Pa por scapa di sanacionnan internacional riba Siria, a purba di maluza Aruba manera un “hub” pa asina logra di bende producto petrolero cu Merca. E plan tabata encera door di entre otro uza un compania ‘shell’ na Rusia bou di e mesun nomber cu e refineria di Aruba.
Un di e nombernan clave patras di henter e plan aki ta magnate petrolero Wilmer Ruperti kende tin lasonan extenso cu gobierno Venezolano. Den un carta fecha 12 di september 2012 cu Bon Dia Aruba tin den su disposicion, Ruperti a expresa su interes den compra di e refineria. Den un articulo cu a sali recien riba e medio di comunicacion internacional Bloomberg, ta menciona e nomber di e Arubiano Oscar Helmeyer como un intermediario den e proceso aki. Helmeyer lo mester a ricibi 15 miyon di dollar como recompensa si e deal aki lo a bay door. Segun e articulo di Bloomberg, Helmeyer lo a declara cu Ruperti a reuni cu Minister Eman y De Meza. Mester bisa tambe cu reportero di Bloomberg a purba di haya contacto cu Eman y De Meza na varios biaha y manera pero na final ambos a nenga di duna un entrevista.
E director di e compania estatal Refineria di Aruba (RdA) sr. Alvin Koolman a declara cu e no tabata na altura di e intencion aki y e lo busca mas informacion. Tambe sr. Koolman a duna di conoce cu si mester, e lo coopera cu autoridad Mericano pa cualke investigacion cu mester tuma luga.
Un relato mas extenso den edicion di nos corant Bon Dia Aruba mayan 26 di mei 2017.
