Recientemente a tuma luga instalacion di e directiva nobo di Quota International of Aruba pa e aña venidero 2016-2017.
Maestra di ceremonia tawata Quotarian Kristel van Nes , Quotarian Gladys Kock a presenta e invoccacion y Quotarian Life-time Member, y alabes, ex Gobernador di Distrito 42, Quotarian Noris van Lis-Donata a conduci e ceremonia di instalacion.
Esaki ta e di 30 Directiva pa Quota International of Aruba, cu ta celebrando nan di 30 aniversario na Mei 2017.
E directiva nobo pa Quota International of Aruba pa e aña 2016-2017 ta lo siguiente:
Gwendeline van Trikt-Rojer, Presidente, Laurel Romijn-Pope, Vice-Presidente,
Mirjam Auwerda-Jansen, Secretaria, Natascha Davelaar-Jansen, Tesorera, Erika Werleman-Giel, Directora di Asuntonan Huridico y reglanan, Ivy Simon, Directora di Servicio, y Ludmilla Arends, Directora di Desaroyo y Crecemento.
Presidente saliente Muzanin Wever a repasa e aña di 2015-2016 y a gradici tur esnan cu a yuda haci 2015-2016 un exito y a desea e directiva nobo hopi exito.
Esaki ta e di 30 Directiva di Quota International of Aruba, y Gwendeline van Trikt-Rojer , den su discurso como e di 30 Presidente di Quota International of Aruba, a recorda y gradici e hecho cu ta 30 aña pasa Quota organisacion a ser introduci na Aruba, a pone e fundeshi pa start cu Quota na Aruba y cu ainda tres di e damanan cu a cuminsa e tempo ey, ta activo cu e organisacion,y nan ta den personanan di Gladys Henriquez, Audrey Croes-Lacle y Mena Lacle.
Tambe e a reconoce y gradici tur e Presidentenan di Pasado y nan Directiva di Quota International of Aruba cu nan a persevera pa sigui lidera y continua cu e existencia y balornan di e bunita organisacion aki, Quota International of Aruba.
Den su discurso, el a enfatisa cu tur cos ta posibel si bo ta haci esey for di bondad di bo curason. Cada bes nos pone nos man na nos curason, y nos sinti nos curason, nos ta corda y recorda e pasion intenso cu nos por! Nos por yuda otronan y cu un actitud positivo, cu dedicacion y comprension nos ta haci pa loke Quota su balornan ta.
Y cu esey Quota International of Aruba ta sigui pa yuda nos comunidad. Hunto, nos ta logra hopi y hunto nos ta logra cosnan grandi pa esnan cu tin mas mester di dje den nos comunidad.
Quota International of Aruba ta un organisacion boluntario di ehecutivonan femenino y cu ta dedica na mehora calidad di bida di esnan menos fortuna den nos comunidad, specialmente esnan cu problema di oido y habla y tambe ta sostene hopi programanan pa hende muhenan den dificultad y muchanan desafortuna. Alabes Quota ta hiba e mensahenan di conscientisacion den nos comunidad por medio di proyectonan organisa pa hobennan na scolnan, seminarionan pa nos comunidad y en general trahando hunto pa brinda un miho calidad di bida.
