Den su ultimo conseho encuanto presupuesto 2024 di gobierno di Aruba, Conseho Consultivo (Raad van Advies; RvA) a opina cu despues di e crisis di Covid-19, Aruba su economia a recupera di forma remarcable, pero cu esey a conduci na un dependencia mas fuerte ainda di turismo. Esaki segun RvA ta enfatiza mas ainda e necesidad di un diversificacion di economia, pa por contraaresta e dependencia aki.
Den su analisis RvA ta referi na opinion di Fondo Monetario Internacional (IMF) y di Departamento pa Asunto Economico, Comercio y Industria (DEZHI). IMF pa 2024 ta anticipa un crecemento economico nominal di 2,7% y un crecemento real di 1,2%. DEZHI ta proyecta den nan scenario basico pa 2024 un crecemento nominal di 4,6% loke ta resulta den un Producto Interno Bruto (PIB, GDP) di Afl. 6.828 miyon. E crecemento aki pa gran parti ta debi na un aumento di e cifra di exportacion di turismo (pago pa servicio turistico; red.) te un suma cu ta representa un aumento di 35,5% compara cu aña 2019. E GDP pronostica pa 2024 lo ta 12,3% mas cu e GDP di 2019, aki lo tin un indicacion fuerte cu e contribucion di turismo den nos GDP a conoce un aumento den comparacion cu 2019. Den e tabel adhunto por mira e corelacion entre turismo y GDP, manera presenta pa RvA den su conseho.
Sostenibilidad economico
E desaroyo aki no ta cuadra cu e plannan di gobierno di diversifica y mitiga e riesgonan economico, manera ta aparece den varios informe den ultimo añanan, durante pandemia di Covid-19 o despues, cu gobierno a presenta. RvA ta puntra su mes con leu e accion y metanan a keda logra y kico ta nan contribucion na economia di Aruba. E splicacion di proyecto di ley no ta mustra cual ta e estado di asunto relaciona cu ehecucion di e plannan aki y e metanan di e plannan aki pa diversificacion di economia cu a keda realiza o no a logra ainda. RvA ta considera importante cu, apesar di e resultadonan positivo na nivel di GDP, gobierno tuma medida concreto pa diversifica economia y asina aumenta resiliensia di economia. Den combinacion cu aumento di gasto publico na 2024, Pais Aruba ta den mas riesgo cu antes awor cu economi di Aruba ta parce di ta mas dependiente di su principal pilar economico, turismo.
Nota di redaccion:
E cifranan presenta pa RvA ta mustra cu ta e parti di economia cu ta probecha di e poder di compra genera primeramente pa turismo, ta kedando relativamente atras. Esey ta debi na e parti di economia cu a bay perdi durante e pandemia, cu lo tarda mas pa bolbe, si acaso. Conseho di RvA tocante diversificacion ta uno logico, y esey ta aparece pa hopi aña caba. Sin embargo, esey no ta haci e tarea aki mas facil. Hecho ta cu henter nos region ta lidia cu e tema aki, en busca di forma alternativo pa aumenta e base di divisa cu un pais mester pa mantene su posibilidadnan pa importacion. Henter Caribe y mayor parti di Latinoamerica ta sinti di manera cronico e necesidad aki, pero den hopi caso no ta logra, loke ta e causa principal di nan inflacion continuo. De hecho, turismo den ultimo decadanan tabata e refugio cu hopi pais den nos region a busca na momento di caida di otro sectornan mas antiguo di nan economia, manera produccion agricola di exportacion (sucu, bacoba), o industria petrolero (Trinidad & Tobago, Corsou, Aruba, St Croix). Aruba tambe a adopta e alternativa di turismo, cu hopi exito, pero mescos cu otronan ta topa hopi obstaculo pa e desaroyo post-turismo.
