Quota Internacional Aruba: ‘Conscientisacion ta cuminsa na edad hoben’

Quota Internacional Aruba lo cuminsa nan siman di kibra silencio, den cual tres instancia ta bay hunto pa brinda comunidad di Aruba un test di oido ‘completamente gratis’.

E meta di siman di kibra silencio, cu lo cuminsa dia 9 september proximo, ta pa splica hende con pa cuida nan oido, pa nan evita e perdida bira mas grandi. Pa baha e drempel den comunidad y pa check nan oido. Pa haya mas informacion y ta mas habri con pa cuida oido.

Presidente di Quota, Ivy Simon-Hernandez, ta anuncia Dia Internacional di Oido cu ta celebra mundialmente riba e di cuater diasabra di luna di september, y pa e motibo aki ta celebra cu siman di kibra silencio.

Pa un mucha cu ta nace sordo, tin dificultad pa e mucha capta idioma y pa siña papia di forma natural. Un baby sordo tambe ta saca stem, pero ‘na dado momento ta stop’. Simon-Hernandez ta bisa cu ta importante pa stimula comunicacion cu e baby sordo, pa papia cune y uza lenguahe di seña for di momento cu e nace.

Desaroyo di idioma na cada ser humano ta den edad di 0 pa 2 aña; e ora ey ‘e base di idioma ta keda forma’. E ta remarca cu ta importante pa un mucha sordo cuminsa scol for di edad di 2 pa 3 aña, pa asina sigui den e guia di desaroyo di idioma.

Un mucha sordo ta reacciona riba locual nan ta mira rond di nan, e persona sordo ta visual. Ora cu sentido di hende cay afo, tin otro sentido cu ta reemplasa esaki, ‘por bisa cu e sentido visual di un mucha sordo ta bira su oido’.

E aña aki, Quota Internacional ta celebra 100 aña y na Aruba e ta cumpli 32 aña. Cuido di oido ta loke Quota ta kere den dje. Durante aña nan a dedica di forma boluntario na diferente area pa duna servicio.

“Nos ta trata pa educa pueblo di Aruba tocante e importancia di nos oido a traves di charla cu nos ta duna na scol. Specialmente e luna di februari, durante temporada di carnaval. Tambe durante aña nos ta haci algun actividad mas. Pa invita comunidad di Aruba pa haci test den e siman di kibra silencio, cu ta completamente gratis”, Simon-Hernandez a bisa.

Kristen Van Nes, Director di Servicio di Quota Aruba, ta bisa pa pueblo traha afspraak pa logra haci e chekeo na Aruba. Durante aña ta enfoca riba e parti di conscientisacion, cu ta cubri tur edad.

Durante temporada di Carnaval ta enfoca mas riba e muchanan, pasobra ‘nos ta kere e parti di conscientisa ta cuminsa na edad hoben’. Pa es motibo nan ta bay diferente scol preparatorio, basico y avansa pa duna charla pa cuido di oido. “Nos ta ripara cu ta importante y na nos experiencia muchanan ta mas habri pa tipo di informacion asina”, Van Nes a comparti.

Sinembargo, Van Nes ta bisa cu hende mas grandi ta esunnan cu ta bisa cu no mester cuido di oido. Nan edad ta halto y no ta facil pa cambia nan manera di pensa, pero ‘kisas sin sa nan ta cana rond cu perdida di oido’.

Den nan experiencia cu siman di kibra silencio, edad mas grandi ta nan enfoke. Mayoria di cita ta pa hende adulto y ta ripara cu e grupo mester di e mensahe pa nan compronde. “Nos tur sa cu na Aruba tin evento cu zonido halto.” E cantidad di decibel ta surpasa locual ta sano pa oido. Na Aruba riesgo pa perdida ta grandi. Van Nes ta splica cu traha cu zonido por causa perdida cerca adulto, pues ta importante pa no lag’e yega leu.

Durante aña ta haya cu hende ta yega pa haci test ora nan tin perdida grandi, cu nan ta cay pa remarca pa ricibi un aparato. Pa esunnan cu ta traha como bartender, casino, construccion, ta recomenda pa persona, ora bay un luga cu mucho zonido, no para cerca di speaker unda esey ta un riesgo pa daña oido.

Tambe cana cu earplugs den tas, cu ta yuda baha e cantidad di 20 a 25 decibel. E ta yuda te ora cu implementa ley pa regula e decibel cu mester tin den evento of luga. Sinembargo e siman di kibra silencio lo purba yega na henter pueblo, pero tambe durante henter e aña.

Cu e test nan por wak si e perdida ta pa causa di zonido duro y na momento cu wak esey, nan ta conscientisa e persona y guia nan. Segun Van Nes, mas cantidad cu ta acerca cu fayo di oido ta hende homber compara cu hende muhe.

Ta spera pa e aña aki mas di 300 persona tuma e test. Nan lo laga pueblo sa di e resultado, maske e lo ta anonimo. “Ultimo aña nos por a wak hende ta bin instancia, despues ta referi na KNO si nan mester bisti un aparato of kico mester haci.”

Oduber & Kan, FEPO y SVB San Nicolas ta esunnan cu lo haci e test. Pa afspraak na FEPO por yama 583-1016, Oduber & Kan 582-4719 of Whatsapp 7374737. SVB San Nicolas di 1or pa 3or di atardi por yama 527-2732.