ORANJESTAD – Fundacion Epilepsie a organisa un evento internacional di ‘Purple Day’ cu meta pa conscientisa riba epilepsia ayera, dia 26 di maart. President di e fundacion, Robert Nieuw a splica mas tocante e tema.

Nieuw ta splica cu esaki ta nan di 8 aña cu ta tene e celebracion. “Nos ta prefera haci e cu scol preparatorio, cu muchanan di edad aki, pa motibo cu for di chikito nan ta consciente caba di e malesa, nan ta crece sabiendo kico e ta.” E fundacion a lanta cu e meta, pasobra no tabata existi un organisacion unda e pashent y su famia por a haya informacion riba e tereno aki, cu tur su consecuencianan.

Tur aña ta realisa e actividad na un scol preparatorio, anto e aña aki a tuma luga na kleuterschool Prome Paso Savaneta. E directiva di e scol aki a prepara un programa pa e muchanan cu lo duna presentacion y haya un treat.

Segun Nieuw, e muchanan di edad aki ta mas contento y ta bay ‘mas miho cu henter e celebracion’. El a remarca cu a yega di purba cu un edad mas grandi ‘pero el a bay ful otro’. Agregando cu e muchanan chikito ta interesa pa sa y cu nan ta compronde bon di chikito.

Sinembargo, pa splica e muchanan pa tin e conocemento of pa sa kico e ta, Nieuw ta splica cu tin dos verpleegkundige cu ta duna entrenamento na e muchanan. “Nan ta pasa un video di un persona cu ta haya un atake, ora e mucha ta wak esey, nan por compronde miho, y claro pa nan e ta algo nobo. Nan ta haya grave cu tin hende cu ta sufri di dje, pero asina nan ta compronde miho.”

Locual ta pa duna informacion, e fundacion tin 12 aña ta existiendo. Locual nan ta haci ta entrega foyeto na oficina di dokter, botica, scolnan, pa asina splica kico en berdad e malesa ta encera.

Nieuw ta bisa cu mayoria di hende no sa kico epilepsia ta. “Hende ta pensa cu e ta ora hende ta morde of guli nan lenga, anto no ta berdad, ta pa motibo ey nos ta splica kico e ta. Ora un persona cay abou, cuminsa bati, anto con pa tuma accion. Nos ta duna varios training pa aña, e juffrouw ta mira locual ta pasa den klas, y mayornan tambe por compronde kico nan yiu tin of ta wak e diferente tipo di epilepsia.

E ta agrega cu ta importante pa e juffrouw sa con pa handle ora e mucha tin un atake. Nieuw ta bisa cu tur juffrouw cu meneer ‘nan sa kico nan tin cu haci den caso asina, sea den klas of scol’.

Bon Dia Aruba a puntra si un persona cu tin epilepsia por tin un bida normal, of tin cierto limite pa e persona. E ta contesta cu e ta depende extremo di e malesa. “Nos tin e cantante Sharella Lopez, kende for di mucha tabata tin e. El a opera anto el a kita y awo e no ta afecta mas. E tin un bida normal, pero pa tur ta depende di con extremo e malesa ta.”

El a agrega cu si un persona tine mucho extremo, e ta dificil. E ta bisa cu tin cu domina cu remedi, y pa esunnan cu tine menos extremo, un bida ‘completamente normal’. Nan por studia, y logra hopi cos den bida. “Medicamento y bon cuido, no bebe alcohol, no drumi laat, no cansa curpa. E persona tin cu ta na haltura kico ta epilepsia y e sigui instruccion di dokter.” Ta hopi importante tambe pa tin sosten y ayudo continuo di su esunnan cerca di dje.”

E actividad na e scol preparatorio a bay cu presentacion di tur 4 klas di bailamento, obra y poesia, hunto cu cantante local Sharella Lopez, cu tur e muchanan bisti na biña, cu ta e color internacional pa epilepsia.

Pa finalisa, ta bisa cu miyones di hende ta sufri di epilepsia, ‘1 di cada 100 persona’. Pa e motibo aki, ta haya importante pa comunidad ser conscientisa riba e malesa.