Ayera a tuma luga e di dos edicion di conferencia Quality of Healthcare Conference IVA y e aña aki e tema di e conferencia tabata Quality Matters. Mas 150 di profesional di sector di cuido tabata presente pa e conferencia aki. Prensa presente tabatin e oportunidad pa combersa cu algun presentador tocante e importancia di e conferencia aki.

Sra. Cheryl Rosa-Fingal – Inspector Gezondsheid Zorg di DVG, a splica cu tin diferente aspecto den calidad y esey ta loke nan kier pone mas enfoke riba dje. Rosa-Fingal tabata un di e presentadornan durante e conferencia y a elabora riba e topico “Connecting the dots in quality of healthcare.”

Mas di 150 profesional di diferente area di sector di cuido tabata presenta na e conferencia aki na unda a pone enfasis riba diferente area di calidad y con pa mehora calidad den cuido. Rosa-Fingal a remarca cu e meta di conferencia ta pa sigui mehora calidad.

El a indica cu aunke un persona por ta e miho, semper tin espacio pa mehoracion. “Si bo no ta mucho bon den calidad bo lo por wordo inspira con pa cuminsa, si bo ta hopi bon den calidad caba, te hasta certifica caba of tin acreditacion di sistemanan di calidad den salud, ainda por mehora mas. Esey ta bunita di e topico di calidad,” el a resalta.

Pa loke ta e aspecto di desaroyo den e area di calidad di cuido y comparacion cu antes y awo, Rosa-Fingal a splica cu den e transcurso di añanan cursonan ofreci ta enfocando cada biaha mas riba calidad, siendo cu antes e no tabata un punto di enfoke. El a sigui splica cu henter e parti di conscientisacion pa calidad a cuminsa desde añanan 2000 riba nivel mundial y den esaki tambe, el a indica, nan ta mira un variacion.

El a remarca cu e ta un ponencia den ley cu mester tin un calidad di cuido, un sistema di calidad y como inspectie den e añanan cu ta bin nan ta bay pone mas enfoke riba e desaroyo di e sistema di calidad.

Jayburtt Dijkhoff, otro presentador, a remarca cu e conferencia tin importancia pasobra no ta trata solamente e punto di calidad, pero tambe e sistemanan di calidad. El a indica cu esey kiermen cu ta bay riba e nivel di organisacionnan y den extension di esey riba nivel nacional. El a resalta cu tur organisacion, hospital, clinica, practicanan hunto mester por tin un calidad cu ta sigui mehora y asina sigui mehora e servicio di pashentnan.

Dijkhoff a splica cu esey ta toca e punto tocante con ta bay hiba un maneho cu ta mantene e calidad of haciele miho cada aña. El a sigui splica cu tur cambio ta cuminsa na conscientisacion y e conferencia ta sirbi pa duna, sobretodo esnan cu ta duna e servicio di salud, un plataforma pa bira consciente di kico ta e componentenan di un sistema di calidad, unda e pashent ta hunga un rol.

“E conferencia aki tin su balor agrega pa bisa tende shonnan unda nos ta para awendia y unda nos kier bay e siguiente añanan pa sigui mehora calidad,” el a indica.

Otro presentador tabata Sra. Olga Rodriguez, manager di division di cuido na AZV. E topico cu e el a elabora riba dje ta e parti di calidad, con e asegurador ta wak esaki y ki influencia nos por duna, haci, stimula y yuda pa e calidad di cuido na Aruba mehora, pa e trahadonan pero mas importante ainda pa e pashentnan

El a subraya cu ta importante pa trahadonan tambe ta riba nivel, un condicion cu no por negosha riba dje. El a splica cu e trahadonan mester tin e instrumentonan necesario, e conocemento necesario y mester tin e tempo.

“Nos ta consciente cu nos por no por logra tur cos den un dia pero sigur cu nos ta dispuesto pa scucha y hunto cu tur partners logra na yega na e solucionnan necesario pa asina nos por duna e miho cuido na Aruba,” Rodriguez a remarca.

El a enfatisa cu aunke Aruba ta un isla unda e profesionalnan cu tin un gran curazon, tin hopi limitacion. No solamente financiero, si no tambe door di cu Aruba ta chikito tin mester do mas hende cu specialismo.

Crescenzia Biemans, Director Corporativo di Bucuti & Tara Beach Resort tambe a hiba palabra na e conferencia ya papia con e hotel aki, un compania local a logra traha su propio standardnan di cuido. No solamente pa huespednan, pero tambe pa e empleadonan y pa e planeta.

Biemans a splica cu e programa di cuido aki ta completo, cual tin mas di 20 aña caba cu nan ta trahando riba dje, y ta encera tur cos. No solamente ta sosteniblidad, pero tambe un nivel di cuido y luho pa e huespednan.

El a indica cu e trahadonan ta pasa den hopi training, hopi educacion pa splica nan dicon nan ta haci loke nan ta haci y ora nan compronde tambe nan ta hiba e enseñansanan aki den nan bida priva.

Pa loke ta e pregunta si otro hotelnan ta acerca nan, of si nan ta traha hunto cu otro hotel, pa usa nan sistema di standard di cuido, el a splica cu un aspecto hopi bon na Aruba ta u e hotelnan ta traha hopi bon cu otro, ta siña di otro y e hotelnan ta siña di nan programa y ta implementando tambe algun di e solucionnan cu nan tin.

Minister demisionario di Turismo y Salud, Dangui Oduber, tambe a asisti na e conferencia aki. Papiando cu prensa local presenta, el a splica cu e maneho cu gobierno, awor demisionario, a bin ta hiba e ultimo añanan ta enfoca pa mehora calidad di cuido y servicio.

El a subraya cu e ta un reto grandi no solamente pa pais Aruba pero tur otro pais na mundo pa tin e calidad desea como gobierno y tambe como ciudadano.

Pa contribui na mehoracion di calidad di cuido, e mandatario a splica, cu nan a haci loke tabata na nan alcance pa inverti den cuido e ultimo añanan aki y a percura pa duna DVG e instrumentonan necesario pa por haci inspeccion riba calidad di cuido.

El a sigui splica cu e ultimo añanan aki tambe a bin cu e ley di AruBIG pa reconoce Arubianonan pa bin back Aruba pa tuma nan den e registro aki pa asina nan por yuda cu e reto di escasez di personal di cuido.

E mandatario a indica cu nan a institui tambe un Instituto di Calidad cu ta determina e calidad di cuido cu nan kier yega na Aruba y a base di esey Inspectie Volksgezondheid tin e tarea pa wak si tur e institucionnan cu ta duna cuido na Aruba ta cumpli cu e expectativa y calidad necesario.

El a agrega cu nan ta bay institui tambe un ‘Kwaliteits Raad’ (Conseho di Calidad), algo completamente nobo pa Aruba, cu ta consisti di diferente specialismo na Aruba pa mantene e supervision riba e calidad di cuido. E tarea principal di e Conseho di Calidad ta pa sondea, determina e punto di referencia y wak e calidad di cuido na por ehempel na Hulanda, Merca y na paisnan desaroya, y determina kico ta nan calidad di cuido y kico kier alcansa na Aruba.

“Mi ta kere conferencianan asina ta importante pa comparti informacion cu comunidad, kico tur ta wordo haci pa mehora calidad di cuido pasobra esey ta e obhetivo final di ministerio di salud, pero tambe di hospital, di ImSan, di Instituto di Calidad, DVG, pa hunto traha den bon coherencia pa mehora calidad di cuido manera cu comunidad ta desea,” minister Oduber a enfatisa.