Conseho Consultivo di Aruba (Raad van Advies) den su conseho riba e proyecto di ley di Reino pa establece e organismo COHO, ta expresa critica riba varios aspecto di e documento.

Despues di den su introduccion repasa e situacion di crisis di maart 2020, cu a bira causante directo di e crisis financiero cu Aruba riba su mes no por a maneha, y seguidamente e oferta Hulandes pa ayudo, mara na condicion, explicita den e Landspakket, e paquete di medida cu gobierno di Aruba mester a acorda pa por haya e ayudo financiero pa complementa e recursonan seriamente reduci, RvA ta pasa pa analiza e caracter di e ley di Reino, cu ta basa riba articulo 38, inciso dos di Statuut, loke ta encera cu e ta un asina yama ley di ‘consenso’. Esaki segun RvA ta conta tambe pa e ley di supervision financiero (RAft) – na vigor caba pa e otro islanan – cu mester bin reemplaza e ley di Aruba (Laft), riba cual tabatin consenso caba, en todo caso en principio, no pa su contenido. E Conseho ta puntra su mes den ki sentido por ta papia di consenso real, si na e momento di aproba e isla(nan) tabata completamente dependiente di e ayudo Hulandes di liquidez, y cu tabata obheto di hopi discusion y cu a pone e relacionnan den Reino bao hopi presion, den un pabdemia di alcance sin precedente di cual ta dificil pa por evalua e consecuencianan, mientras cu na e momento ey solidaridad y colaboracion lo mester tabata central den Reino, segun RvA.

Si kier papia di berdadero consenso, RvA ta haya cu durante henter e trayecto legislativo mester tin acuerdo entre e paisnan tocante e utilidad, necesidad y e contenido di e propuesta. E falta di, o e ausencia na dado momento di e consenso ey, ta implica cu no por continua cu e procedimento y cu no por realiza e ley di Reino, ta opinion di RvA.

Segun RvA, e secretario di estado pa Asunto Interno y Relacion den Reino ta bisa cu e metodo maneha pa su persona, “aunke no ortodoxo”, no ta surpasa limite di derecho estatal. Den su carta na presidente di Tweede Kamer e secretario ta argumenta cu e idea inicialmente no tabata pa crea un propuesta carga pa tur partner, pero arma un construccion huridico cu cual di manera efectivo y responsable por realiza e reformanan necesario.

A puntra Aruba pa bay di acuerdo cu e propuesta aki. Sin embargo, si Aruba no a bay di acuerdo cu e propuesta aki, Aruba lo no a bin na remarca pa ricibi e siguente ‘tranche’ di ayudo financiero. Aunke esaki formalmente ta cay dentro di e limitenan di derecho estatal, segun RvA por duda si e metodo aki, cu a hiba ademas na hopi discusion y perdida di tempo, ta den linea cu e principionan basico di Statuut y si den un situacion asina por papia di un consenso real.

Ya cu e propuesta di ley presenta na RvA pa su conseho, tin como base articulo 38, inciso dos di Statuut, y cu por lo tanto ta trata di un ‘consensusrijkswet’, den su conseho RvA ta tuma como punto di salida cu di berdad ta existi un consenso, aunke cu, segun RvA, mester constata cu ‘de hecho’ ta trata di un consenso forza. Esaki ta haya su refleho den caracter y structura di e proyecto aki, cu segun Rva ta caracteriza pa un amontonamento di facultad (bevoegdheid) di supervision cu poco posibilidad pa input y guia di e gobierno local.

Y e metodo aki ta encera segun RvA varios factor di riesgo, cu den curso di e conseho lo ser trata pa e Conseho. Tambe RvA ta haci algun recomendacion pa e propuesta aki por ta mas den linea cu e espiritu di Statuut, cu ta tuma como punto di salida e igualdad di e paisnan cu ta duna otro ayudo y asistencia.

Den e sentido aki, un colaboracion a traves di un organismo conhunto, manera intenciona den articulo 37, inciso uno di Stauut segun RvA lo tabata mas di acuerdo cu e intencion aki.

NOTA di Redaccion:

Articulo 1, inciso 1 ta bisa: “Hulanda, Aruba, Curaçao y Sint Maarten lo hiba consulta mas tanto posible tocante tur asunto, unda interes di dos o mas pais ta involucra. Pa esey por designa representante special y por institui organismo comun.”

Como asunto pa considera den e articulo aki, ta menciona, entre otro, y no limita na esey: Relacionnan cultural y social entre e paisnan; stimulacion di relacion efectivo entre e paisnan riba tereno economico, financiero y monetario; promocion di resiliencia economico a traves di ayudo y asistencia entre e paisnan; y asunto manera aviacion, trafico maritimo y telecomunicacion.

Den e dianan venidero lo dedica mas atencion na e conseho extenso riba e ley di COHO den nos siguiente edicionnan.

Potret di archivo.