Raad van Advies ta e organo consultativo di Aruba y e consehero independiente maximo di Gobierno y Parlamento riba e tereno di legislacion y gobernacion. RvA ta, mescos cu Controlaria General y Parlamento, un Colegio Maximo di Estado (Hoog College van Staat). Cual ta un institucion cu ta regla den Constitucion y cu tin un tarea cu nan ta ehecuta independiente di Gobierno y Parlamento.

E tarea principal di e RvA ta duna conseho tocante proyecto di ley y cu esaki e organo ta hunga un papel importante den trahamento di ley. Banda di esaki RvA ta autorisa pa duna conseho riba propio iniciativa tocante e asuntonan cu ta regarda su tereno di trabou. Gobierno y Parlamento por pidi e organo pa duna nan conseho riba asunto cu pa definicion no ta pertenece na e tereno di trabou di e Organo.

Diaranson ultimo e organo a publica e rapport anual di 2023, Jaarverslag 2023, titula ‘Resilencia, resistencia y autonomia’, cual ta elabora ariba e diferente topiconan di importancia pa Aruba.

E rapport ta subraya na principio di aña 2023, finalmente, despues di casi 20 aña, e pasenshi y e persistencia di e organo a ser recompensa cu e entrada na vigor di e ley ‘Landsverordening Raad van Advies ariba dia 1 di januari 2023.

E organo ta remarca cu e renobacion tan spera aki no tabata solamente un logro pa nan pa e condicionnan pa independisa y e reforsamento, mas ainda, di autonomia, pero tambe pa nan sistema hudicial. Cu esaki, un contribucion importante a ser duna na e “checks and balances” cu ta esencial pa un democracia por funciona optimal.

“Trabao riba un democracia cu ta funciona bon ta un proceso continuo cu ta rekeri atencion y firmesa di papel di tur e actornan den e proceso aki. Cu e tema di nos rapport anual di 2023 cu ta titula‘Resistencia, resilencia y autonomia’ nos ta spera di duna algun ‘food for thought’,” e organo a enfatisa den e rapport.

Nan ta resalta cu e prome dos conceptonan ta crea un contradiccion cu e ultimo, sinembargo for di e rapport lo keda cla cu tin espacio pa e factornan aki por hiba e comunidad Arubano hunto na un nivel nobo, un nivel cu no solamente ta desea, pero tambe necesario.

E RvA ta remarca cu despues di e pandemia di COVID-19, a siña cu mester traha lihe riba e resistencia y resilencia di specialmente e economia di pais. E comprendemento general cu tabata existi na e momento ey a conduci na reaccionnan prome y lihe di gobierno, cu a wordo manifesta den diferente plan y idea. Sinembargo, nan a agrega, e recuperacion solido di e economia Arubano, basa riba e regreso di turismo y tambe na nivelnan mas halto cu prome cu e pandemia a yega, a realisa e temor anteriormente manifesta pa e organo consultativo. “Pasobra, di e plannan cu bon intencion y bon pensa tambe no por bisa cu nan a wordo concretisa, por lo menos significantemente,” RvA a resalta.

E organo ta subraya cu ta parce cu e eliminacion di e presion financiero a move e enfoke pa discusionnan tocante un presunto atake na e autonomia di Aruba debi na e exigencianan cu Hulanda a pone tocante e cumplimento di acuerdonan anteriormente haci entre e paisnan. E cambio den e panorama politico Hulandes, RvA a destaca, causa pa e eleccionnan ta parce tambe di hunga un rol den e urgencia cu anteriormente tabata presente pa cumpli cu e diferente plannan pa finalmente aborda y mehora e situacion na Aruba ariba diferente tereno.

RvA ta subraya cu apart di e hecho cu mundialmente pa medio di cooperacionnan y integracion economico e concepto di autonomia den su sentido puro ta bira menos comun. E problema aki ta parce di ta mas un discusion politico cu e hendenan no ta realmente interesa den dje. Segun e organo e ciudadano promedio ta mas interesa den temanan manera diversificacion di e economia Arubano, mehoracion di infrastructura, enseñansa, servicionan entre otro.

E ta agrega tambe cu e pais en su totalidad ta enfrentando desafionan manera e problema serio di purificacion di awa residual (RWZI), escasez di personal den sector hotelero, mientras cu ainda tin construccion di hotel andando, y e escasez dramatico di vivienda pa e poblacion local.

E organo ta señala cu e tema di dubbele vergrijzing (embehecemento acelera) di e poblacion y e problematica social cu tin, specialmente entre e hobennan, tambe ta parti di e preocupacionnan cu ta preocupa e hendenan y ta mantene nan ocupa y na su turno ta desvia nan di un discusion abstracto tocante autonomia.

“Ta importante, pa motibo di esaki, pa dirigi e atencion atrobe na e meta cu a wordo estableci durante e pandemia. E discusion aki tambe ta wordo trata den e rapport anual di e aña aki,” RvA a indica.

Por ultimo, e organo consultativo ta resalta cu un di e cosnan cu ta yama atencion ta cu na aña 2023 a presenta menos proposicion di ley na e organo den comparacion cu e aña anterior. Nan ta subraya cu specialmente e final di e aña tabata, contrario na lo normal, hopi trankilo riba e tereno di ley.

E ta agrega cu pa e motibo ey ta posibel cu esaki lo cambia den 2024 debi na e hopi implementacion di politicanan cu a wordo anuncia, pero cu ainda no a ser implementa. RvA ta warda esaki cu interes y confiansa.