(Reuters) – Presidente di Rusia Vladimir Putin a bisa ayera cu e ta cla pa yega na un acuerdo tocante Ucrania den posible dialogo cu presidente-electo di Merca Donald Trump pa stop e guera, y cu nan no tin ningun condicion pa cuminsa un dialogo cu autoridadnan Ucraniano.

Trump, un homber cu ta proclama su mes como un maestro di haci trato y autor di e buki di 1987 “Trump: the Art of the Deal,” a priminti pa yega na un solucion rapido pa e conflicto, pero ainda no a duna detaye tocante con e lo logra esaki.

Putin, durante su sesion anual di pregunta y respuesta riba television estatal cu pueblo di Rusia, a conta un periodista di un canal noticiero Mericano cu e ta cla pa reuni cu Trump, ken segun e tin añas sin papia cune.

Ora a puntr’e kico e por ofrece Trump, Putin a rechasa un afirmacion cu Rusia ta den un posicion debil, bisando cu Rusia a bira mas fuerte desde el a manda trupanan na Ucrania na 2022. “Nos semper a bisa cu nos ta cla pa negocia y yega na un areglo,” Putin a bisa, despues cu el a indica cu e forsanan Ruso, avansando riba tur frente, ta moviendo pa logra nan meta principal den Ucrania.

“Na mi opinion cu pronto e Ucranianonan cu kier bringa lo caba; pronto lo no tin mas hende cu kier bringa. Nos ta cla, pero e otro banda mester ta cla tambe pa negocia.”

Reuters a reporta luna pasa cu Putin tabata habri pa discuti un acuerdo di alto-el-fuego na Ucrania cu Trump, pero el a descarta haci cualkier concesion teritorial grandi y a insisti cu Kyiv mester bandona su ambicionnan pa drenta NATO.

Putin a bisa ayera cu Rusia no tin condicion pa cuminsa dialogo cu Ucrania y ta cla pa negocia cu tur hende, incluyendo Presidente Volodymyr Zelenskyy.

Pero el a bisa cu un acuerdo por solamente ser firma cu autoridadnan legitimo di Ucrania, cu pa awor Kremlin ta considera ta solamente parlamento di Ucrania.

Zelenskyy, ken su termino tecnicamente a caba pero ken a atrasa un eleccion pa motibo di guera, mester ser reeligi pa Moscu consider’e como un gobernante legitimo pa cualkier acuerdo tin un base legal fuerte, segun Putin.

Putin a rechasa e idea di acorda na un tregua temporal cu Kyiv, bisando cu solamente un acuerdo di paz den largo plazo lo ta suficiente.

Cualkier dialogo mester cuminsa cu un punto tocante un acuerdo preliminar entre negociadonan Ruso y Ucraniano den e prome simannan di e guera na Istanbul, cu nunca a ser implementa, el a agrega.

Algun politiconan Ucraniano ta considera esey como un tipo di capitulacion cu lo neutralisa ambicionnan militar y politico di Ucrania.

E invasion di Ucrania pa Rusia na 2022 a laga dies miles morto, a desplasa miyones y a causa e crisis mas grandi den relacionnan entre Moscu y e West desde e Crisis di Misil Cubano na 1962.

Rusia, ken ta presenta e conflicto como un operacion militar special di defensa diseña pa stop un expansion peligroso di NATO pa e Oriente, tin control riba aproximadamente un quinta parti di Ucrania y a tuma algun mil kilometernan cuadra di teritorio e aña aki.

Determina pa incorpora cuater regionnan Ucraniano den Rusia, forsanan di Moscu a tuma pueblo tras di pueblo den e oriente y awor ta menasando ciudadnan strategico importante manera Pokrovsk, un centro grandi di caminda y trein.

Putin a bisa cu e bringamento ta complica, como cu ta “dificil y sin sentido pa adivina kico ta bini… (pero) nos ta move, manera bo a bisa, pa soluciona nos tareanan principal, cual nos a detaya na e comienso di e operacion militar special.”

Tocante e presencia continuo di forsanan Ucraniano den e region Kursk di Rusia, Putin a bisa cu trupanan di Kyiv lo ser forsa afo, pero e no a bisa exactamente ki ora esey lo pasa.

E guera a transforma e economia di Rusia y Putin a bisa cu e ta mustrando señal di sobrecalentamiento cu ta causa un inflacion preocupantemente halto. Pero el a bisa cu e crecemento ta mas halto cu hopi otro economianan manera Reino Uni.

Ora a puntr’e si e lo a haci algo diferente, el a bisa cu e mester a manda trupanan pa Ucrania mas tempran cu 2022 y cu Rusia mester tabata mas prepara pa e conflicto.

Cuestiona pa un periodista di BBC si e lo cuida Rusia, algo cu Boris Yeltsin a puntr’e pa haci prome cu el a entrega e presidencia na dje fin di 1999, Putin a bisa cu el a haci esey. “Mi a haci tur cos pa sigura cu Rusia ta un potencia independiente y soberano cu por tuma decisionnan segun su propio interesnan.”

Rusia, Putin a bisa, a haci propuestanan na gobernantenan nobo di Siria tocante basenan militar di Rusia eynan y e mayoria di hende cu ken Moscu a papia tocante esaki ta prefera pa nan keda.

Rusia lo mester pensa si e basenan lo keda of no, el a agrega, pero rumor tocante e fin di influencia Ruso den Medio Oriente ta exagera. Putin a destaca kico e ta yama invencibilidad di e misil hipersonico “Oreshnik” cu Rusia ya a test na un fabrica militar Ucraniano, bisando cu e ta cla pa organisa un otro lansamento na Ucrania y wak si sistemanan di defensa aereo di e West por derib’e.

Na Bruselas, Zelenskyy a duna respuesta tocante e sugerencia di misil di Putin durante un conferencia di prensa na un reunion di e Concilio Europeo, remarcando riba Putin: “Bo ta pensa cu e ta un hende stabiel?”

Potretnan di Reuters.