(AP) — Presidente Ruso, Vladimir Putin a reuni cu premier Chines, Li Quang e siman aki, elogiando e crecemento di nan relacion comercial mientras Moscu ta bira cada bes mas dependiente riba Beijing pa sosten economico y politico.
“Nos relacion comercial ta desaroyando, desaroyando exitosamente… E atencion cu gobiernonan di e dos pais na ambos banda ta dunando na comercio y lasonan economico ta dunando resultado,” Putin a bisa na e reunion den e Kremlin.
E tambe a bisa cu Rusia y China a desaroya “plannan a gran escala” pa economia y otro proyetonan.
“Relacionnan China-Rusia ta na un nivel halto sin precedente,” segun Li, kende anteriormente a reuni cu su contraparti Ruso, prome minister Mikhail Mishustin.
E reunion a tuma lugar mientras Rusia a haya problema pa rechasa un incursion Ucraniano den region Kursk awo den su di tres siman. Y durante anochi, Moscu a experimenta un di e olanan mas grandi di atake cu drone riba e capital Ruso desde comienso di e conflicto cu Ucrania.
Reportahenan di noticia Ruso no a indica su Putin y Li a papia di Ucrania.
China a purba di posiciona su mes como neutral den e conflicto cu Ucrania, pero ta comparti cu Rusia un gran animosidad pa cu Occidente.
Despues cu paisnan occidental a impone sancionnan pisa riba petroleo Ruso den respuesta na Rusia mandando trupa den Ucrania na februari 2022, China a reforsa fuertemente su compra di petroleo Ruso, aumentando su influencia na Rusia.
Putin a subraya e importancia di China door di reuni na Beijing cu lider Chines, Xi Jinping tiki despues di a keda inaugura pa un di cinco termino den e Kremlin.
Un evaluacion di inteligencia Mericano publica e aña aki ta indica cu China a aumenta significantemente benta di herment di mashin, microelectronico y otro tecnologia pa Rusia, cu Moscu ta usa pa produci misil, tanki, avion y otro arma.
