Qredits Aruba hunto cu Colegio EPI ta lansa curso nobo “Be Your Own Boss”

Qredits Aruba ta parti di Qredits Microfinanciering Nederland unda cu ta ofrece diferente tipo actividad cu ta enfoca ariba entrepreneurship y esaki ta inclui e programa educacional ‘Be Your Own Boss’ (BYOB). Qredits Aruba hunto cu Colegio EPI a uni y asina ta organisa e segundo edicion di e curso aki pa futuro negoshantenan.

Srta. Nathaly Harms, di Qredits Aruba ta splica cu e programa BYOB ta un curso cu anteriormente a cuminsa como e programa ‘Eigen Bass’, cu ya caba tin hopi tempo caba ta wordo usa na Hulanda.

“E programma ‘Eigen Baas nos tin hopi tempo ta draai caba na Hulanda, nos a cuminsa cune na Aruba y e feedback tabata cu si por a traduci esaki na Ingles como cu nos ta sinti un poco comodo si ta den Ingles”, Srta. Harms a bisa. “Nos a traducie na Ingles y nos a adapt’e un tiki a base di e necesidad pa Caribe, ban pone asina, unda cu Aruba, Corsou, Boneiro y Sint Maarten ta haci uso di dje”.

Srta. Harms ta splica tambe cu Colegio EPI ta comparti e vision di educacion cu Qredits Aruba tin y asina nan cera un union exitoso pa lansa e programa BYOB. Na luna di juli a prome grupo, cu tabata consisti di 32 participante, a termina nan curso y a ricibi nan certificado. Pa e siguiente 3 lunanan, BYOB tin 20 participante, den principio tabata 17 pero mas hende a aplica y a cera un grupo di 20 participante cu lo cuminsa cu e curso nobo.

“E ta un partnership, nos ta provee e programa educacional, nan ta provee e facilidad y tambe e docentenan. E ta un partnership, nos tur dos a uni pa haci esaki posibel pa mas hende na Aruba por haya e oportunidad pa sigui e curso aki cu ta yama BYOB, pero en general e ta siñabo e 21^st century skills nan cu ta hopi importante pa cualkier persona cu ta drenta e mercado laboral tambe, no ta solamente pa si bo kier habri bo mesun negoshi, pero e ta siña bo asina hopi mas cu esey cu bo por tin habilidadnan empresarial y traha den un organisacion tambe. Asina tin balor agrega na bo mesun desaroyo den bo educacion y den bo carera. Nos ta comparti e vision aki cu EPI y e samenwerking ta bay hopi bon”, el a agrega.

E programa lo enfoca ariba diferente aspectonan cu ta esencial pa por crea un negoshi. E participantenan lo ricibi nan programa cu nan por download via un app of nan por ricibi esaki via e-mail tambe. Den e programa aki e participantenan lo bay enfoca ariba tur e puntonan cu ta importante pa traha un business plan.

Algun punto importante, Srta. Harms ta splica, ta por ehempel ki cualidadnan e participante mes tin como entrepreneur, con e persona mes ta bay om cu placa, ki ta e motivacion pa un negoshi, kico ta puntonan fuerte cu cada futuro negoshantenan tin como entrepreneur y cada participante ta siña conoce nan mes tiki tambe.

Na banda di esey e participantenan lo ricibi den e curso, marketing mix, unda cu nan lo studia y investiga e mercado cu nan ta desea di drenta prome. Un ehempel cu Srta. Harms ta duna ta e actividad “mystery shopping” caminda e participante ta drenta un luga y ta tuma nota di kico ta e prijs, con e servicio ta y unda e localidad ta. “Dus bo lo haya diferente opdrachtjes y asina bo ta siña e hermentnan pa haci investigacion di e mercado cu bo kier drenta y asina bo ta miho prepara”, el a señala.

E participantenan lo siña tambe con pa desaroya nan producto of servicio, nan lo determina nan prijs, cuanto trahado nan lo por maneha, si e negoshi lo ta online of na un localidad strategico. Na final cada participante lo tin ta e oportunidad pa presenta nan idea, nan negoshi. “Esaki ta wordo haci den forma di un pitch”, Srta, Harms a bisa. “Nos lo forma un panel y e ora e participante ta haya e oportunidad pa presenta nan idea of negoshi y kico tur nan kier haci y despues di esaki nan lo ricibi nan certificado”.