Recientemente Raad van Advies a publica su relato anual di aña 2024. Den esaki e Conseho ta subraya dos desaroyo importante pa loke ta e structura di organisacion gubernamental, e manera con ministerionan ta ser estableci y conforma, y independisacion di instancianan gubernamental. Teniendo na cuenta e proceso di formacion pa un gabinete di gobierno nobo, Raad van Advies ta trece dilanti puntonan importante pa e loke ta e conformacion di ministerionan pa e gobierno nobo.

Raad van Advies ta scoge tur aña un tema pa su relato anual cu por ser relaciona cu e conseho cu el a duna durante e aña pasa. Desaroyo durante e aña di rapport ta sirbi como un tipo di ‘trigger’ pa scoge un tema determina, ya sea pa motibo cu e tabata den e atencion publico, of pa motibo cu el a ser poco resalta apesar di e necesidad urgente pa un solucion y pasonan concreto.

Ora e Raad van Advies scoge un tema specifico, e ta stimula gobierno y otro stakeholdernan pa desaroya mas politica y/of tuma accion concreto. E tema di e aña aki a ser scogi riba base di su presencia repetitivo den e consehonan di Raad van Advies durante e ultimo añanan. Den termino general, e ta trata di e structura di organisacion gubernamental.

Raad van Advies ta señala cu si wak e structura di organisacion gubernamental, por nota dos desaroyo importante. E prome ta trata di e manera con ministerionan ta ser estableci y conforma, cu ta cambia den tur periodo di gobierno. E di dos ta trata di e ola continuo di independisacion di instancianan gubernamental. E Conseho ta indica cu ambos desaroyo ta caracterisa hopi biaha pa decisionnan cu no ta basa riba fundamento solido y cu poco transparencia, causando un fragmentacion cu no ta beneficia e coherencia y unidad di tanto e structura como e politica di gobierno.

Raad van Advies a remarca cu e desaroyonan menciona a preocupa nan te na tal punto cu na april 2024 nan a dicidi saca un conseho basa riba articulo 25, parti a, di e Landsverordening Raad van Advies. E conseho aki tabata den forma di un orientacion general, den cual e Conseho tabata desea pa duna algun punto di referencia den e proceso di pensamento tocante e structura di organisacion gubernamental, specialmente den contexto di e eleccionnan di futuro, cu originalmente tabata plania pa juni 2025, pero cu a tuma luga dia 6 di december 2024 despues di caida di Gabinete Wever-Croes II.

Raad van Advies ta splica cu aunke e conseho a ser presenta na gobierno y na Parlamento den e comienso di mei, pa momento di ciere di e aña di rapport a keda constata cu ni e analisis ni e recomendacionnan di e Conseho a resulta den algun tipo di reflexion, y menos ainda den algun tipo di cambio di rumbo. Contrario, e proceso di fragmentacion y independisacion a sigui progresa sin pauze.

E Conseho a indica cu durante aña pasa, varios proyecto di ley a ser introduci den e proceso legislativo. Entre nan tin e proyecto di Landsverordening pa e creacion di Aruba Quality and Hospitality Authority, y e proyecto di Landsverordening pa cuenta di pago basico, cu ta crea entidad nobo.

Raad van Advies a señala cu na momento cu e orientacion a ser presenta na Parlamento y gobierno, e proyecto di Landsverordening pa e transferencia di e red di awa di riool y e instalacion di incinerator di sushi tabata den discusion na Parlamento.

E Conseho a remarca cu a pesar di e recomendacionnan firmemente expresa den e conseho di october 2023, nan preocupacionnan serio no a ser atendi suficientemente, y como resultado, e proyecto di Landsverordening a ser aproba pa Parlamento dia 30 di mei 2024.

Den su conseho, Raad van Advies a indica, entre otro, e siguiente riba e independisacion aki.

“E situacion cu ta relaciona cu e creacion di un marco di politica general pa e maneho y proceso di desperdicio, incluyendo awa di riool, ta keda ainda sin mucho claridad. Tampoco a ser indica kico ta e plan pa implementa e producto legislativo necesario pa e politica aki, ni con e independisacion proponi di e RWZI’s (Rioolwaterzuiveringsinstallaties, red) y e instalacion di e incinerator di desperdicio na Parkietenbos ta ahusta den e politica general.

E conseho di Raad van Advies a señala tambe cu ademas e fundamentacion financiero no ta satisfactorio y no ta pone atencion riba alternativanan posibel. E Conseho ta resalta e necesidad di crea un N.V. separa specialmente pa maneha e plantanan di RWZI y e instalacion di incinerator na Parkietenbos no ta sostene di manera suficiente.

Raad van Advies a enfatisa cu e falta di un marco legal general relaciona cu e proceso di maneho di desperdicio ta sigui laga sin claridad kico ta e normanan cu AWSS N.V. (e doño nobo di e plantanan di RWZI y e red di sistema di awa sushi.) mester sigui, y si esakinan por ser controla di tal manera cu e interes publico, manera medio ambiente y salud di pueblo, ta bon proteha.

Pa motibo di esaki, e Raad van Advies a recomenda pa realisa e cuadro huridico necesario prome cu a pasa over na e independisacion.

E Conseho a conseha tambe pa reevalua e introduccion di e sustainability fee y implementa of adapta e Retributiebesluit rioolwaterafvoer di tal manera cu tur usuario ta contribui na un manera proporcional pa un maneho di awa di sushi sostenibel, respetando e principio di “esun cu ta contamina ta paga”.

E conseho di Raad va Advies no a ser sigui, y e consecuencianan di un independisacion no bon plania y no bon implementa a cuminsa wordo sinti. Raad van Advies ta señala cu te ainda, e problema relaciona cu e transferencia di e plantanan di RWZI’s no a ser resolvi na un manera adecuado, mientras cu e asina yama sustainability fee, cu tabata destina pa cubri e explotacion di e plantanan di RWZI’s, ta ser cobra sin solucion cla na lugar.

Raad van Advies ta subraya cu awor cu no solamente un aña nobo a cuminsa, pero ademas tambe ta para na drempel di un periodo di gobierno nobo, ta e momento oportuno pa trece e orientacion di e Conseho riba organisacion gubernamental bek den atencion publico cu e speransa cu lo e hiba na algun reconsideracion y cambio di rumbo.