RUSIA – E president Ruso, Vladimir Putin a adverti Merca tocante lansamento di misil na Europa. El a bisa diaranson cu lo lansa armanan nobo cu lo tuma poco tempo pa alcansa nan obhetivo.
E no a laga sa cual arma specificamente por sali for di Moscow, pero su declaracion a lanta mas tension cerca Washington. E ta acusa Merca di bandona un pacto clave di control di arma, pa libera nan man pa construi misil nobo y pa trata di pasa culpa di e cambio pa Rusia.
President Putin a afirma cu Rusia no lo ta e prome pais pa lansa misil, pero ta adverti cu lo tuma accion lihe si Merca ta pone arma na Europa. “Lo tuma solamente 10 – 12 minuut pa yega Moscow, e ta un menasa hopi grave pa nos, y nos tin cu contesta”, el a bisa, sin menciona directamente Merca.
Rusia lo mustra obliga pa crea arma nobo, segun president Putin, cu no solamente no lo wordo uza contra teritorionan cu ta nifica un menasa directo, sino tambe teritorio unda centro di tuma decision lo dirigi na sistema unda ‘nan ta menasa nos’.
Putin a bisa funcionarionan di Merca pa tende cuenta cu ‘alcanse y velocidad di nos arma prome cu tuma decision den menasa Rusia’. El a afirma cu ainda Rusia kier relacion di amistad cu Washington, y ta sigui habri pa combersacion di control di arma. “Nos no kier confrontacion cu un pais cu poder global manera Merca”, president Putin a bisa, pero na mesun momento a critica e politica ‘destructivo’ di Merca pa ataca Rusia cu sancion.
