E Plataforma di Coordinacion Inter-agencia pa Refugiado y Migrante for di Venezuela a publica un Plan di Respuesta pa Refugiado y Migrante pa Aruba, pa aña 2025-2026.

Aruba ta keda un destinacion clave pa Venezolanonan desplasa buscando seguridad, stabilidad y oportunidad di integracion. E Plan di Respuesta pa Refugiado y Migrante (RMRP) 2025-2025, parti di e Sub-Plataforma Caribe, ta delinea e necesidadnan humanitario, e respuesta enfoca y rekisitonan financiero necesario pa atende e situacion efectivamente. E plan aki ta un esfuerso colaborativo involucrando diferente partner, incluyendo organisacionnan di sociedad civil, NGO internacional y agencianan di Nacionnan Uni, cu meta pa sostene tanto refugiadonan Venezolano como e comunidadnan afecta cu ta ricibi nan.

Cifranan clave di poblacion y evaluacion di necesidadnan

E proyeccion di poblacion pa Venezolanonan na Aruba ta keda stabiel, cu proyeccion di 12,200 individuo na 2025 y 12,400 na 2026. Di nan, aproximadamente 9,100 (74.2%) na 2025 y 9,200 (74.2%) na 2026 ta identifica como personanan den necesidad (PIN).

E plan di respuesta tin meta pa atende 50.3% di PIN na 2025 (4,600 persona) y 49.8% na 2026 (4,600 persona), demostrando un enfoke dunando prioridad na asistencia pa e poblacionnan mas vulnerable.

Ademas, miembronan di e comunidadnan anfitrion afecta den necesidad ta alrededor di 900 individuo na 2025 y 924 na 2026, cu 460 y 400 atendi respecitvamente.

Den termino di distribucion di genero y edad, e plan ta reconoce cu muhe y mucha ta compone un porcion significante di e personanan afecta. E division di genero ta mustra cu 46.7% di esnan den necesidad ta muhe mientras cu 39.2% ta homber, cu mucha homber y mucha muhe contando pa 6.6% cada un. E distribucion aki ta subraya e necesidad pa intervencionnan enfoca atendiendo vulnerabilidadnan basa riba genero, educacion y proteccion di mucha.

Rekisito financiero y partner di implementacion

Implementacion di e RMRP na Aruba ta rekeri un compromiso financiero substancial. Pa 2025, e presupuesto total ta para na $5.09 miyon, mientras pa 2026, e ta un tiki mas abao na $4.79 miyon. E fondonan aki ta bay sostene esfuersonan humanitario multi-sectoral, enfoca riba proteccion, salud, seguridad di cuminda y integracion economico.

Un total di cinco partner ta involucra den ehecuta e plan di respuesta:

Uno ta un NGO nacional (20%), un ta un organisacion lidera pa refugiado y migrante (20%), dos ta NGO internacional (40%) y dos ta agencianan di Nacionnan Uni (40%).

E coalicion diverso aki ta sigura un maneho bon balansa pa entrega di servicio, cu tanto experticio local como strategianan localisa di implementacion.

Division pa sector: Atendiendo necesidadnan critico

RMRP 2025-2026 ta contene varios sector humanitario, cada un diseña pa responde na retonan specifico enfrenta pa migrante Venezolano y nan comunidadnan anfitrion. E plan di respuesta ta inclui:

1. Educacion: Acceso a educacion ta keda un prioridad clave, cu 220 individuo (1.5% di e PIN total) enfoca na 2025 y 224 individuo (1.6%) na 2026. Notablemente, un porcion significante – 59.1% na 2025 y 53.6% na 2026 – di esnan den necesidad ta ricibi sosten, resaltando un enfasis fuerte riba programanan di retencion y integracion escolar. E rekisito financiero pa educacion ta para na $188mil anualmente.

2. Seguridad di cuminda: Cu un porcentahe halto di individuo enfrentando inseguridad di cuminda, 5,700 (42.2%) na 2025 y 5,800 (42.2%) na 2026 ta identifica como den necesidad di asistencia. Sinembargo, apenas 502 na 2025 (8.8%) y 400 na 2026 (6.9%) ta spera di ricibi sosten directo, mirando restriccion di fondo. E rekisito financiero di e sector ta $40mil anualmente.

3. Salud: Servicio di salud ta crucial, cu 5,500 individuo (41.2%) identifica como den necesidad na 2025 y 5,600 (41.1%) na 2026. Sosten ta plania pa 2,500 (45.1%) na 2025 y 2,000 (35.5%) na 2026, reflehando un capacidad fuerte pero reduciendo levemente, pa provee ayudo medico. E alocacion financiero di e sector aki ta $448,500 anualmente.

4. Transporte humanitario: Pa facilita movemento y sigura acceso na servicionan, 4,200 persona (31.3%) ta rekeri sosten di transporte na 2025 y 4,300 (31.3%) na 2026. Aproximadamente mil individuo pa aña ta bay ricibi asistencia, cu un presupuesto anual di $100mil aloca pa e sector aki.

5. Integracion: Esfuersonan pa integra refugiado y migrante den sociedad Arubano ta keda esencial, cu 5,300 persona (39.7%) den necesidad na 2025 y 5,400 (39.9%) na 2026. Un cantidad impresionante di 93.6% di esnan den necesidad ta bay ricibi sosten na 2025 y 92% na 2026, reflehando un compromiso fuerte pa programanan di empleo, cohesion social y asistencia legal. E rekisito financiero di e sector aki ta esun mas halto, cu $1.93 miyon na 2025 y $1.84 miyon na 2026.

6. Servicio di proteccion: Proteccion ta keda un enfoke central, atendiendo violencia basa riba genero (GBV), proteccion di mucha y riesgo di traficacion humano. Diesmil individuo (74.2%) ta rekeri proteccion na 2025, aumentando na 10,200 na 2026. Asistencia ta yega na mil persona pa aña, representando dies porciento di esnan den necesidad.

Sub-categorianan dentro di proteccion ta inclui:

-Proteccion di mucha: 767 individuo mester sosten na 2025, cu 350 (45.6%) enfoca pa ricibi esaki. Na 2026, e necesidad ta aumenta na 781, pero apenas 250 (32%) persona ta bay ricibi ayudo.

-GBV: 2,800 persona ta rekeri ayudo cada aña, pero apenas 10.5% (290) na 2025 y 5.2% (147) na 2026 ta bay ricibi servicio.

-Traficacion y contrabanda di hende: Un cantidad preocupante di 1,900 persona (14.5%) na 2025 y 2000 (14.5%) na 2026 ta den riesgo. Asistencia ta yega na 1,300 (66.8%) na 2025 y mil (52.2%) na 2026.

E presupuesto pa proteccion ta para na $919,700 na 2025 y $828,300 na 2026.

7. Shelter y WASH (Water, Sanitation and Hygiene): Shelter ta keda un reto, cu 3,700 den necesidad na 2025 y 3,800 na 2026. Apenas un fraccion – 6.8% na 2025 y 5.4% na 2026 – ta bay ricibi asistencia pa motibo di limitacion di fondo.

Sector WASH, a pesar di ta identifica como critico, tin falta di sosten enfoca, indicando un gap den servicio.

En conclusion, ta trata aki di un respuesta enfoca pero cu falta di recurso. RMRP 2025-2026 pa Aruba tin meta pa duna asistencia enfoca, multi-sectoral pa refugiado, migrante y comunidadnan anfitrion. Mientras e respuesta ta ambicioso, limitenan financiero ta limita e cantidad di beneficiario cu por ricibi sosten. E porcentahenan halto di hende den necesidad, particularmente den seguridad di cuminda, proteccion y salud, ta demostra e necesidad urgente pa aumento di fondo y colaboracion internacional.

Cu un presupuesto total di $5.09 miyon pa 2025 y $4.79 miyon pa 2026, e plan aki ta subraya e compromiso di Aruba pa accion humanitario. Sinembargo, recurso y partnership adicional ta bay ta crucial pa sigura cu refugiadonan Venezolano y e comunidadnan anfitrion ta ricibi e sosten comprensivo cu nan mester.