(AP)—un alto al fuego di cuatro dia na Gaza entre Israel y Hamas lo cuminsa diabierna mainta, segun Qatar, un dia despues cu e fecha originalmente anuncia, como cu negociacionnan ta sigui traha riba e ultimo detayenan di e acuerdo, cual lo resulta den libertad di rehen y prizoneronan den ambos banda.
E alto al fuego mester a cuminsa originalmente diahuebs mainta, pero ta parce cu esaki a ser retrasa anochi prome cu e consehero di siguridad nacional pa Israel, Tzachi Hanegbi, a anuncia un retraso di un dia sin duna motibo pa esaki. Diahuebs, vocero pa e Ministerio di Asunto den Exterior na Qatar, Majed al-Ansari, a anuncia cu e alto al fuego lo cuminsa 7or di mainta diabierna mainta.
El a bisa cu ambos banda a entrega lista di esnan cu mester ser libera, y e prome grupo di 13 hende muhe y muchanan tuma como rehen pa Hamas lo haya nan libertad diabierna atardi. E no a bisa con hopi prizonero Palestino lo ser libera, pero oficialnan a bisa cu tres lo ser libera pa cada rehen. Mas ayudo pa Palestina lo cuminsa drenta Gaza “lo mas pronto posibel”, al-Ansari a bisa. E speransa ta cu e “momentum” di e acuerdo aki lo resulta den un “fin di e violencia aki”, manera el a conta reporteronan.
Netanyahu ta bisa cu e tregua no lo trece fin na e guera
E acuerdo di tregua a aumenta speransa cu e guera lo yega su fin, cual contribui na un aumento di violencia den e West Bank y a causa miedo di un conflagracion den henter Oeste Medio.
Prome minister Benjamin Netanyahu a priminti pa continua e guera despues cu e acuerdo di tregua vence pa asina destrui e capabilidadnan militar di Hamas, trece fin na Hamas su dominio den Gaza y debolbe e 240 rehennan wanta na Gaza pa Hamas y otro gruponan. “Nos lo continua te ora cu nos cumpli cu nos logronan,” Netanyahu a bisa, agregando cu el a entrega e mesun mensahe via un yamada di telefon pa presidente Mericano Joe Biden.
E retraso pa implementa e alto al fuego a decepciona Palestinonan na Gaza, ken ta spera pa uza e par dianan di keto pa bishita casnan cu nan a huy for di dje—of al menos loke a resta di nan—y reconecta cu famianan. Mas cu 1.7 miyon hende, tres kwart di e poblacion di Gaza, a keda sin cas pa via di e guera.
Israel a haci menasa pa extende su invasion na parti zuid di Gaza, unda mayoria di e poblacion ta localisa. May cu 1 miyon hende, incluyendo miles cu a huy bay nort, a drenta den shelternan yena caba y cu no tin suficiente cuminda, awa y materialnan basico.
Pa Hamas, e alto al fuego lo provee un oportunidad pa reuni despues di basta siman cu perdidanan grandi. E lider di Hamas, Yehya Sinwar, ken ta sospecha di ta bibo y scondiendo na Gaza, probablemente lo declara e libertad di e prizoneronan Palestino como un logro grandi y declara victoria si e guera caba.
Bao di e acuerdo di tregua, 50 rehen lo haya nan libertad den etapa, den un intercambio pa loke Hamas a bisa lo ta 150 prizonero Palestino. Hende muhe y muchanan lo ser libera prome, y Israel a bisa cu e tregua por ser extendi un dia mas pa caba 10 rehen adicional cu ser libera.
