(AP) — Dronenan cu e Kremlin a bisa a keda lansa pa Ucrania a bula den teritorio Ruso, incluyendo un cu a yega 100 kilometer cerca di Moscu, señalando violacionnan di defensanan Ruso mientras presidente Vladimir Putin a duna orden pa reforsa proteccion na e frontera.
Oficialnan a bisa cu e dronenan no a causa ningun herida ni a haci daño significante, pero e atakenan riba dialuna nochi y diamars mainta a genera duda tocante e capacidad di defensa Ruso mas cu un aña despues di e invasion na e pais bisiña.
Oficialnan Ucraniano no a asumi responsabilidad inmediatamente, pero similarmente nan a evita reconoce directamente responsabilidad pa atakenan den pasado y sabotahe, mientras ta enfatisa e derecho di Ucrania pa ataca cualkier obhetivo na Rusia.
Maske Putin no a referi na ningun atake specifico den un discurso na e capital Ruso, su comentarionan a yega algun ora despues cu e dronenan a acerca algun area den sur y occidente di Rusia. Autoridadnan a cera e espacio aereo riba St. Petersburg den respuesta na loke algun reportahe a bisa tabata un drone. Tambe ayera, varios canal di television Ruso a transmiti un atake di misil advertiendo cu oficialnan tabata culp’e riba un atake di hacking.
E atakenan cu drone tabata enfoca riba regionnan dentro di Rusia na e frontera cu Ucrania y mas paden di e pais, segun autoridadnan local Ruso. Un drone a cay cerca di e villa di Gubastovo, menos di 100 kilometer for di Moscu, segun Andrein Vorobyov, gobernador di e region rond di e capital Ruso, a bisa den un declaracion online. Vorobyov a bisa cu e drone no a causa ningun daño, pero probablemente a enfoca riba un “obheto di infrastructura civil.” Potret di e drone a mustra un modelo chikito fabrica na Ucrania cu un rango reporta di 800 kilometer pero sin capacidad pa carga un cargamento grandi di explosivo.
Forsanan Ruso ayera trempan a tira abao otro drone Ucraniano riba e region Bryansk, segun gobernador local, Aleksandr Bogomaz a bisa den un post riba Telegram.
E dronenan tambe a yega e region Belgorod dialuna nochi, cu un bulando door di un bentana di un apartamento na e capital, segun autoridadnan local a reporta. Gobernador regional. Vyacheslav Gladkov a bisa cu e dronenan a causa daño menor na edificio y autonan.
Ministerio di defensa Ruso a bisa cu Ucrania a usa drone pa ataca facilidadnan den region Krasnodar y Adygea. A bisa cu a tira e dronenan abao cu activonan di guera electronico, agregando cu un di nan a crash den un campo y otro a desvia di su ruta di vuelo y a faya un facilidad cu tabata suppose di ataca.
