(AP) — Presidente Vladimir Putin a bisa cu Rusia ta cla pa negociacionnan pa termina cu e guera na Ucrania, maske e pais a continua enfrentando mas atake for di Moscu – un señal cu paz no ta inminente.
Putin a bisa den un entrevista riba television estatal cu Rusia ta “prepara pa negocia algun resultado aceptable cu tur participante den e proceso aki.”
El a bisa cu “no ta nos ta nenga di papia, ta nan” – algo cu e Kremlin a declara ripitidamente den lunanan recien, mientras su invasion di 10 luna ta keda perde momentum. Putin tambe a ripiti cu Moscu “no tin otro opcion” y a bisa cu e ta kere cu e Kremlin “ta actuando den direccion corecto.”
“Nos ta defendiendo nos interesnan nacional, interes di nos ciudadanonan, nos pueblo”, el a bisa.
Comentarionan di Putin ta yega mientras atake contra Ucrania ta continua. Un alerta na nivel nacional a keda anuncia dos biaha diadomingo, y tres misil den atardi a dal ciudad di Kramatorsk den region parcialmente ocupa di Donetsk, segun oficialnan local. E misilnan a dal un area industrial di e ciudad, y no tabatin casualidad, segun gobernador Ucraniano di Donetsk, Pavlo Kyrylenko. Kyrylenko a bisa cu ciudad di Avdiivka tambe a keda ataca diadomingo cu seis ronda di bombardeo, y un muhe a resulta herida.
Den otro lineanan frontal, rond di ciudad di Bakhmut, unda bataya fuerte ta tumando lugar den simannan recien, forsanan Ruso tabatin problema pa maneha e velocidad di nan ofensiva, segun un think-tank basa na Merca a reporta weekend ultimo.
“E velocidad di avance di forsanan Ruso den area Bakhmut a baha den dianan recien, maske ta mucho trempan pa evalua si e ofensiva Ruso pa captura Bakhmut a culmina”, e Instituto pa Estudio di Guera a skirbi den su actualisacion mas recien. E think-tank a cita bloggernan militar Ruso, kende a bisa cu recientemente a reconoce “cu forsanan Ucraniano na area di Bakhmut a logra baha velocidad un tiki di e avance Ruso rond di Bakhmut y su alrededor.”
Fuentenan riba rednan social Ucraniano “anteriormente a alega cu forsanan Ucraniano completamente a pusha forsanan Ruso fuera di cercania di Bakhmut den oriente” pa dia 21 di december, segun e rapport. “Forsanan Ruso probablemente ta bay tin problema pa mantene e velocidad di nan operacion di ofensiva den area di Bakhmut y por busca pa inicia un pausa tactico of operacional”, e instituto a conclui.
Un dia prome, un atake mortal di Rusia den ciudad sur di Kherson, retoma pa forsanan Ucraniano luna pasa, a laga cantidad di morto y herido.
Forsanan Ruso a bombardia areanan teni pa Ucrania di e region parcialmente ocupa di Kherson 71 biaha durante ultimo 24 ora, incluyendo 41 atake riba ciudad di Kherson, segun gobernador Ucraniano di e region, Yaroslav Yanushevich a reporta diadomingo. Un total di 16 persona a perde nan bida segun e oficial, incluyendo tres trahador di emergencia mata den proceso di retira mina den districto Berislav di e region. Yanushevich a bisa cu 64 persona a resulta herida.
Den region bisiña di Dnipropetrovsk, ciudad di Nikopol a keda bombardia den anochi cu artilleria pisa, segun gobernador Valentyn Reznichenko. No a reporta fayecido.
