(AP) – President Vladimir Putin a adverti diaranson cu Rusia por provee armanan di rango largo na otronan pa usa contra paisnan den occidente como respuesta na NATO permitiendo Ucrania usa nan armanan pa ataca teritorio Ruso.
Putin tambe a reafirma Moscu su disposicion pa usa armanan nuclear si e mira un menasa na su soberania.
E accionnan recien di West lo sigui pone den peliger e seguridad internacional y por causa “problemanan sumamente serio,” el a bisa, contestando preguntanan di reporteronan internacional, algo cu a bira sumamente poco comun desde cu Moscu a banda trupa den Ucrania.
“Esaki lo marca nan rol directo den e guera contra e Federacion Ruso y nos ta reserva e derecho di actua den e mesun manera,” Putin a agrega.
Merca y Alemania recientemente a autorisa Ucrania usa e armanan cu nan ta provee na Kyiv di rango largo pa ehecuta atakenan riba tera Ruso.
Riba diaranson, oficial di occidente y senador di Merca a bisa cu Ucrania a usa armanan Mericano pa ataca dentro di Rusia bao guia nobo aproba pa President Joe Biden cu ta permiti armanan Mericano ser usa pa e proposito limita di defende Kharkiv, Ucrania su di dos ciudad mas grandi. E oficial no tabatin permiso di comenta publicamente tocante e topico y a papia bao condicion di anonimidad.
Putin a bisa cu e uso di arma cu occidente a provee ta involucra personal militar di e paisnan aki cu ta controla e misil y ta scoge e victima, pa e motibo aki el a bisa cu Moscu lo tuma accion “asimetrico” tur otro caminda den mundo. Merca su ehercito a bisa cu e no ta controla e misilnan cu nan ta provee na Ucrania ni tampoco unda esaki lo dal.
“Si nan ta considera posibel pa entrega e armanan aki na e zona di combate pa lansa atakenan contra nos teritorio y crea problema pa nos, dicon nos no tin e derecho di provee arma di e mesun tipo na otro regionnan di mundo unda nan por ser usa contra facilidadnan sensitivo di e paisnan cu ta haci esaki contra Rusia?” el a bisa.
“Nos lo pensa riba esaki,” el a conta e reporteronan.
Ora a puntra si Rusia lo haci uso di armanan nucelar, Putin a bisa e condicionnan pa utilisa e arsenal aki ta claramente delinea den Moscu su doctrina di seguridad. “Pa algun motibo, nan ta kere den occidente cu Rusia nunca lo usa esaki,” el a expresa. “Wak loke tin skirbi kinan,” el a bisa tocante Rusia su doctrina. “Si un hende su accionnan ta menasa nos soberania y integridad teritorial, nos ta considera posibel haci uso di tur loke nos tin na nos disposicion.”.
