E prome intento di R. Kelly pa keda liber di prison pa motibo di miedo di coronavirus no a funciona, pero e ta bayendo bek – bisando cu su crisis medico ta pio ainda awo, insistiendo cu e no lo huy di e pais mientras ta warda su huicio.
E cantante desgracia a entrega un mocion di emergencia nobo, obteni pa TMZ, pidiendo pa lag’e den libertad basa riba cambio di circunstancia. Kelly y su team legal ta bisa cu na momento cu el a pidi libertad, e corte a nota cu no tabatin caso confirma di COVID019 na e prison na Chicago unda e ta cera actualmente. Segun e documentonan, esey no ta e caso mas.
Kelly ta bisa cu Centro di Coreccion Masculino di Chicago ta admiti cu tin sikiera 6 caso positivo confirma awo entre e prisoneronan – hunto cu 7 miembro di personal – y ta argumenta cu por pronostica cu e situacion lo empeora. E ta bisa cu si e no sali pronto, ta ‘un probabilidad absoluto’ cu e lo wordo ‘infecta cu e malesa mortal aki’.
Manera Bon Dia Aruba a reporta, un hues a nenga su prome peticion e luna aki, bisando cu e cantante no a logra splica con e no ta un riesgo di huy ainda. Kelly tabatin un contesta pa esey tambe. E ta bisa cu si e purba di huy, e lo ta ‘e persona mas obvio y reconocibel riba caya di Chicago, of cualkier luga di e pais, mirando e restriccionnan severo di keda cas’.
Ademas, Kelly ta bisa cu no tin vuelo p’e, e tin miedo di bula, y e no tin un paspoort ni medionan pa por bula. Segun e documentonan, el a bay di acuerdo pa vigilancia 24/7 y monitor di GPS pa sigura cu e no bay niun caminda ni topa cu niun hende otro cu su abogadonan.
E hues ainda mester tuma un decision.
