Situacion di e trahadonan di Citgo Aruba ta uno preocupante. E preocupacion aki ta sigui escala asina sindicato IOWUA como FTA a yega di vocifera. Te ainda Citgo ta cumpliendo cu pago di salario di trahadonan. Pero nan no sa dia cu Citgo no lo sigui cumpli cu e compromiso aki cerca nan trahadonan, y kico lo bin despues.

Den su ultimo comunicado di prensa riba e topico aki, gobierno a bisa cu ta abstene di participa directamente den e relacion entre doño di trabou (Citgo) y e trahadonan. Sinembargo e porta di Mediador di Gobierno ta keda habri pa sigui ofrece su intermediacion entre ambos partido.

Mediador di Gobierno.
Mediador di Gobierno, Anselmo Pontilius a declara na Bon Dia Aruba cu nan a yega di haya un peticion di parti di FTA pa atende cu e preocupacionnan cu nan tin. Un di nan preocupacion ta cu na momento cu gobierno a anuncia cu nan lo tuma over e operacion for di Citgo, a bin e punto dilanti riba futuro di e trahadonan. Nan ta alrededor di 77 trahadonan cu ta traha directamente cu Citgo.

Ya caba a yega di tuma luga varios reunion entre Citgo, FTA y gobierno, caminda a surgi varios punto di discrepancia y incertidumbre. Un discusion crucial tin di haci si berdaderamente e compania estatal Refineria di Aruba (RdA) lo tuma cierto cantidad di trahadonan. Despues a sali e punto padilanti cu RdA ta informa cu nan no por tuma un cierto cantidad di trahadonan.

Mediador di Gobierno a yega di reuni cu FTA y Citgo, mientras di parti di IOWUA nan a reuni cu minister di Labor, Glenbert Croes. Den e reunionnan aki e sindicatonan a expresa nan preocupacion riba loke ta e pagonan di e añanan di servicio di e trahadonan. Sinembargo, apesar di e importancia di esaki, Mediador di Gobierno no ta haya cu esaki ta e punto primordial na e momento aki.

“E punto primordial ta ken ta tuma over y cuanto trahado ta wordo tuma over,” segun Pontilius.

El a splica cu di acuerdo cu nos leynan nobo di 2013, un compania nobo cu ta bin tuma over for di otro compania tin e responsabilidad di tuma e trahadonan tambe. Mediador di Gobierno ta haya cu no necesariamente e asunto aki mester keda pega eynan, pa e partidonan por yega na otro areglo.

Puntonan concreto.
Departamento di Mediador di Gobierno a propone un reunion cu minister presidente cu a yega tuma luga caba, caminda a wordo señala algun puntonan concreto. Un di nan tin di haci cu ta importante pa gobierno duna un claridad kico ta e situacion actual di negociacion entre gobierno y Citgo.

Ta importante pa clarifica e asunto aki cerca e sindicatonan. Pa gobierno den e MoU cu nan a firma cu Citgo tin palabra cu e compania aki ta responsabel pa e añanan di servicio di e trahadonan,locual legalmente ta asina. Sinembargo e prioridad den henter asunto aki ta cuanto hende lo keda na trabou y con e operador lo sigui.

Gobierno a yega di informa -segun Mediador- cu tin un negociacion keto bay cu Citgo; y tin un acuerdo preliminar caba (MoU). Pero nan tin un acuerdo pendiente cu nan ta yama e ‘temporarily suspend agramming.’ Kiermen un acuerdo cu nan lo suspende temporalmente e situacion di e compania y e trahado.

Te aworaki loke a keda palabra cu minister presidente ta, cu nan lo bay reuni cu e dos sindicatonan pa nan por haya un claridad con e situacion ta. Pero mas cu tur cos, reuni cu Citgo tambe den e proximo simannan nos dilanti pa sa exactamente kico lo ta e proximo escenario den caso cu Citgo no ta mas den operacion na Aruba. Entre nan ken ta bin na su luga y cuanto trahadonan lo wordo tuma.

Ademas, den caso cu tin cu paga tur hende nan añanan di servicio, ki formula lo wordo uza. Logicamente IOWUA a yega di señala cu no por tin otro formula compara cu loke nan a uza den pasado. Tambe a base di recomendacion di Mediador di Gobierno lo ta importante pa e partidonan por firma un tipo di documento cu por trankilisa e preocupacion existente rond di e refineria y nan trahadonan. Entre nan clarificacion riba pago particularmente. Pero tambe e continuidad di empleo, con esaki ta continua y bou cual condicionnan.

Mediador di Gobierno no ta descarta cu ainda nan lo por reuni prome cu fin di aña. Pero Pontilius ta duda cu nan lo por haya ehecutivonan di Citgo den e dianan di fiesta venidero. Pero esaki no ta kita cu na januari awo e partidonan lo por reuni pa haya claridad exactamente riba nan dudanan y sa exactamente kico ta futuro pa e grupo di alrededor di 70 trahado.