(AFP) – Rusia ta considera Merca su plan di anexa Groenlandia como uno “serio” y ta preocupa cu West por usa e Arctico como un trampolin pa conflictonan den futuro, president Ruso Vladimir Putin a bisa diahuebs.
President Mericano Donald Trump a cuminsa pusha pa controla e isla Danes autonomo desde cu el a drenta oficina den januari, bisando cu Washington mester tin esaki pa “seguridad internacional.”
“E ta un eror profundo pa pensa cu esaki ta solamente palabranan extravagante di e administracion Mericano nobo. E no ta nada di esey,” Putin a conta na un forum Arctico den Murmansk. “Nos ta papiando di plannan serio di banda di Merca pa loke ta trata Groenlandia. E plannan aki tin raiz historico di hopi tempo,” el a agrega.
El a bisa cu mientras Rusia no ta directamente involucra den e pregunta tocante Groenlandia su propietario, Moscu ta preocupa cu “e paisnan den NATO, en general, cada biaha ta designando e parti nort como un trampolin pa posibel conflictonan.”
Groenlandia, cual ta buscando independencia for di Dinamarca, ta cas caba di un base militar Mericano, cual Vice Presidente Mericano JD Vance lo bishita diabierna.
E isla ta strategicamente situa entre Norte America y Europa na un momento unda Merca, China y Rusia su interes ta creciente den e Arctico, unda camindanan den lama a habri a causa di cambio di clima.
Dinamarca a contraresta Trump su yamado pa tuma over e isla y a bisa cu e pueblo di Groenlandia a demostra cu nan no kier ta parti di Merca.
