Mirando e evolucion demografico, e sosteniblidad di e sistema di seguridad social den su forma actual y su financiamento actual ta bao presion y no ta sostenibel a largo plaso. Esaki no ta conduci solamente na tur tipo di consecuencia social y socioeconomico indesea, pero door di e obligacion di gobierno pa cubri e deficit den tanto AZV como SVB, e dobel embehecimento ta constitui un menasa directo tambe pa e finanzas di e pais.

Manera ya caba indica den nos edicion anterior, den e jaarsverslag aki Raad van Advies ta trata e aumento di emebehecimento di e comunidad di Aruba. E proceso aki a haci ya caba necesario cu den pasado a aumenta e edad di pensioen AOV di 60 pa 65 aña. Manera ya caba indica, e proceso aki no a termina ainda y e poblacion Arubano lo embehece ainda mas den e proximo decadanan.

Esaki ta nifica un carga mas pisa riba e finanzas publico, particularmente riba e pensioen di biehes AOV y riba e cuido den salud. Pa e desafionan aki ta hopi importante pa maneha esaki enfocando ariba e sostenibilidad di e finanzas publico pa tin suficiente espacio pa e servicionan necesario.

Cu e jaarverslag aki, e entidad ta esforsa nan mes pa informa e gobierno di Aruba y tambe e otro partidonan interesa, pa duna un man y participa den e proceso di desaroyo di conocemento, vision y politica pa loke ta trata e consecuencianan social y socioeconomico di embehecimento pa e sociedad di Aruba.

E embehecimento di e poblacion ta nifica un reto nobo pa e sosteniblidad di e finanzas publico a largo plaso. E sostenibilidad aki ya caba ta bao presion debi na e aumento grandi di e debe publico pa motibo di e pandemia di Covid-19.

E gasto publico total relaciona na edad (pensioen, salud y cuido riba largo plaso) lo sigui aumenta debi na e embehecimento di e poblacion. E ingreso di gobierno tambe por wordo afecta negativamente pa e embehecimento aki, mirando entre otro e escasez den e mercado laboral.

Segun e entidad, e combinacion desafiante di elementonan anteriormente menciona, e cambionan interno di e demografica, e salida di persona potencialmente altamente educa, restriccionnan pa entrada for di exterior den e mercado laboral, e break den e crecemento economico, e demanda creciente riba atencion y e presion riba e seguridad social, ta contribui na e desaroyo di un asina yama ‘tormenta perfecto’ of un problema maligno: un problema sin structura y pa cual no tin un solucion simpel na e momentonan aki.

Nan ta enfatisa cu tin un problema multidimensional cu e aspectonan sociopolitico, aspectonan economico y etico, manera ta e distribucion igual di e recursonan escaso.

E velocidad cu cual e tormenta aki ta biniendo direccion pa Aruba ta hiba na un presion insostenible riba e fondonan social, finanzas publico y sociedad, si no tuma accion adecua rapidamente. “E resiliencia di nos pais ta wordo poni na prueba un biaha mas,” Raad van Advies ta indica.

Mester presenta solucionnan structural pa enfrenta e tormenta aki y usa nan den un dialogo social amplio. Aunke por declara cu “e embehecimento activo y saludable” ta un responsabilidad y un eleccion personal, sinembargo e ta depende hopi di e ambiente den cual e persona ta biba y socialisa.

Como tal, e hunta ta spera un politica solidario y facilitador di adultonan mayor, no solamente di parti di gobierno, pero e otro stakeholders tambe mester ta involucra den e creacion di condicionnan di e marco cu ta stimula un proceso di embehecimento saludable y activo.

Den Raad van Advies su opinion, mester examina particularmente e importancia di educacion den e proceso aki, tanto den educacion regular como e asina yama ‘life long learning’ (enseñansa di bida largo) inspira den un parti pa e falta di oferta di educacion superior na Aruba, e problema di conexion entre pre-educacion y educacion superior y e ‘brain drain’ anteriormente menciona.

Den diferente investigacion ta enfatisa particularmente e importancia di e ‘life long learning’ cu ta describi di tal forma: inverti den e conocemento, habilidad y competencia durante e bida di un persona ta forma parti di e respuesta na e desafionan di embehecimento.

Inversion continuo den e aprendisahe tin diferente efectonan positivo: adkiri y actualisa habilidadnan ta yuda e persona keda cu nan empleo, tin exito den e transicionnan na nan empleo y avansa profesionalmente, manteniendo nan na trabao y agregando na e satisfaccion laboral.

Den un mundo cu ta cambia rapidamente ‘life long learning’ ta un necesidad, manera oportunidadnan laboral y educacion ta cambia na un velocidad rapido. Aprendisahe continuo por yuda tambe retrasa e aparicion di demencia y preveni e deterioro cognitivo provoca pa biehes. E ta tambe un manera cu e adultonan mayor ta desempeña un papel activo den sociedad.

Cu inversion y gestion den e educacion, Raad van Advies ta subraya, por enfrenta e efectonan di embehecimento anteriormente menciona di diferente manera. Asina, un aumento den e porcentahe di educacion superior por hiba na un productividad laboral mas halto y por ofrece un solucion pa e necesidadnan cambiante den e mercado laboral.

Di otro banda, un investigacion internacional ta confirma cu nivelnan halto di educacion y un bon salud ta reforsa otro mutuamente. No solamente pa un miho calidad di bida di e clientenan mayor, door di cual nan tambe, potencialmente, por contribui pa un tempo mas largo na e economia, pero tambe pone menos presion ariba e infrastructura di salud.

Den conclusion, Raad van Advies ta observa cu tanto den e desafionan di embehecimento anteriormente menciona, un embehecimento sano y activo ta un proceso cu tin hopi oportunidad y posibilidad pa ambos e individuo y e sociedad. Oportunidad- y posbilidadnan cu tin un efecto na momento cu pensa riba cu e emebehecimento ta rekeri un enfoke proactivo di tur e stakehodlers, paden y pafo di gobierno, hoben y bieu.