Queeny Bergen, Empire Carnival Group: “E tabata hopi riba man y e dos simannan tabata hopi stress, pero nos a uni y a make it happen”

Awe nochi ta tuma luga e Parada Nacional di Luz organisa pa Gobierno di Aruba conhuntamente cu Departamento di Cultura. Apenas dos siman atras a anuncia oficialmente cu lo organisa e parada nacional aki, e prome evento di e magnitud aki despues di casi dos aña di pandemia di COVID-19 na Aruba, locual pa hopi tabata inespera y sin conta e tempo cortico cu gruponan di carnaval a haya pa prepara pa subi caya.

Den un entrevista cu lider di Empire Carnival Group, Queeny Bergen, e ta conta un poco mas con e proceso di preparacion tabata durante e dos simannan aki cu nan a haya pa por a prepara y organisa tur e piesanan necesario pa por participa den e parada aki.

Bergen ta conta cu e tabata hopi riba man y e dos simannan di preparacion tabata un tiki stress pa tur hende, pero asina cu nan a haya confirmacion cu e parada ta bay door, nan a haci un yamada cu full e team, ya cu e momento ey nan no por a ni reuni persona y asina tur hende a dicidi cu nan ta bay traha duro pa logra participa den e parada.

“Ta dos siman, ban keda sin drumi, ban duna nos extra esfuerso pa make it happen pasobra e ta un oportunidad e ta pa bo por genera fondo pa bo por participa e ora den 2023. Pa nos eigenlijk e tabata un no brainer cu nos no por keda afo. Nos a traha extra duro, pero e ta pa e bienestar di carnaval mes pa 2023, pa nos por paga nos debenan y asina nos por tin fondo pa 2023. Nos a uni hunto y full e team a parti e trabaonan y asina nos a logra make it happen cu mañan nos por ta den parada”, el a indica.

Normalmente e preparacion pa carnaval ta cuminsa di lunanan adelanta pa asina por organisa tur cos cu hopi mas trankilidad, prepara bon y tin e oportunidad tambe di bestel hopi articulo cu por ta no por haya na Aruba for di afo. Pa cu esaki Bergen a splica cu esey mes tabatin su desafionan pasobra den dos siman no por bestel nada di afo.

El a sigui splica cu e idea tabata pa den parada cada grupo tin un color di e bandera di Aruba, pero lastimamente esey no por tuma luga pasobra no tin suficiente T-shirt di color na Aruba. Locual a pone cu hopi di e gruponan a usa T-shirtnan blanco cu diseño riba dje cu e colornan di e bandera y apart ta pone accent di e color cu luz etc. “Nos a haya e color geel, dus e ora nos lo tin par di luz, pero por ehempel e gadgetsnan nos ta bay usa luz di tur color pasobra bo no tin e tempo pa bo ordo e color specifico. Dus ban pone cu nos ta trahando cu loke tin”, Bergen a agrega.

Pa loke ta trata e bandanan musical, e preparacion di trailer y zonido pa nan por subi caya tambe ta tuma tempo pa realisa. El a conta cu e crew di zonido tin tres dia trahando te marduga pa haci soundcheck, pa arma trailer etc. y den un record di tempo nan mester a arma e trailernan, testnan pa asina na por subi caminda pa un anochi.

“Unabes bo tende e musica bo ta haya smaak di biaha, bo ta corda con pa dos aña bo no tabatin pa celebra esaki y a pesar di tur e mal noticianan cu cosnan fastioso, bo ta bisa toch ta bon pa enfoca pa tin algo positivo cu hende por disfruta despues di asina hopi tempo deprimi. Dus mi ta kere toch e ta algo cu e hendenan ta look forward pe”, Bergen a expresa.

Tin un maximo di 750 participante pa grupo pa e parada nacional. Bergen ta conta cu pa loke ta trata cuponan e ta bayendo bon y tabata spera cu pa ayera nochi mes e cuponan lo ta sold out. El a menciona tambe cu nan haya hopi hende di otro gruponan cu no ta participando. “Esey ta hopi great. Bo ta wak cu hendenan stima carnaval di curason kier forma parti di e parada. Claro bo tin hende cu ainda e ta hopi riba man, nan no a cobra, pero nos ta haya cu e hendenan a reacciona hopi bon. E mayoria di nos hendenan a reacciona hopi bon”, el a bisa.

Desde cu a anuncia e parada, Gobierno di Aruba a indica cu lo yuda e gruponan di carnaval y e bandanan musical cu ta participa den e parada cu un suma di placa. Diaranson atardi durante un rueda di prensa, vocero di e comision organisador di e parada nacional di luz, Sr. Lyonel Dirksz, a informa cu pa motibonan administrativo e suma di placa priminti no a pasa pa e gruponan ainda.

Ariba esaki Bergen a confirma cu e suma di placa cu Gobierno a priminti a yega den su man y el a indica cu esaki sigur ta yuda cubri algun di e gastonan cu nan tin pa e parada. “E no ta cubri tur cos pero e ta un bon start pa asina por pone deposito pa asina por haci diferente movecionnan”, el a finalisa.