacion di e ley.
Un ehempel cu e relato ta menciona ta e institucion di un Parke Marino entrante 1 di januari 2019 . Den esaki a designa un cantida di zona den awanan di costa di Aruba como ‘natuurreservaat’. RvA ta aplaudi e prome paso aki, pero ta mustra tambe cu proteccion berdadero ta mas cu e designacion y cu supervision efectivo, y mantencion di e reglanan tambe mester ta parti di esaki.
